மகாராஷ்டிர மாநிலம் நாசிக்கில் 2027-ஆம் ஆண்டு நடைபெறவுள்ள வரலாற்று சிறப்புமிக்க கும்பமேளா விழாவிற்கு தயாரிப்புகள் தீவிரமடைந்து வரும் நிலையில், அங்குள்ள நதிநீரில் புற்றுநோயை உருவாக்கக்கூடிய ‘குரோமியம்’ வேதிப்பொருள் அனுமதிக்கப்பட்ட அளவை விட 1,000 மடங்கு அதிகமாக கலந்திருப்பது ஆய்வகப் பரிசோதனையில் கண்டறியப்பட்டு பெரும் அதிர்ச்சியை ஏற்படுத்தியுள்ளது.
நாசிக்கின் அம்பாத் தொழிற்பேட்டை பகுதிக்கு அருகில் உள்ள நந்தினி நதியிலிருந்து சேகரிக்கப்பட்ட நீர் மாதிரிகளை ஆய்வு செய்ததில், ஒரு லிட்டருக்கு 50.5 மில்லிகிராம் குரோமியம் இருப்பது தெரியவந்துள்ளது. இதில் 50.3 மில்லிகிராம் அளவுக்கு மிகவும் நச்சுத்தன்மை வாய்ந்த ‘ஹெக்சாவேலண்ட் குரோமியம்’ (Hexavalent Chromium) உள்ளது. இந்தியத் தர நிர்ணய அமைப்பின் (BIS) விதிகளின்படி, குடிநீரில் குரோமியத்தின் அனுமதிக்கப்பட்ட அளவு லிட்டருக்கு 0.05 மில்லிகிராம் மட்டுமே ஆகும்.
நந்தினி நதியானது, கும்பமேளா விழாவின் போது கோடிக்கணக்கான பக்தர்கள் புனித நீராடும் முதன்மை நதியான கோதாவரியில் சென்று கலக்கிறது. இதனால் தொழிற்பேட்டைக் கழிவுகள் புனித நதியில் கலந்து பக்தர்களின் ஆரோக்கியத்திற்குப் பெரும் அச்சுறுத்தலை ஏற்படுத்தக்கூடும் என்ற அச்சம் எழுந்துள்ளது.
இந்த அதிர்ச்சி ஆய்வறிக்கை வெளியானதைத் தொடர்ந்து, அம்பாத் தொழிற்பேட்டை பகுதியில் நதிநீரை மாசுபடுத்தும் தொழிற்சாலைகள் மீது உடனடியாக கடும் நடவடிக்கை எடுக்குமாறு சம்பந்தப்பட்ட அதிகாரிகளுக்கு மகாராஷ்டிர மாநில அரசு உத்தரவிட்டுள்ளது.
