இந்தியப் பொருட்களை சீனச் சந்தையில் விற்பனை செய்வதில் ‘வரிசாரா தடைகளே’ மிகப்பெரிய முட்டுக் கட்டையாக இருக்கின்றன என்று மத்திய நிதி அமைச்சர் நிர்மலா சீதாராமன் சுட்டிக்காட்டியுள்ளார். தாய்லாந்து நாட்டின் பாங்காக்கில் நடைபெற்ற உலக வங்கி மற்றும் சர்வதேச நாணய நிதியத்தின் ஆண்டு கூட்டத்தின் போது, அட்லாண்டிக் கவுன்சிலின் மைக்கேல் குகல்மேனுடன் நடைபெற்ற கலந்துரையாடலில் அவர் இதனைத் தெரிவித்தார்.
இரு நாடுகளுக்கும் இடையே நிலவும் வர்த்தகச் சமநிலையின்மை தொடர்ந்து அதிகரித்து வருவதற்கு சீன சந்தையில் இந்தியப் பொருட்களுக்கு அனுமதி மறுக்கப்படுவதே முக்கியக் காரணம் என்று நிர்மலா சீதாராமன் குற்றம்சாட்டினார். ஜெனரிக் மருந்துகள், மாட்டிறைச்சி, காய்கறிகள் மற்றும் அழுகக்கூடிய விவசாயப் பொருட்கள் ஆகியவற்றில் இந்தியா உலக அளவில் முன்னணியில் இருந்தபோதிலும், சீனாவில் அவற்றுக்கு விதிக்கப்படும் கட்டுப்பாடுகளால் வர்த்தகம் பாதிக்கப்படுகிறது என்றும் அவர் தெரிவித்தார்.
தாவர ஆரோக்கியம் மற்றும் நோய் தடுப்பு விதிகள் போன்ற சாக்குகளைச் சொல்லி சீனா இந்தியப் பொருட்களைத் தடுக்கிறது என்றும், ஆனால் பிற நாடுகளைப் போலப் பழிவாங்கும் நோக்கில் பதிலடி வரி விதிக்காமல் இந்தியா எப்போதும் பேச்சுவார்த்தை வழியையே தேர்வு செய்கிறது என்றும் அமைச்சர் கூறினார். மேலும், இந்தியாவிற்கும் அமெரிக்காவிற்கும் இடையிலான வர்த்தக ஒப்பந்த பேச்சுவார்த்தைகள் விரைவில் நிறைவடையும் என எதிர்பார்ப்பதாகவும், ஐக்கிய அரபு அமீரகம், ஆஸ்திரேலியா, கனடா போன்ற நாடுகளுடனும் இந்தியா வர்த்தக உறவை வலுப்படுத்தி வருவதாகவும் அவர் குறிப்பிட்டார்.
