ஆயுத பூஜை, சரஸ்வதி பூஜை மற்றும் வார இறுதி நாட்களை முன்னிட்டு தொடர் விடுமுறை வருவதால், சென்னையில் இருந்து சொந்த ஊர்களுக்குச் செல்லும் பொதுமக்களின் பயண நெரிசலைக் கட்டுப்படுத்த 5 முக்கிய இடங்களில் இருந்து சிறப்பு பேருந்துகள் இயக்கப்படும் என தமிழ்நாடு அரசு போக்குவரத்துத் துறை அறிவித்துள்ளது. நகரின் போக்குவரத்து நெரிசலைத் தவிர்க்கும் பொருட்டு, செல்லும் வழித்தடங்களின் அடிப்படையில் பேருந்து நிலையங்கள் பிரிக்கப்பட்டு இந்த ஏற்பாடுகள் செய்யப்பட்டுள்ளன.
தென் மாவட்டங்கள் மற்றும் மேற்கு மாவட்டங்களுக்குச் செல்லும் பயணிகளுக்காக கிளாம்பாக்கத்தில் இருந்து பெரும்பாலான பேருந்துகள் இயக்கப்படுகின்றன. திண்டிவனம், விழுப்புரம், விருத்தாசலம், உளுந்தூர்பேட்டை, கள்ளக்குறிச்சி, சேலம், கோயம்புத்தூர், பண்ருட்டி, நெய்வேலி, கடலூர், சிதம்பரம் மற்றும் திருச்சி, மதுரை, நெல்லை, கன்னியாகுமரி, தூத்துக்குடி, திண்டுக்கல், பழனி உள்ளிட்ட பகுதிகளுக்கான பேருந்துகள் இங்கிருந்து புறப்படும். மேலும், செஞ்சி மார்க்கமாக திருவண்ணாமலை, போளூர், வந்தவாசி மற்றும் சேத்துப்பட்டு செல்லும் பயணிகளுக்காக, கிளாம்பாக்கம் சிஎம்டிஏ காலநிலை பூங்கா அருகில் அமைக்கப்பட்டுள்ள தற்காலிக பேருந்து முனையம் செயல்படும்.
டெல்டா மாவட்டங்களான தஞ்சாவூர், கும்பகோணம் மற்றும் நாகப்பட்டினம் செல்லும் பேருந்துகள் சோதனை அடிப்படையில் மறைமலை நகர் தற்காலிக பேருந்து நிலையத்தில் இருந்து புறப்படும் வகையில் ஏற்பாடு செய்யப்பட்டுள்ளது. இப்பயணிகளின் வசதிக்காக, கிளாம்பாக்கம் மாநகரப் போக்குவரத்துக் கழக பேருந்து நிறுத்தத்தில் இருந்து மறைமலை நகருக்கு கட்டணமில்லா இணைப்பு பேருந்துகள் தொடர்ந்து இயக்கப்பட உள்ளன.
அதேபோல, கோயம்பேட்டில் இருந்து, கிழக்கு கடற்கரை சாலை வழியாக புதுச்சேரி, கடலூர், சிதம்பரம், மயிலாடுதுறை, வேளாங்கண்ணி செல்லும் பேருந்துகளும், வேலூர், காஞ்சிபுரம், ஓசூர், பெங்களூரு, திருத்தணி மற்றும் திருப்பதி மார்க்கமாகச் செல்லும் பேருந்துகளும் வழக்கம்போல் புறப்படும் என போக்குவரத்துத் துறை தெளிவுபடுத்தியுள்ளது. பயணிகள் கூட்ட நெரிசலின்றி முன்கூட்டியே திட்டமிட்டு பயணிக்க அறிவுறுத்தப்பட்டுள்ளனர்.
