சர்வதேச கிரிக்கெட் கவுன்சில், 2028-ஆம் ஆண்டு லாஸ் ஏஞ்சலஸ் ஒலிம்பிக்கில் மகளிர் கிரிக்கெட் போட்டிக்கான தகுதிச் சுற்று விதிமுறைகளில் திருத்தம் செய்துள்ளது. இதன்படி, ஒலிம்பிக்கை நடத்தும் அமெரிக்க மகளிர் அணி நேரடியாக தகுதி பெறுவதற்கான தரவரிசை தேவையைப் பூர்த்தி செய்யத் தவறினால், அந்த கூடுதல் வாய்ப்பு 2027 பிப்ரவரியில் நடைபெறும் தொடக்க ‘மகளிர் சாம்பியன்ஸ் டிராபி’ தொடரின் தரவரிசை அடிப்படையில் வழங்கப்படும் என அறிவிக்கப்பட்டுள்ளது.
துபாயில் அக்டோபர் மாதம் நடைபெற்ற கூட்டங்களை தொடர்ந்து, உறுப்பினர் வாரியங்களுக்கு இந்த புதிய தகுதி விவரங்கள் அனுப்பி வைக்கப்பட்டன. அத்துடன் 2027 மற்றும் 2031 ஒருநாள் உலகக்கோப்பை தொடர்களுக்கு இடைப்பட்ட சர்வதேச தொடர்களுக்கான கால அட்டவணையும் வெளியிடப்பட்டது. இந்த அட்டவணையில் 12 ஆண்கள் தொடர்கள், 7 மகளிர் தொடர்கள் மற்றும் தகுதிச் சுற்றுகள் உட்பட 5 19-வயதுக்குட்பட்டோருக்கான (U-19) தொடர்கள் இடம்பெற்றுள்ளன.
மகளிர் ஒலிம்பிக் தகுதி விதிமுறைகள்: திருத்தப்பட்ட விதிகளின்படி, அமெரிக்க மகளிர் அணி நேரடியாகத் தகுதி பெற வேண்டுமெனில், டிசம்பர் 31, 2026-க்குள் ICC தரவரிசைத் தேவையை பூர்த்தி செய்ய வேண்டும். ஒருவேளை தவறும் பட்சத்தில், முதலில் திட்டமிட்டபடி T20I தரவரிசைக்கு பதிலாக, மார்ச் 1, 2027 நிலவரப்படி ‘ICC மகளிர் சாம்பியன்ஸ் டிராபி 2027’ தொடரின் புள்ளிப்பட்டியல் அடிப்படையில் அந்த ஒரு இடம் மறுஒதுக்கீடு செய்யப்படும்.
அமெரிக்க ஆண்கள் அணிக்கு நேரடித் தகுதி: T20I தரவரிசையில் 13-வது இடத்தில் உள்ள அமெரிக்க ஆண்கள் அணி, ஏற்கனவே இருக்கும் விதிகளின்படி ஒலிம்பிக்கிற்கு நேரடியாகத் தகுதி பெற்றுவிட்டது. ஆனால், 19-வது இடத்தில் உள்ள அமெரிக்க மகளிர் அணியின் பங்கேற்பு இன்னும் உறுதியாகவில்லை.
இதனிடையே, இந்த ஆண்டின் தொடக்கத்தில் நடைபெற்ற T20 உலகக்கோப்பைத் தொடரைத் தொடர்ந்து, கண்டங்கள் வாரியாக மிக அதிக தரவரிசையில் உள்ள தகுதியான அணிகள் என்ற அடிப்படையில் ஆஸ்திரேலியா, இந்தியா, தென்னாப்பிரிக்கா மற்றும் கிரேட் பிரிட்டன் ஆகிய நாடுகள் மகளிர் ஒலிம்பிக் போட்டிகளுக்கு ஏற்கனவே தகுதி பெற்றுவிட்டன. ஆண்கள் பிரிவில், டிசம்பர் 31, 2026 நிலவரப்படி T20I தரவரிசையின் அடிப்படையில் கண்டங்களுக்கான பிரதிநிதித்துவம் தீர்மானிக்கப்படும்.
மேலும், இரு ஒலிம்பிக் தகுதிச் சுற்றுத் தொடர்களும் 2027-லிருந்து 2028 ஜனவரி மற்றும் பிப்ரவரி மாதங்களுக்கு மாற்றப்பட்டுள்ளன. தலா 8 அணிகள் பங்கேற்கும் இத்தொடருக்கான மைதானங்கள் இன்னும் முடிவு செய்யப்படவில்லை.
2028 மற்றும் 2030 T20 உலகக்கோப்பை அட்டவணை: 2028-ஆம் ஆண்டிற்கான T20 உலகக்கோப்பை அட்டவணையையும் ICC உறுதி செய்துள்ளது. 12 அணிகள் பங்கேற்கும் மகளிர் T20 உலகக்கோப்பைத் தொடர் பாகிஸ்தானில் செப்டம்பர் 7 முதல் அக்டோபர் 1 வரை நடைபெறும். அதைத் தொடர்ந்து, 20 அணிகள் பங்கேற்கும் ஆண்கள் T20 உலகக்கோப்பைத் தொடர் ஆஸ்திரேலியா மற்றும் நியூசிலாந்தில் அக்டோபர் 12 முதல் நவம்பர் 12 வரை நடைபெறும்.
இதுதவிர, 2029 உலக டெஸ்ட் சாம்பியன்ஷிப் இறுதிப்போட்டி இங்கிலாந்தில் ஜூன் 8 முதல் 12 வரை நடத்தத் திட்டமிடப்பட்டுள்ளது. இங்கிலாந்து, அயர்லாந்து மற்றும் ஸ்காட்லாந்து ஆகிய நாடுகள் இணைந்து நடத்தும் 2030 ஆண்கள் T20 உலகக்கோப்பைத் தொடர், முன்பு திட்டமிட்டபடி ஜூன் மாதத்தில் நடத்தப்படாமல் ஜூலை-ஆகஸ்ட் மாதங்களுக்கு மாற்றப்பட்டுள்ளது.
