மூன்றாவது மாடி பால்கனியில் நின்று குட்காவைத் துப்ப முயன்ற முதியவர், உயர் மின்னழுத்த மின்கம்பியால் மின்சாரம் தாக்கி உயிரிழந்த சம்பவம் மத்தியப் பிரதேசத்தில் சோகத்தை ஏற்படுத்தியுள்ளது. வீடுகளுக்கு மிக அருகில் ஆபத்தான நிலையில் சென்ற மின்கம்பிகளை அகற்றக் கோரி ஏற்கெனவே புகார் அளித்தும் நடவடிக்கை எடுக்கப்படவில்லை என அப்பகுதி மக்கள் குற்றம்சாட்டியுள்ளனர்.
மத்தியப் பிரதேச மாநிலம் விதிஷா மாவட்டத்தில் உள்ள கஞ்ச்பசோடா நகரின் காயத்ரி நகர் பகுதியில் இந்தச் சம்பவம் நடந்துள்ளது. உயிரிழந்தவர் பிரபுலால் குப்தா (65). சத்தர்பூர் பகுதியைச் சேர்ந்த இவர், கடந்த 10 ஆண்டுகளாக கஞ்ச்பசோடாவில் வாடகை வீட்டில் வசித்து வந்தார். கொத்தனாராகப் பணியாற்றி வந்த இவர், சம்பவத்தன்று மதியம் தனது வீட்டின் மூன்றாவது மாடி பால்கனியில் நின்றிருந்தார்.
அப்போது வாயில் இருந்த குட்காவை வெளியே துப்புவதற்காக அவர் பால்கனியில் இருந்து சாய்ந்துள்ளார். அந்தப் பகுதியில் பால்கனிக்கு மிக அருகில் 11,000 வோல்ட் உயர் மின்னழுத்த மின்கம்பி சென்றுள்ளது. குட்காவைத் துப்பியபோது ஏற்பட்ட தொடர்பைத் தொடர்ந்து, அவர் மீது மின்சாரம் பாய்ந்ததாகக் கூறப்படுகிறது. இதில் உடலில் தீப்பற்றிய நிலையில், பிரபுலால் சம்பவ இடத்திலேயே உயிரிழந்தார்.
எச்சில் வழியாக மின்சாரம் பாயுமா?
மனித எச்சிலில் நீரும் கரைந்த உப்புகள் உள்ளிட்ட மின்கடத்தும் தன்மையுடைய பொருட்களும் இருப்பதால், குறிப்பிட்ட சூழல்களில் அது மின்சாரத்தைக் கடத்தக்கூடும். அதே நேரத்தில், உயர் மின்னழுத்த மின்கம்பிகளுக்கு அருகில் செல்லும்போது நேரடியாகத் தொடாமல்கூட மின்சாரம் காற்றின் வழியாகப் பாயும் அபாயம் உள்ளது. இதனை மின்வில் விளைவு (Electrical Arcing) எனக் குறிப்பிடுகின்றனர்.
இருப்பினும், இந்தச் சம்பவத்தில் மின்சாரம் எவ்வாறு பாய்ந்தது என்பதை உறுதிப்படுத்த சம்பவ இடம் தொடர்பான தொழில்நுட்ப ஆய்வு தேவைப்படுகிறது. உயர் மின்னழுத்த மின்கம்பிகளுக்கு அருகில் எச்சில் அல்லது வேறு எந்தப் பொருளையும் துப்புவது கடுமையான உயிராபத்தை ஏற்படுத்தக்கூடும்.
இந்தச் சம்பவத்தைத் தொடர்ந்து, குடியிருப்புப் பகுதிகளில் வீடுகளுக்கு அருகில் ஆபத்தான நிலையில் செல்லும் உயர் மின்னழுத்த மின்கம்பிகளை அகற்ற வேண்டும் என அப்பகுதி மக்கள் வலியுறுத்தியுள்ளனர். இதுதொடர்பாக மின்துறை அதிகாரிகளிடம் பலமுறை புகார் அளித்தும் உரிய நடவடிக்கை எடுக்கப்படவில்லை என அவர்கள் குற்றம்சாட்டியுள்ளனர்.
வீட்டு உரிமையாளர் பத்மா சிதார், தங்கள் பகுதியில் மின்கம்பங்கள் மற்றும் மின்கம்பிகள் ஆபத்தான நிலையில் இருப்பதாகவும், வீடுகளுக்கு அருகில் செல்லும் உயர் மின்னழுத்த மின்கம்பியை மாற்ற அதிகாரிகளிடம் பலமுறை கோரிக்கை விடுத்தும் நடவடிக்கை எடுக்கப்படவில்லை என்றும் வேதனை தெரிவித்துள்ளார்.
மின்கம்பிகளின் பாதுகாப்பு தொடர்பான புகார்கள் மீது அதிகாரிகள் உரிய நடவடிக்கை எடுத்திருந்தால் இந்த உயிரிழப்பைத் தவிர்த்திருக்க முடியும் என அப்பகுதி மக்கள் ஆதங்கம் தெரிவித்துள்ளனர்.
Also Read: “ஐயோ அண்ணி.. கடிக்காதீங்க!” கதறிய கொழுந்தன்.. அந்தரங்க உறுப்பைக் கடித்ததால் 55 தையல்கள்!
