2026 ஆசிய விளையாட்டுப் போட்டியின் முதல் நாள் ஆட்டத்தில் துப்பாக்கி சுடுதல் வீராங்கனை இளவேனில் வளரிவன் இந்தியாவின் நட்சத்திர நாயகியாகத் திகழ்ந்து நாட்டிற்கு இரண்டு வெள்ளிப் பதக்கங்களை வென்று தந்துள்ளார். மகளிர் 10 மீட்டர் ஏர் ரைபிள் தனிநபர் பிரிவில் மிகச் சிறந்த திறமையை வெளிப்படுத்திய அவர் வெள்ளிப் பதக்கத்தைக் கைப்பற்றினார். மேலும், சோனம் மாஸ்கர் மற்றும் விதர்சா வினோத் ஆகியோருடன் இணைந்து மகளிர் 10 மீட்டர் ஏர் ரைபிள் அணிப் பிரிவிலும் அவர் இரண்டாவது வெள்ளிப் பதக்கத்தை வென்று சாதனை படைத்தார்.
இதனிடையே, மிக்ஸ்டு மார்ஷியல் ஆர்ட்ஸ் (MMA) போட்டியில் இந்தியா தனது வரலாற்றுச் சிறப்புமிக்க முதல் பதக்கத்தை உறுதி செய்துள்ளது. மகளிர் 60 கிலோ எடைப் பிரிவின் காலிறுதிப் போட்டியில் இந்தியாவின் சுசிகா தரியால், மங்கோலியாவின் அல்டன்சிமேக் பைகல்மாவை வீழ்த்தி அரைஇறுதிக்கு முன்னேறியதன் மூலம் இந்த சாதனையைப் படைத்துள்ளார். அதேபோல், மகளிர் கிரிக்கெட் போட்டியில் இந்திய அணி அரையிறுதியில் வங்கதேசத்தை வீழ்த்தி இறுதிப்போட்டிக்கு தகுதி பெற்று, நாட்டிற்கு குறைந்தபட்சம் வெள்ளிப் பதக்கத்தை உறுதி செய்துள்ளது.
ஹாக்கி தொடரிலும் இந்திய அணிகள் தங்களின் முதல் போட்டிகளிலேயே அதிரடியான வெற்றிகளுடன் கணக்கைத் தொடங்கியுள்ளன. பூல் B பிரிவில் களமிறங்கிய இந்திய மகளிர் ஹாக்கி அணி 19-0 என்ற கணக்கில் உஸ்பெகிஸ்தானை சுருட்டி பிரம்மாண்ட வெற்றி பெற்றது. அதேபோல, ஆண்கள் பூல் A பிரிவு போட்டியில் இந்திய அணி 13-1 என்ற கோல் கணக்கில் இந்தோனேசியாவை வீழ்த்தி அபார வெற்றி பெற்றது.
டேபிள் டென்னிஸ் போட்டிகளில் மகளிர் அணி தொடர்ச்சியாக இந்தோனேசியாவை 3-0 என்ற கணக்கிலும், சிங்கப்பூரை 3-2 என்ற கணக்கிலும் வீழ்த்தி அசத்தியது. ஆண்கள் அணி இந்தோனேசியாவை 3-0 என வீழ்த்தினாலும், ஈரானிடம் 0-3 என்ற கணக்கில் தோல்வியைத் தழுவியது. பேட்மிண்டன் மகளிர் அணிப் பிரிவின் முதல் சுற்றில் இந்தியா 3-0 என்ற கணக்கில் கஜகஸ்தானை எளிதில் வீழ்த்தி அடுத்த சுற்றுக்கு முன்னேறியது.
நீச்சல் போட்டியில் ஆண்கள் 100 மீட்டர் பேக்ஸ்ட்ரோக் பிரிவில் இறுதிப்போட்டிக்குத் தகுதி பெற்ற ரிஷப் தாஸ், 6-வது இடத்தைப் பிடித்து நிறைவு செய்தார். வுஷு மற்றும் டெக்பால் போட்டிகளில் இந்திய வீரர்கள் கடுமையான போராட்டத்தைக் கொடுத்தபோதிலும் பதக்க வாய்ப்புகளை நூலிழையில் தவறவிட்டனர். டெக்பால் மகளிர் தனிநபர் மற்றும் கலப்பு இரட்டையர் பிரிவுகளின் வெண்கலப் பதக்கப் போட்டிகளில் இந்திய ஜோடிகள் தோல்வியடைந்தன.
