தமிழகம் முழுவதும் மாநில பாடத்திட்டத்தில் படிக்கும் மாணவர்களுக்கான பொதுத் தேர்வு விரைவில் நடைபெற உள்ளது. அதன்படி 12-ம் வகுப்பு பயிலும் மாணவர்களுக்கு மார்ச் 1-ம் தேதி முதல் 22-ம் தேதி வரை தேர்வு நடைபெறவுள்ளது. அதே போல 11-ம் வகுப்பிற்கு மார்ச் 4-ம் தேதி முதல் 25-ம் தேதி வரையிலும், 10-ம் வகுப்பிற்கு மார்ச் 26-ம் தேதி முதல் ஏப்ரல் 8-ம் தேதி வரையிலும் நடைபெறவுள்ளது.
இந்த நிலையில் 12-ம் வகுப்பு பயிலும் மாணவர்கள் பிப்ரவரி 20-ம் தேதி முதல் ஹால் டிக்கெட்களை பதிவிறக்கம் செய்து கொள்ளலாம் என பள்ளிக் கல்வித்துறை அறிவித்துள்ளது. இது தொடர்பாக அரசுத் தேர்வுத்துறை இயக்குநர் சேதுராம வர்மா வெளியிட்டுள்ள செய்திக்குறிப்பில்; 12 -ம் வகுப்பு பொதுத் தேர்விற்கு, பள்ளி தலைமையாசிரியர்கள் 20-ம் தேதி பிற்பகல் முதல் www.dge.tn.gov.in என்ற இணையத்தில் பதிவிறக்கம் செய்து கொள்ளலாம்.
அதேபோல் 11 மற்றும் 12-ம் வகுப்பு பொதுத்தேர்வினை தனித் தேர்வர்களாக எழுத உள்ளவர்கள், வரும் 19-ம் தேதி முதல் www.dge.tn.gov.in என்ற இணையத்தளத்தில் விண்ணப்ப எண் மற்றும் பிறந்த தேதியைப் பதிவு செய்து ஹால் டிக்கெட்களை பதிவிறக்கம் செய்து கொள்ளலாம். மேலும் 11-ம் வகுப்பு மற்றும் 12-ம் வகுப்பு பொதுத் தேர்வு எழுத உள்ள தனித் தேர்வர்களுக்கு இரண்டுத் தேர்வுகளுக்கும் சேர்த்து ஒரே நுழைவுச்சீட்டு மட்டும் வழங்கப்படும்” என தெரிவிக்கப்பட்டுள்ளது.
