குஸ்கா என்ற ப்ளைன் பிரியாணி ஆர்டர் செய்யும் போது அதில் தவறுதலாக சிக்கன் அல்லது மட்டன் பீஸ் இருந்தால் அசைவ பிரியர்களை கையிலேயே பிடிக்க முடியாது. ஆனால், இப்படியான சம்பவம் ஒன்று சைவ பிரியருக்கு நடந்ததோடு, அது போலீசிடம் புகார் கொடுக்கும் அளவுக்கு சென்றிருக்கிறது.
மத்தியப்பிரதேசத்தைச் சேர்ந்த ஆகாஷ் தூபே என்பவர்தான் தனக்கு கிடைத்த சைவ உணவில் எலும்புத் துண்டு இருந்ததாக கூறி உணவக உரிமையாளர் மீது புகார் கொடுத்திருக்கிறார். அதன்படி, வெஜ் பிரியாணி ஆர்டர் செய்திருந்த ஆகாஷ் தூபேவின் உணவில் எலும்புத் துண்டு இருந்ததை கண்டு அதிர்ச்சி அடைந்துள்ளார். இதனையடுத்து, அந்த உணவக உரிமையாளர் மற்றும் நிர்வாகத்திடம் கேட்டபோது அவர்கள் ஆகாஷ் தூபேவிடம் மன்னிப்பு கேட்டுள்ளனர்.
இருப்பினும் விஜய் நகர் காவல் நிலையத்தில் ஆகாஷ் தூபே புகார் அளித்திருக்கிறார். இந்த புகாரை ஏற்ற போலீசார், இதுகுறித்து விசாரிப்பதாகவும் தெரிவித்துள்ளனர். இது தொடர்பாக பேசியுள்ள விஜயநகர் துணை காவல் ஆணையர் சம்பத் உபாத்யாய், ”உணவக மேலாளர் ஸ்வப்னில் குஜ்ராட்டி மீது சட்டப்பிரிவு 298ன் கீழ் FIR பதிவு செய்யப்பட்டுள்ளது. இந்த விவகாரம் குறித்து விசாரணை நடத்தப்பட்டு வருகிறது. விரைவில் உரிய நடவடிக்கை எடுக்கப்படும்” என தெரிவித்துள்ளார்.
