உத்தர பிரதேச மாநிலம் லக்னோவில் கட்டிடம் இடிந்து விழுந்ததில் 8 பேர் உயிரிழந்துள்ளனர்.
உத்தர பிரதேச மாநிலம் லக்னோவில் கட்டிடம் இடிந்து விழுந்ததில் இறந்தவர்களின் எண்ணிக்கை 8 ஆக உயர்ந்துள்ளது என்று அதிகாரிகள் ஞாயிற்றுக்கிழமை தெரிவித்தனர். இங்குள்ள டிரான்ஸ்போர்ட் நகர் பகுதியில் நேற்று மாலை மூன்று மாடிக் கட்டிடம் மற்றும் மோட்டார் ஒர்க்ஷாப் இடிந்து விழுந்ததில் 28 பேர் காயமடைந்தனர். மீட்பு நடவடிக்கையின் போது ராஜ் கிஷோர் (27), ருத்ரா யாதவ் (24) மற்றும் ஜக்ரூப் சிங் (35) என அடையாளம் காணப்பட்ட மூன்று பேரின் உடல்களை மீட்டதாக ஆணையர் ஜி எஸ் நவீன் தெரிவித்துள்ளார்.
மீட்பு பணி தொடர்ந்து நடந்து கொண்டிருக்கிறது. இடிபாடுகளுக்குள் வேறு யாரும் சிக்காமல் இருப்பதை உறுதி செய்வதில் தற்போது கவனம் செலுத்தி வருவதாக அதிகாரிகள் தெரிவித்தனர். இந்த கட்டிடம் நான்கு ஆண்டுகளுக்கு முன்பு கட்டப்பட்டதாகவும், சம்பவத்தின் போது சில கட்டுமான பணிகள் நடந்து கொண்டிருந்ததாகவும் போலீசார் தெரிவித்தனர். நேற்று மாலை 4:45 மணியளவில் இந்த சம்பவம் நடந்தபோது பாதிக்கப்பட்டவர்களில் பெரும்பாலோர் தரை தளத்தில் வேலை செய்து கொண்டிருந்தனர்.
காயமடைந்தவர்கள் மாவட்டத்தில் உள்ள லோக் பந்து மருத்துவமனை உட்பட பல்வேறு மருத்துவமனைகளில் அனுமதிக்கப்பட்டுள்ளனர். அதிகாரிகளின் கூற்றுப்படி, கட்டிடத்தின் கீழ் தளத்தில் ஒரு மோட்டார் பட்டறை, முதல் தளத்தில் ஒரு மருத்துவ குடோன் மற்றும் இரண்டாவது தளத்தில் ஒரு கட்லரி கிடங்கு இருந்ததாக தெரிவித்துள்ளனர். காயமடைந்தவர்களில் ஒருவரான மருத்துவ குடோனில் பணிபுரிந்த ஆகாஷ் சிங் கூறுகையில், கட்டிடத்தின் தூணில் விரிசல் ஏற்பட்டுள்ளது. “மழை பெய்து கொண்டிருந்ததால் தரை தளத்திற்கு வந்தோம். கட்டிடத்தின் தூணில் விரிசல் ஏற்பட்டுள்ளதை நாங்கள் கவனித்தோம். திடீரென கட்டிடம் முழுவதும் எங்கள் மீது இடிந்து விழுந்தது என்றார்.
