திருச்சி மாவட்டம், மண்ணச்சநல்லூர் அருகில் இருக்கும் ராசாம்பாளையம் கிராமம், வடக்கு தெருவில் வசித்து வருபவர் தாணு (34). இவர் வழக்கறிஞராக உள்ளார். இவர் நடந்து முடிந்த உள்ளாட்சி மன்ற தேர்தலில், இந்த ஊராட்சியின் 11வது வார்டு உறுப்பினர் பதவிக்கு போட்டியிட்டார்.
தாணுவை எதிர்த்து போட்டியிட்ட அதே ஊரை சேர்ந்த இளங்கோவன் அந்த தேர்தலில் வெற்றி பெற்றார். இளங்கோவனுக்கு ஆதரவாக அதே ஊரை சேர்ந்த பாலசுப்பிரமணியன் (22) என்பவர் தேர்தல் வேலைகளை செய்துள்ளார். இவருக்கும், தாணுவுக்கும் இடையே தேர்தல் சமயத்தில் ஏற்பட்ட பிரச்சினையால், முன்விரோதம் இருந்து வந்ததாக தெரிகிறது. நேற்று முன்தினம் இரவு ராசாம்பாளையம் பெட்ரோல் பங்க் பக்கத்தில் பாலசுப்பிரமணியம் நின்று கொண்டிருந்தார்.
அந்த சமயத்தில்,அங்கு வந்த வழக்கறிஞர் தாணுவும், அவரது உறவினரான அதே ஊரை சேர்ந்த கண்ணன் (45) என்பவரும் சேர்ந்து பாலசுப்பிரமணியத்தை அரிவாளால் வெட்டியுள்ளனர். இது குறித்து பாலசுப்பிரமணியம் காவல் நிலையத்தில் புகார் கொடுத்துள்ளார். புகாரின் அடிப்படையில், மண்ணச்சநல்லூர் காவல் நிலைய ஆய்வாளர் ரமேஷ்குமார் மற்றும் போலீசார், வழக்குப்பதிவு செய்து தாணுவை கைது செய்தனர். மேலும் தலைமறைவான கண்ணனை தேடி வருகின்றனர்.
