கர்நாடக மாநிலம் கொபல் மாவட்டம் கூகனூர் தாலுகா பின்யல் கிராமத்தில் குடியிருப்பவர் தேவப்பா கூப்பட் (62). இவர் தனது சொந்தக்காரரின் பேத்தியின் பிறந்தநாள் விழாவில் கலந்து கொள் கொபல் நகருக்கு நேற்று இரவு காரில் சென்றுள்ளார். தேவப்பாவுடன் அவரது உறவினர்கள் 9 பேர் காரில் சென்றுள்ளனர்.
இந்நிலையில், பிறந்தநாள் விழா கொண்டாட்டத்தை முடித்துவிட்டு நேற்று இரவு காரில் ஒன்பதுபேரும் வீடு திரும்பிக்கொண்டிருந்தனர். இரவு 11 மணியளவில் பஹன்பூர் பகுதியில் சென்று கொண்டிருந்த போது எதிர்பாராத விதமாக சாலையின் எதிரே வந்த லாரி மீது வேகமாக கார் மோதியது. இந்த கோர விபத்தில் காரில் பயணித்த நான்கு பெண்கள் உட்பட ஐந்து பேர் சம்பவ இடத்திலேயே உடல் நசுங்கி பரிதாபமாக உயிரிழந்தனர். மேலும், நான்கு பேர் படுகாயமடைந்தனர்.
தகவலறிந்து சம்பவ இடத்திற்கு வந்த காவல்துறையினர், படுகாயமடைந்தவர்களை மீட்டு அருகில் இருந்த மருத்துவமனையில் சேர்த்தனர். மேலும், உயிரிழந்தவர்களின் உடலை மீட்டு உடற்கூறு ஆய்விற்காக அனுப்பி வைத்தனர். மேலும் இந்த விபத்து தொடர்பாக வழக்குப்பதிவு செய்து விசாரணை நடத்தி வருகின்றனர்.
