விருதுநகர் அருகே உள்ள பெரிய பேராலி கிராமத்தில் கிழக்கு தெருவை வசித்து வருபவர் கோபால். இவர் கூலி தொழில் செய்து பிழைப்பு நடத்தி வருகிறார். இவரது மனைவி சரஸ்வதி (48). இவர் இன்று காலை தனது குழந்தையை பள்ளியில் கொண்டு விட்டு விட்டு வீட்டில் தனியாக இருந்துள்ளார்.
அப்போது அதே கிராமத்தில் வசித்து வரும் சுருளீஸ்வரன் (32) என்பவர், சரஸ்வதியின் வீட்டிற்குள் நுழைந்தார். இதை பார்த்து அதிர்ச்சியடைந்த சரஸ்வதி சுருளீஸ்வரனை வெளியே போகுமாறு கூறியுள்ளார். ஆனால் சுருளீஸ்வரன் சரஸ்வதியுடன் தகராறு செய்துள்ளார். இந்நிலையில் சுருளீஸ்வரன் தான் வைத்திருந்த இரும்பு கம்பியால் சரஸ்வதியின் தலையில் அடித்துவிட்டு ஓடி விட்டார்.
இதை பார்த்த, அக்கம் பக்கத்தில் இருந்தவர்கள், சரஸ்வதியை விருதுநகர் அரசு மருத்துவமனைக்கு அனுப்பி வைத்தனர். ஆனால் மருத்துவமனைக்கு போகும் வழியிலேயே சரஸ்வதி பரிதாபமாக உயிரிழந்தார். இது பற்றி தகவல் அறிந்த பாண்டியன் நகர் காவல் துறையினர் பெரிய பேராலி கிராமத்திற்கு விரைந்து வந்து விசாரணை நடத்தினர். விசாரணையில் சரஸ்வதி வீட்டுக்கு செல்லும் பொழுது வழியில் சுருளீஸ்வரன் வேறொரு பெண்ணையும் தாக்கியதாக தெரிகிறது. இதனைத் தொடர்ந்து காவல்துறையினர், கிராமத்தில் இருந்த சுருளீஸ்வரனை கைது செய்து வழக்கு பதிவு செய்துள்ளனர். இச்சம்பவம் பேராலி கிராமத்தில் அதிர்ச்சியையும் ஏற்படுத்தி உள்ளது.
