தி.மு.க தலைவராக பொறுப்பேற்று 4 ஆண்டுகள் நிறைவடைந்ததை ஒட்டி முதலமைச்சர் மு.க.ஸ்டாலின், முன்னாள் முதல்வரும் தி.மு.க தலைவருமான கருணாநிதி நினைவிடத்தில் மலர் தூவி மரியாதை செலுத்தினார்.
திராவிட முன்னேற்ற கழகத்தின் தலைவராக மு.க.ஸ்டாலின் பொறுப்பேற்று இன்று 5 ஆம் ஆண்டு தொடங்குகிறது. இதையொட்டி மெரினாவில் உள்ள முன்னாள் முதலமைச்சர் கருணாநிதி நினைவிடத்தில் மு.க.ஸ்டாலின் மரியாதை செலுத்தினார். இந்நிலையில், முதலமைச்சர் மு.க.ஸ்டாலின் தனது ட்விட்டர் பக்கத்தில் நெகிழ்வுடன் பதிவு ஒன்றை வெளியிட்டுள்ளார். அந்த பதிவில் அவர் குறிப்பிட்டிருப்பதாவது:-
தகைசால் தந்தையே! தன்னிகரற்ற தலைவரே! முதல்வர்களில் மூத்தவரே! கலையுலக வேந்தரே! எங்களின் உயிரே! உணர்வே! தாங்கள் வகித்த தி.மு.க. தலைவர் பொறுப்பில் நான் அமர்ந்து நான்கு ஆண்டுகள் நிறைவடைந்து ஐந்தாவது ஆண்டில் அடியெடுத்து வைக்கிறேன். ஒவ்வொரு அடியும் – நீங்கள் அமைத்த படியில்தான் ஏறுகிறேன். உங்கள் சொற்படியே நடக்கிறேன். அதனால்தான் வென்றபடியே இருக்கிறேன்! மேலும் வெல்ல மென்மேலும் வாழ்த்துங்கள்! இவ்வாறு மு.க.ஸ்டாலின் பதிவிட்டுள்ளார்.
