பத்தினம்திட்டா மாவட்டம் திருவல்லா அருகே உள்ள புளிக்கீழ் பகுதியில் வசித்து வருபவர் ராஜேஷ் (36). இவரது நண்பர் பொடியாடி பகுதியில் குடியிருப்பவர் சந்தோஷ் குமார் (40). கடந்த சில மாதங்களுக்கு முன்பு ராஜேஷ், சந்தோஷ் குமாரிடம் ரூ.3 லட்சம் கடன் வாங்கி இருக்கிறார். வாங்கிய பணத்துக்கு வட்டி கொடுக்காமல் இருந்துள்ளார். இந்நிலையில் சந்தோஷ் குமார் அசல் பணத்தை திருப்பி கேட்டுள்ளார். அப்போது, பணத்தை திருப்பி கொடுக்காமல் ராஜேஷ் இழுத்தடித்துள்ளார். இதனால் இரண்டு பேருக்கும் இடையே தகராறு ஏற்பட்டுள்ளது.
இந்நிலையில் ஓணம் பண்டிகை முடிந்து மறுநாள் பணத்தை திருப்பி கொடுத்து விடுவதாக ராஜேஷ் சொல்லியிருந்தார். அதனால் பணத்தை வாங்க சந்தோஷ் குமார், ராஜேஷ் வீட்டுக்கு சென்றார். அப்போது ராஜேஷ் பணத்தை தற்போது தர முடியாது என கூறி இருக்கிறார். இதனால் ஆத்திரம் அடைந்த சந்தோஷ் குமார் வாக்குவாதத்தில் ஈடுபட்டுள்ளார். இந்நிலையில் இருவருக்கும் இடையே தகராறு முற்றியது. இதை தொடர்ந்து சந்தோஷ்குமார் மறைத்து வைத்திருந்த அரிவாளால் ராஜேசை தலையில் வெட்டி விட்டு தப்பி ஓடிவிட்டார். இதில் ராஜேஷ் படுகாயம் அடைந்தார்.
உடனே அங்கிருந்தவர்கள் ராஜேசை மீட்டு தனியார் மருத்துவமனையில் சிகிச்சைக்காக சேர்த்தனர். அங்கு முதலுதவி சிகிச்சை அளிக்கப்பட்டது. பின்னர் மேல் சிகிச்சைக்காக கோட்டயம் அரசு மருத்துவக்கல்லூரி மருத்துவமனையில் சேர்க்கப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது. இதுகுறித்த புகாரின் பேரில் சந்தோஷ்குமாரை புளிக்கீழ் காவல்துறையினர் கைது செய்தனர். அதன் பின்னர் அவரை திருவல்லா முதல் வகுப்பு கோர்ட்டில் ஆஜர்படுத்தி சிறையில் அடைத்தனர்.
