முதலமைச்சர் மு.க.ஸ்டாலின் தலைமையில் அடுத்த மாதம் மதுரையில் நடைபெறும், ஜிஎஸ்டி கவுன்சில் கூட்டம் தொடர்பாக ஆலோசனை கூட்டம் நடைபெற உள்ளது. தமிழக முதலமைச்சர் மு.க.ஸ்டாலின் சமீப காலமாக அனைத்து மாவட்டங்களுக்கும் சென்று மக்களுக்கு நலத்திட்ட உதவிகளை வழங்குவது, அரசு திட்டங்களை தொடங்கி வைப்பது, அரசு திட்டங்களுக்கு அடிக்கல் நாட்டுவது என அனைத்து நிகழ்ச்சிகளுக்கும் சென்று வந்தார். இந்நிலையில் திருவண்ணாமலை மாவட்டத்திற்கு சென்ற போது அவருக்கு உடல்நலக்குறைவு உண்டானது.
அதைத்தொடர்ந்து அவர் கடந்த 12-ஆம் தேதி டுவிட்டர் பக்கத்தில் தனக்கு கொரோனா தொற்று ஏற்பட்டிருப்பதாக தெரிவித்தார். பின்னர் 14-ஆம் தேதி காவேரி ஹாஸ்பிடலில் அனுமதிக்கப்பட்டார். அங்கு சில நாட்கள் சிகிச்சை பெற்று 18-ஆம் தேதி ஹாஸ்பிடலில் இருந்து டிஸ்சார்ஜ் செய்யப்பட்டார். பிறகு தலைமைச்செயலகத்துக்கு வந்து ஜனாதிபதி தேர்தலுக்கான வாக்குப்பதிவு செய்தார். சில நாட்களாக தலைமைச்செயலகத்திற்கு வராமல் முகாம் அலுவலகத்தில் இருந்தபடி அரசு வேலைகளை செய்து வந்தார்.
இந்நிலையில் முதலமைச்சர் மு.க.ஸ்டாலின் இன்று தலைமைச் செயலகத்திற்கு வந்தார். இந்நிலையில் தலைமை செயலகத்தில் முதலமைச்சர் மு.க.ஸ்டாலின் தலைமையில் ஜிஎஸ்டி கவுன்சில் கூட்டம் தொடர்பாக ஆலோசனை கூட்டம் நடைபெற உள்ளது. இக்கூட்டத்தில் நிதித்துறை அமைச்சர் பிடிஆர் பழனிவேல் தியாகராஜன், நிதித்துறை செயலாளர் மற்றும் உயர் அதிகாரிகள் கலந்து கொள்ள இருக்கின்றனர். இந்த கூட்டத்தில் அடுத்த மாதம் மதுரையில் நடைபெறும் ஜிஎஸ்டி கவுன்சில் கூட்டம் தொடர்பாக ஆலோசனை நடைபெற உள்ளதாகவும், ஜிஎஸ்டி கவுன்சில் கூட்டத்திற்கான தேதி மற்றும் ஏற்பாடு குறித்தும் , செஸ் ஒலிம்பியாட் போட்டி குறித்தும் ஆலோசனை நடைபெற இருப்பதாக தகவல் வெளியாகி உள்ளது.
