திருச்சி மாவட்டம் முசிறியை சார்ந்த பிளஸ் 2 மாணவி விஷம் அருந்தி தற்கொலை செய்து கொண்டுள்ள சம்பவம் அப்பகுதியில் பரபரப்பையும் சோகத்தையும் ஏற்படுத்தி இருக்கிறது. திருச்சி மாவட்டம் முசிறி பகுதியைச் சார்ந்தவர் பாலசுப்பிரமணியம். இவரது மகள் வர்ஷா வயது 20. கடந்த 2020 ஆம் ஆண்டு அங்குள்ள தனியார் பள்ளி ஒன்றில் பிளஸ் டூ படித்து வந்த இவர் பாதியிலேயே தனது படிப்பை நிறுத்திவிட்டார். அதன் பிறகு 202-23 ஆம் ஆண்டு தனித்தேர்வுக்காக வீட்டிலிருந்து படித்து பிளஸ் டூ பொதுத் தேர்வு எழுத முடிவு செய்தார். தேர்வுகள் அனைத்தும் முடிந்து விட்ட நிலையில் தான் பரிட்சையில் தோல்வி அடைந்து விடுவோமோ என்ற பயம் மட்டும் வர்ஷாவிற்கு இருந்திருக்கிறது இதனால் மிகவும் குழப்பமான மனநிலையில் காணப்பட்டுள்ளார்.
இந்நிலையில் கடந்த நான்காம் தேதி வீட்டிலிருந்த எலி பேஸ்ட் விஷத்தை எடுத்து சாப்பிட்டு தற்கொலைக்கு முயன்றிருக்கிறார் வர்ஷா. எலி பேஸ்ட் சாப்பிட்டு மயக்கம் அடைந்த நிலையில் இருந்த வர்ஷாவை அவரது பெற்றோர் மற்றும் குடும்பத்தினர் திருச்சியில் உள்ள தனியார் மருத்துவமனையில் சிகிச்சைக்காக அனுமதித்தனர். அங்கு தீவிர சிகிச்சை பிரிவு அனுமதிக்கப்பட்டு சிகிச்சை பெற்று வந்த வர்ஷா நேற்று பரிதாபமாக உயிரிழந்தார். இதனைத் தொடர்ந்து அவரது தந்தை அளித்த புகாரின் பேரில் போலீசார் வழக்கு பதிவு செய்து விசாரணை நடத்தி வருகின்றனர். மேலும் மாணவனின் உடல் பிரேத பரிசோதனைக்காக அரசு மருத்துவமனை பிணவறைக்கு மாற்றப்பட்டது.
