மேற்கு வங்க மாநிலத்துக்கு இன்று பயணம் மேற்கொள்ளும் பிரதமர் மோடி வந்தே பாரத் எக்ஸ்பிரஸ் ரெயில் சேவை உட்பட ரூ.7,800 கோடி மதிப்புள்ள பல்வேறு நலத்திட்டங்களை தொடங்கி வைக்க உள்ளார்.
இது தொடர்பாக பிரதமரின் செயல் அலுவலகம் வெளியிட்டுள்ள செய்திக் குறிப்பில், ஹவுரா மற்றும் நியூ ஜகல்பூரி பகுதிகளை இணைக்கும் வந்தே பாரத் எக்ஸ்பிரஸ் ரெயில் சேவை மற்றும், கொல்கத்தா மெட்ரோவின் ஜோகா-தராட்டலா வழித்தடத்தின் சேவையையும் பிரதமர் மோடி தொடங்கி வைக்க உள்ளதாகவும், இந்திய ரயில்வே துறை சார்பில் அமைக்கப்பட்டுள்ள 4 புதிய திட்டப்பணிகளை பிரதமர் மோடி நாட்டுக்கு அர்ப்பணிக்கவுள்ளதாகவும் தெரிவிக்கப்பட்டுள்ளது. அதனைத் தொடர்ந்து அரசு சார்பில் மேற்கொள்ளப்பட்டுள்ள பல்வேறு வளர்ச்சித் திட்டங்கள் உட்பட மொத்தம் ரூ.7,800 கோடி மதிப்புள்ள திட்டப்பணிகளை பிரதமர் மோடி இன்று தொடங்கி வைக்கிறார் என தெரிவிக்கப்பட்டுள்ளது.
