தமிழ்நாடு மற்றும் புதுச்சேரி மண்டலத்தில் 2022-23 நிதியாண்டில் வருமானவரி புலனாய்வுத் துறை மூலம் நடத்திய 81 சோதனைகளில் ரூ.170 கோடி மதிப்பிலான சொத்துகள் பறிமுதல் செய்யப்பட்டதாக வருமான வரித்துறையின் தலைமை இயக்குநா் சுனில் மாத்தூா் தெரிவித்துள்ளார்.
சென்னை நுங்கம்பாக்கம் வருமான வரித்துறை வளாகத்தில் நடைபெற்ற நிகழ்ச்சி ஒன்றில் பேசிய அவர், இந்தியாவின் வளா்ச்சிக்கு தேவையான பொருளாதார உதவி வழங்குவதில், வருமான வரித்துறை முக்கிய பங்காற்றி வருகிறது. இந்த நிதியாண்டில் மத்திய அரசின் மொத்த வரி வருவாய் இலக்காக ரூ.33.6 லட்சம் கோடி நிர்ணயம் செய்யப்பட்டுள்ளது. இதில் நேரடி வரி வசூல் இலக்காக ரூ.18.3 லட்சம் கோடியாகும். நாட்டின் மொத்த வரி வசூலில் 54 % வருமான வரித்துறை பங்களிப்பாக உள்ளது.
இந்தியாவில் வருமான வரி ஏய்ப்பு செய்யும் நபர்கள் மீது கடுமையான நடவடிக்கை எடுக்கப்படுகிறது. வருமான வரி புலனாய்வுத் துறை சாா்பில் இந்த நிதியாண்டில் மட்டும் 81 சோதனை நடத்தப்பட்டது. இதில் ரூ.170 கோடி மதிப்பிலான சொத்துக்கள் பறிமுதல் செய்யப்பட்டன. இதில் ரூ.120 கோடி ரொக்கம் மற்றும் ரூ.50 கோடி மதிப்பிலான நகைகள் பறிமுதல் செய்யப்பட்டன. மேலும் கணக்கில் காட்டப்படாத ரூ.5,200 கோடி வருமானமும் கண்டறியப்பட்டதாக தெரிவித்தார்.
