தமிழ் சினிமாவில் முன்னணி நடிகராக வலம் வருபவர் விஜய். தற்போது இவர் லோகேஷ் கனகராஜ் இயக்கத்தில் லியோ படத்தில் நடித்து வருகிறார். செவன் ஸ்கிரீன் ஸ்டுடியோஸ் சார்பாக லலித் குமார் மற்றும் ஜெகதீஸ் தயாரித்து வரும் இப்படத்திற்கு அனிருத் இசையமைக்கிறார். அக்டோபர் 19ஆம் தேதி வெளியாகவுள்ளதாக அறிவிக்கப்பட்ட நிலையில், இந்தப் படத்தின் படப்பிடிப்புகள் விறுவிறுப்பாக நடைபெற்று வருகின்றன. தற்போது சென்னையில் விஜய் – அர்ஜூன் சம்பந்தப்பட்ட காட்சிகள் படமாக்கப்பட்டு வருவதாக கூறப்படுகிறது. இதனையடுத்து, விஜய் நடிக்க இருக்கும் தளபதி 68 படத்தை சூப்பர் குட் ஃபிலிம்ஸ் அல்லது ஏஜிஎஸ் எண்டர்டெயின்மென்ட் தயாரிக்கவுள்ளதாக கூறப்படுகிறது.
முதலில் இந்தப் படத்தை கோபிசந்த் மல்லினேனி இயக்கவிருப்பதாக கூறப்பட்டது. இதையடுத்து, மீண்டும் தெலுங்கு இயக்குநரா என விஜய் ரசிகர்கள் அதிர்ச்சி அடைந்தனர். இந்நிலையில், தற்போது இந்த படத்தை இயக்க வெங்கட் பிரபு பரிசீலனையில் இருப்பதாக தகவல் வெளியாகியுள்ளது. நடிகர் விஜய் தற்போது பெரும்பாலும் சீரியஸான ரோல்களில் நடித்துவரும் நிலையில், ஒருவேளை வெங்கட் பிரபு உறுதியானால் விஜய்யை கலகலப்பான வேடத்தில் காணலாம் என அவரது ரசிகர்கள் ஆர்வமாக இருக்கிறார்கள்.
