டிசம்பர் 13, 2023 அன்று நடந்த நாடாளுமன்ற பாதுகாப்பு மீறல் வழக்கில் கைது செய்யப்பட்ட நீலம் ஆசாத் மற்றும் மகேஷ் குமாவத் ஆகிய இருவருக்கும் டெல்லி உயர் நீதிமன்றம் ஜாமீன் இன்று வழங்கியது. மேலும் குற்றம் சாட்டப்பட்டவர்கள் தலா ரூ.50,000 ஜாமீன் பத்திரத்தையும், அதே தொகைக்கு இரண்டு உத்தரவாதங்களையும் வழங்க உத்தரவிட்டது. மேலும் பல நிபந்தனைகளையும் நீதிமன்றம் விதித்தது..
அதன்படி, குற்றம் சாட்டப்பட்டவர்கள் நேர்காணல்கள் வழங்கவோ அல்லது வழக்கு தொடர்பான எந்தவொரு பொது அறிக்கைகளையும் வெளியிடவோ நீதிமன்றம் தடை விதித்துள்ளது.. மேலும் சம்பந்தப்பட்ட சம்பவம் தொடர்பான எதையும் சமூக ஊடகங்களில் பதிவிடுவதற்கும் நீதிமன்றம் தடை விதித்துள்ளது.
மேலும் ஜாமீன் வழங்கப்பட்ட இருவரும் டெல்லி நகரத்தை விட்டு வெளியேறுவதையும் நீதிமன்றம் தடை செய்துள்ளது, மேலும் ஒவ்வொரு திங்கள், புதன் மற்றும் வெள்ளிக்கிழமைகளிலும் காலை 10 மணிக்கு காவல் நிலையத்தில் ஆஜராக வேண்டும் என்று உத்தரவிட்டுள்ளது.
நீதிபதி சுப்ரமணியம் பிரசாத் மற்றும் நீதிபதி ஹரிஷ் வைத்தியநாதன் சங்கர் ஆகியோர் அடங்கிய அமர்வு இந்த உத்தரவை பிறப்பித்தது.
நாடாளுமன்றத்தில் அத்துமீறி நுழைந்த நபர்கள்
டிசம்பர் 13, 2023 அன்று, சாகர் சர்மா மற்றும் மனோரஞ்சன் டி ஆகிய இருவர் மக்களவை அறைக்குள் அத்துமீறி நுழைந்தனர்.. பூஜ்ஜிய நேரத்தில், அவர்கள் பொது கேலரியில் இருந்து குதித்து, மஞ்சள் வாயுவை வெளியேற்றி கோஷங்களை எழுப்பினர். எம்.பி.க்கள் மற்றும் பாதுகாப்புப் பணியாளர்கள் அவர்களை வெளியேற்றினர்.
விசாரணையின் போது, குற்றம் சாட்டப்பட்டவர்கள் ‘பகத் சிங் ரசிகர் மன்றம்’ என்ற சமூக ஊடகப் பக்கம் மூலம் இணைக்கப்பட்டு மைசூரில் சந்தித்தது கண்டறியப்பட்டது. தங்கள் நடவடிக்கைகளை ஒருங்கிணைக்க சிக்னல் செயலி மூலம் மறைகுறியாக்கப்பட்ட தகவல்தொடர்புகளைப் பயன்படுத்திய குழு, ஒன்றரை ஆண்டுகளுக்குப் பிறகு தங்கள் திட்டத்தின்படி நாடாளுமன்றத்தில் அத்துமீறி நுழைந்தனர்…
2001 நாடாளுமன்ற தாக்குதல் நடந்த அதே நாளில், இந்த அத்துமீறல் சம்பவம் நடந்ததால் பரபரப்பு நிலவியது. 2001 தாக்குதலில் ஜெய்ஷ்-இ-முகமது பயங்கரவாதிகள் 6 டெல்லி காவல்துறையினர், இரண்டு நாடாளுமன்ற பாதுகாப்புப் பணியாளர்கள் மற்றும் ஒரு தோட்டக்காரர் கொல்லப்பட்டனர் என்பது குறிப்பிடத்தகக்து.
Read More : இருசக்கர வாகனங்களுக்கு ABS கட்டாயம்.. அமலாகும் புதிய விதி.. விலை ரூ.10,000 வரை உயர வாய்ப்பு..?
