கோடைக்காலத்தில் வெயிலின் தாக்கத்தால் உடல் சோர்வடைகிறது. வெளியே சென்று வீட்டிற்கு வரும்போதோ அல்லது அலுவலகத்தில் சோர்வாக உணரும்போதோ, பலரும் முதலில் செய்வது குளிர்சாதனப் பெட்டியைத் திறந்து ஒரு பாட்டில் குளிர்ந்த நீரை எடுத்துப் பருகுவதுதான். அதில் ஐஸ் கட்டிகளைப் போட்டு, அந்த ஜில்லென்ற நீரை அருந்தும்போது கிடைக்கும் சுகமும் திருப்தியும் தனித்துவமானவை. சிலர் சாதாரண நீரைக் குடிப்பதை முற்றிலும் நிறுத்திவிட்டு, வீட்டிலோ அல்லது அலுவலகத்திலோ எப்போதும் குளிர்ந்த நீரையே குடித்து வருகின்றனர்.
இருப்பினும், குளிர்ந்த நீரை விரும்பி அதிகமாக அருந்துபவர்களிடம் மருத்துவர்கள் ஒரு கசப்பான உண்மையைச் சொல்கிறார்கள். தற்காலிக நிம்மதியைத் தரும் இந்த பழக்கம், உடலை உள்ளுக்குள் எவ்வாறு பாதிக்கும் என்பது குறித்து அவர்கள் எச்சரிக்கின்றனர்.
நாம் குடிக்கும் குளிர்ந்த நீர் தொண்டையின் வழியாக உடலுக்குள் நுழையும்போதே செரிமான மண்டலத்தின் மீது முதல் பாதிப்பு ஏற்படுகிறது என்று இரைப்பை குடல் நிபுணர்கள் விளக்குகிறார்கள். பொதுவாக, நாம் உண்ணும் உணவைச் செரிக்க உடல் ஒரு குறிப்பிட்ட உள் வெப்பத்தைப் (உடல் வெப்பநிலை) பயன்படுத்துகிறது. ஆனால் குளிர்ந்த நீரை அருந்தும்போது, அந்தத் தட்பவெப்பநிலையைத் தாங்கிக்கொள்ள இரத்த நாளங்கள் திடீரென சுருங்குகின்றன.
இது செரிமான செயல்முறையை வெகுவாக மந்தமாக்குகிறது. இதனால் உண்ட உணவு சரியாகச் செரிக்கப்படாமல், வயிறு உப்புசம், கடுமையான மலச்சிக்கல் மற்றும் வாயுத் தொல்லை போன்ற பிரச்சனைகள் ஏற்படுகின்றன. இப்பழக்கம் தொடர்ந்தால் குடலின் செயல்பாடு பாதிக்கப்படும் என்றும் மருத்துவர்கள் எச்சரிக்கின்றனர்.
குளிர்ந்த நீரை அருந்துவது இதயத் துடிப்பிலும் கடுமையான தாக்கத்தை ஏற்படுத்தும் என்ற அதிர்ச்சியூட்டும் உண்மையையும் இதய நோய் நிபுணர்கள் கூறுகின்றனர். நம் உடலில் தலையிலிருந்து வயிறு வரை செல்லும் மிக முக்கியமான நரம்புகளில் ஒன்று ‘வேகஸ் நரம்பு’ (Vagus Nerve) ஆகும். இது உடலின் தானியங்கி செயல்பாடுகளைக் கட்டுப்படுத்துகிறது. நாம் திடீரென குளிர்ந்த நீரை அருந்தும்போது, அந்தத் தட்பவெப்பத்தால் இந்த வேகஸ் நரம்பு தீவிரமாகத் தூண்டப்படுகிறது.
இதனால் இதயத் துடிப்பு திடீரெனக் குறைகிறது. ஏற்கனவே பலவீனமான இதயம் அல்லது இரத்த அழுத்தப் (BP) பிரச்சனைகள் உள்ளவர்களுக்கு இது சில சமயங்களில் உயிருக்கே ஆபத்தானதாக அமையலாம் என்று நிபுணர்கள் எச்சரிக்கின்றனர்..
மற்றொரு முக்கியமான விஷயம் என்னவென்றால், குளிர்ந்த நீர் உடலில் உள்ள கொழுப்பைக் கரைப்பதில்லை.. மாறாக, அதை உறைய வைத்து கெட்டியாக்குகிறது. நாம் உண்ணும் உணவில் உள்ள கொழுப்புச் சத்துக்கள் குளிர்ந்த நீருடன் தொடர்பு கொள்ளும்போது உறைந்துவிடுகின்றன. இதனால் உடல் அந்தக் கொழுப்பை எரிப்பது மிகவும் கடினமாகிறது.
இதன் விளைவாக, உடல் எடை வேகமாக அதிகரித்தல் மற்றும் வயிற்றுப் பகுதியில் கொழுப்பு சேருதல் போன்ற பிரச்சனைகள் ஏற்படலாம் என்று உடல் எடை குறைப்பு நிபுணர்கள் விளக்குகின்றனர். இவை தவிர, சைனஸ் (sinus) பிரச்சனை உள்ளவர்கள் குளிர்ந்த நீரை அருந்திய உடனேயே தொண்டை தொற்று, டான்சில் வீக்கம், கடுமையான சளி மற்றும் ஒற்றைத் தலைவலி அதிகரிப்பு போன்ற பாதிப்புகளுக்கு ஆளாகும் அபாயமும் உள்ளது.
இருப்பினும், இதற்காகக் கோடைக்காலத்தில் குளிர்ந்த நீரை முற்றிலும் தவிர்க்க வேண்டும் என்று அர்த்தமல்ல. தாகத்தைத் தணிக்கவும் உடலைக் குளிர்விக்கவும் நம் முன்னோர்கள் கையாண்ட ஒரு சிறந்த முறை மண்பானையைப் பயன்படுத்துவதாகும். மண்பானையில் உள்ள நீர் இயற்கையாகவே குளிர்ச்சியடைகிறது. இத்தகைய நீரை அருந்துவது உடலுக்குத் தேவையான தாதுக்களை வழங்குவதோடு, நோய் எதிர்ப்பு சக்தியையும் அதிகரிக்கிறது.
குளிர்சாதனப் பெட்டியில் வைக்கப்பட்ட நீரைப் பருகி உடல்நலக் குறைபாட்டை ஏற்படுத்திக்கொள்வதை விட, பாரம்பரிய மண்பானை நீரைப் பருகுவதே சிறந்தது என்று மருத்துவ நிபுணர்கள் பரிந்துரைக்கின்றனர்.. தற்காலிகக் குளிர்ச்சியை நாடிச் செல்வது நீண்ட கால உடல்நலப் பிரச்சினைகளுக்கு வழிவகுத்துவிடக் கூடாது என்றும் அவர்கள் எச்சரிக்கின்றனர்..
Read More : சிக்கன் சாப்பிடுவது உண்மையில் உடல் வெப்பத்தை அதிகரிக்குமா? இதன் பின்னணியில் உள்ள உண்மையை தெரிஞ்சுக்கோங்க..!
