காலையில் நடைப்பயிற்சி செய்வதால் இதய ஆரோக்கியம் மேம்படும், உடல் எடை கட்டுப்படும், மன அழுத்தம் குறையும் உள்ளிட்ட பல நன்மைகள் கிடைக்கின்றன. ஆனால், எந்த உடற்பயிற்சியையும் சரியான முறையில் செய்யாதபோது, அது நன்மையை விட தீமையை ஏற்படுத்தும் அபாயமும் உள்ளது. அதனால், காலை நடைப்பயிற்சியை தொடங்குவதற்கு முன் சில முக்கிய விஷயங்களை தெரிந்து கொள்வது அவசியம். இப்போது, நீங்கள் கவனிக்க வேண்டிய அந்த 5 முக்கிய அம்சங்கள் என்ன என்பதை பார்க்கலாம்.
தண்ணீர் குடிக்க மறக்காதீர்கள்: காலை நடைப்பயிற்சி செல்லும் முன், உடலில் போதுமான அளவு நீரேற்றம் இருப்பது மிகவும் முக்கியம். பல ஆய்வுகள் காட்டுவதாவது, தண்ணீர் குறைவாக இருந்தால் உடலின் செயல்திறன் நேரடியாக பாதிக்கப்படும் என்பதே.
உடற்பயிற்சிக்கு முன் தண்ணீர் குடிப்பது, உடலை தயாராக வைத்துக் கொள்வதுடன், உடல் வெப்பநிலையை கட்டுப்படுத்தவும் உதவுகிறது. அதேபோல், தசைகளுக்கு தேவையான ஊட்டச்சத்துக்கள் மற்றும் ஆக்ஸிஜன் சரியாக சென்று சேருவதற்கும் இது முக்கிய பங்கு வகிக்கிறது. போதுமான அளவு தண்ணீர் குடிக்காதவர்களுக்கு சோர்வு, தசைப்பிடிப்பு, தலைச்சுற்றல் போன்ற பிரச்சனைகள் ஏற்படும் அபாயம் உள்ளது. அதனால், நடைப்பயிற்சி செல்லும் முன் சுமார் 10 நிமிடங்களுக்கு முன்பு 100–200 மில்லி லிட்டர் தண்ணீர் குடிப்பது நல்லது என்று நிபுணர்கள் பரிந்துரைக்கிறார்கள்.
வெறும் வயிற்றில் நடைப்பயிற்சி: உடல் எடையை குறைக்க அல்லது கொழுப்பை எரிக்க, காலை நடைப்பயிற்சியை வெறும் வயிற்றில் செய்வது நல்லது என்ற நம்பிக்கை பலரிடமும் உள்ளது. குறிப்பாக கார்டியோ பயிற்சிகள் வெறும் வயிற்றில் செய்தால் அதிக பலன் கிடைக்கும் என்று கூறப்படுவது வழக்கம்.
ஆனால், இது முழுமையாக சரியான கருத்து அல்ல என்று நிபுணர்கள் எச்சரிக்கின்றனர். வெறும் வயிற்றில் உடற்பயிற்சி செய்வதால் சிலருக்கு உடனடி பலன் கிடைக்கலாம் என்றாலும், பலருக்கு இது சோர்வு, மயக்கம், உடல் பலவீனம் போன்ற பிரச்சனைகளை ஏற்படுத்தும் அபாயம் உள்ளது. உடலில் போதுமான சக்தி இல்லாத நிலையில் பயிற்சி செய்தால், அது எதிர்மறை விளைவுகளையும் தரலாம். அதனால், நடைப்பயிற்சிக்கு முன் வாழைப்பழம், நட்ஸ்கள் அல்லது பழ ஸ்மூத்தி எடுத்துக்கொள்வது பாதுகாப்பானதும், உடலுக்கு உதவிகரமானதும் ஆகும்.
வார்ம் அப்: காலை நடைப்பயிற்சிக்கு முன் வார்ம் அப் செய்வது மிக முக்கியமான ஒன்று. இரவு முழுவதும் ஓய்வில் இருந்த உடல், உடனே செயல்பாட்டுக்கு செல்ல தயாராக இருக்காது. அதனால், உடலை மெதுவாக விழிப்புணர்வுக்கு கொண்டு வருவது அவசியம்.
வார்ம் அப் செய்யாமல் நேரடியாக நடைப்பயிற்சி தொடங்கினால், தொடை எலும்புகள் மற்றும் மூட்டுகளில் சுளுக்கு ஏற்படும் அபாயம் அதிகரிக்கும். குறிப்பாக முழங்கால், இடுப்பு மற்றும் கீழ் முதுகு பகுதிகளில் வலி அல்லது பாதிப்பு ஏற்படும் என்று மருத்துவ நிபுணர்கள் எச்சரிக்கின்றனர். இதை தவிர்க்க, நடைப்பயிற்சிக்கு முன் குறைந்தது 4 முதல் 5 நிமிடங்கள் வார்ம் அப் செய்வது போதுமானது. இது உடலை பாதுகாப்பாகவும், சுறுசுறுப்பாகவும் வைத்திருக்க உதவும்.
நடைப்பயிற்சிக்கு முன் காபி: காலை எழுந்தவுடன் காபி குடிப்பது பலருக்கு வழக்கமான பழக்கம். அது உடனடி புத்துணர்ச்சி தரும் என்றாலும், காபி குடித்துவிட்டு நடைப்பயிற்சி செல்லுவது நல்லதல்ல என்று நிபுணர்கள் எச்சரிக்கின்றனர். காஃபின் ஒரு டையூரிடிக் தன்மை கொண்டது. இதனால் உடலில் உள்ள நீர் அளவு குறைந்து, நீரிழப்பு ஏற்படும் அபாயம் உள்ளது.
நடைப்பயிற்சியின் போது உடல் நீரேற்றம் குறைந்தால், சோர்வு மற்றும் செயல்திறன் குறைவு ஏற்படும். மேலும், காபி குடித்துவிட்டு உடற்பயிற்சி செய்வது செரிமானத்தை மெதுவாக்கி, சிலருக்கு வயிற்று வலி மற்றும் அஜீரண பிரச்சனைகளையும் உருவாக்கலாம். குறிப்பாக வெறும் வயிற்றில் காபி குடிப்பது அமிலத்தன்மையை அதிகரிக்கக்கூடும். அதனால், நடைப்பயிற்சிக்கு முன் காபியை தவிர்த்து, போதுமான அளவு தண்ணீர் குடிப்பது சிறந்த தேர்வு.
இயற்கை உபாதைகளை தவிர்க்க வேண்டாம்: நடைப்பயிற்சிக்கு செல்லும் முன், இயற்கை உபாதையை முடிப்பது மிகவும் அவசியமான ஒன்று. பலர் இதை சிறிய விஷயம் என்று புறக்கணிப்பது வழக்கம். ஆனால், இது உடல்நலத்திற்கு பெரிய பாதிப்பை ஏற்படுத்தக்கூடும். சிறுநீர் அல்லது பிற தேவைகளை தாமதப்படுத்தி வைத்து நடைப்பயிற்சி செய்வது உடலுக்கு அழுத்தத்தை ஏற்படுத்தும். குறிப்பாக, சிறுநீர்ப்பை நிரம்பிய நிலையில் நடப்பது சிறுநீர் பாதை தொற்றுகள் (UTI) போன்ற பிரச்சனைகளுக்கு வழிவகுக்கும் அபாயம் உள்ளது என்று சுகாதார நிபுணர்கள் எச்சரிக்கின்றனர்.
