கோடைக்காலத்தில் பயணிகள் நெரிசலைக் குறைத்து, பாதுகாப்பான பயணத்தை உறுதிசெய்யும் வகையில் இந்திய இரயில்வே பிரம்மாண்டமான ஏற்பாடுகளைச் செய்து வருகிறது. இந்தக் கோடைப் பருவத்தில், இதுவரை இல்லாத அளவாக 18,262 சிறப்பு இரயில் சேவைகள் (பயணங்கள்) இயக்கப்படும் என்று இரயில்வே அமைச்சகம் அறிவித்துள்ளது.
புது ல்லியில் நடைபெற்ற உயர்மட்ட ஆய்வுக் கூட்டத்தில், மத்திய இரயில்வே அமைச்சர் அஸ்வினி வைஷ்ணவ் இத்திட்டத்திற்கு ஒப்புதல் அளித்தார். இரயில்வே அமைச்சகம் தனது அதிகாரப்பூர்வ ‘X’ (முன்னர் Twitter) கணக்கின் வாயிலாக இந்தத் தகவலை வெளியிட்டுள்ளது. கோடை விடுமுறைக் காலத்தைக் கருத்தில் கொண்டு, ஏப்ரல் 15 முதல் ஜூலை 15, 2026 வரையிலான காலகட்டத்தில் பயணிகள் போக்குவரத்து உச்சத்தில் இருக்கும் என்று எதிர்பார்க்கப்படுகிறது.
குறிப்பாக, தங்கள் சொந்த ஊர்களுக்குச் செல்லும் மக்களின் எண்ணிக்கை அதிகமாக இருக்கும் என்பதால், இந்தக் காலகட்டத்தை மனதில் கொண்டு இரயில்வே நிர்வாகம் ஒரு சிறப்பு உத்தியைச் செயல்படுத்தி வருகிறது. இதில் 11,878 இரயில் பயணங்களுக்கான அறிவிப்புகள் ஏற்கனவே வெளியிடப்பட்டுவிட்ட நிலையில், எஞ்சியவை படிப்படியாக அறிவிக்கப்படவுள்ளன. இரயில் பெட்டிகளின் எண்ணிக்கையை அதிகரிப்பதன் மூலமும், பயண அட்டவணையைச் செம்மைப்படுத்துவதன் மூலமும் பயணிகள் நெரிசல் கட்டுப்படுத்தப்படும்.
முக்கிய நகரங்களில் சிறப்பு கவனம் புது தில்லி, மும்பை (CSMT, LTT, புனே), சூரத், அகமதாபாத் மற்றும் பெங்களூரு போன்ற அதிக நெரிசல் மிகுந்த முக்கிய இரயில் நிலையங்களில், பயணிகள் எவ்வித சிரமத்தையும் சந்திக்காத வகையில் சிறப்பு நடவடிக்கைகள் மேற்கொள்ளப்பட்டு வருகின்றன. நிகழ்நேரக் கூட்ட மேலாண்மை: இரயில் நிலையங்களில் உள்ள கூட்டத்தை நிகழ்நேரத்தில் (Real-time) கண்காணித்தல். கள அளவிலான ஆதரவு: பயணிகளுக்கு உதவக் கூடுதல் பணியாளர்களை நியமித்தல். RPF கண்காணிப்பு: இரயில்களில் ஏறும்போது ஏற்படும் கூட்ட நெரிசலால் ஏற்படும் விபத்துகளைத் தவிர்க்கும் வகையில், இரயில்வே பாதுகாப்புப் படை (RPF) வீரர்கள் பயணிகளுக்குத் தொடர்ந்து வழிகாட்டி வருகின்றனர்.
பாதுகாப்பான பயணமே இலக்கு மேற்கு இரயில்வே மண்டலத்திற்கு உட்பட்ட உத்னா நிலையம் போன்ற அதிகக் கூட்டம் நிறைந்த பகுதிகளில், RPF வீரர்களின் உதவியுடன் பயணிகள் ஒழுங்குமுறையாக இரயிலில் ஏறுவதை உறுதிசெய்யும் நடவடிக்கைகள் ஏற்கனவே எடுக்கப்பட்டு வருகின்றன. பயணிகள் தங்கள் சேருமிடங்களை எவ்விதச் சிரமமுமின்றிப் பாதுகாப்பாகச் சென்றடைவதை உறுதிசெய்யும் நோக்கத்துடன், இந்திய இரயில்வே இந்த மாபெரும் நடவடிக்கையை மேற்கொண்டு வருகிறது. எனவே, இந்தக் கோடைக்காலத்தில் பயணம் செய்யத் திட்டமிட்டுள்ள பயணிகள், இந்தச் சிறப்பு இரயில்கள் குறித்த விவரங்களை இரயில்வேயின் அதிகாரப்பூர்வ இணையதளம் அல்லது செயலி (App) வாயிலாக அறிந்து, தங்கள் பயணச்சீட்டுகளை முன்பதிவு செய்துகொள்ளலாம்.
Read More : ஓய்வூதியதாரர்களுக்கு குட்நியூஸ்..! இனி பணம் நேரடியாக வங்கிக் கணக்குகளில் வரவு வைக்கப்படும்..!
