இமாச்சலப் பிரதேசத்தின் பிலாஸ்பூரில் திடீரென ஏற்பட்ட நிலச்சரிவில் சிக்கிய பேருந்தில் 18 பயணிகள் பரிதாபமாக உயிரிழந்தனர். பேருந்து மண்ணில் புதைந்துள்ளதால் பலி எண்ணிக்கை அதிகரிக்கும் அச்சம் ஏற்பட்டுள்ளது.
இமாச்சலப் பிரதேசத்தின் பிலாஸ்பூர் மாவட்டத்தில் தொடர் மழை பெய்து வருகிறது. இந்தநிலையில் நேற்று மாலை பெய்த கனமழையால் திடீரென நிலச்சரிவு ஏற்பட்டது. அப்போது சென்றுக்கொண்டிருந்த தனியார் பேருந்து மீது பாறைகள் விழுந்தது. இதனால் மண்ணுக்குள் பேருந்து புதைந்தது. இதில் பயணித்த 18 பேர் பலியாகினர். பேருந்தில் 30 பேர் பயணித்த நிலையில் 18 பேர் சடலமாக மீட்கப்பட்டுள்ளனர். ஒரு குழந்தை உட்பட மூவர் படுகாயங்களுடன் மீட்கப்பட்டுள்ளனர். சிலர் காயங்களுடன் மீட்கப்பட்டு மருத்துவமனையில் அனுமதிக்கப்பட்டுள்ளனர். மீட்பு பணிகள் தொடர்ந்து நடைபெற்று வருவதால் பலி எண்ணிக்கை அதிகரிக்கக்கூடும் என்ற அச்சம் எழுந்துள்ளது.
இதுகுறித்து காவல்துறை அதிகாரிகள் கூறியதாவது, மாலை 6:30 மணியளவில் மரோட்டானில் இருந்து குமாரிவின் நோக்கிச் சென்று கொண்டிருந்த பேருந்து மீது நிலச்சரிவு ஏற்பட்டதால் விபத்து ஏற்பட்டதாக தெரிவித்தனர். மீட்பு மற்றும் நிவாரணப் பணிகள் சம்பவ இடத்தில் நடைபெற்று வருகின்றன. இந்த சம்பவம் குறித்து ஜனாதிபதி திரௌபதி முர்மு, பிரதமர் நரேந்திர மோடி, உள்துறை அமைச்சர் அமித் ஷா மற்றும் முதலமைச்சர் சுக்விந்தர் சிங் சுகு ஆகியோர் இரங்கல் தெரிவித்துள்ளனர். பாதிக்கப்பட்ட மக்களுக்கு இழப்பீடு வழங்குவதாகவும் பிரதமர் அலுவலகம் அறிவித்துள்ளது.
இந்த கடினமான நேரத்தில் விபத்தில் பாதிக்கப்பட்டவர்கள் மற்றும் அவர்களது குடும்பத்தினருடன் எனது எண்ணங்கள் உள்ளன. காயமடைந்தவர்கள் விரைவில் குணமடைய பிரார்த்திக்கிறேன்” என்று கூறியுள்ளார். மேலும், ‘இந்த விபத்தில் உயிரிழந்த ஒவ்வொருவரின் குடும்பத்தினருக்கும் பிரதமரின் தேசிய நிவாரண நிதியிலிருந்து (PMNRF) தலா ரூ.2 லட்சமும், காயமடைந்தவர்களுக்கு ரூ.50,000மும் கருணைத் தொகையாக வழங்கப்படும்’ என்று அவர் கூறினார்.
இந்த கொடூர விபத்து குறித்து ஜனாதிபதி திரௌபதி முர்முவும் தனது இரங்கலைத் தெரிவித்துள்ளார். இன்ஸ்டாகிராமில் ஒரு பதிவில், ஜனாதிபதி திரௌபதி முர்மு , “இமாச்சலப் பிரதேசத்தின் பிலாஸ்பூரில் ஏற்பட்ட நிலச்சரிவில் ஏற்பட்ட பேருந்து விபத்தில் பலர் உயிரிழந்த செய்தி மிகவும் வருத்தமளிக்கிறது. தங்கள் அன்புக்குரியவர்களை இழந்த குடும்பங்களுக்கு எனது இரங்கலைத் தெரிவித்துக் கொள்கிறேன், காயமடைந்தவர்கள் விரைவில் குணமடைய பிரார்த்திக்கிறேன்” என்று எழுதினார்.
பிலாஸ்பூர் நிலச்சரிவு குறித்து இன்ஸ்டாகிராமில் மத்திய உள்துறை அமைச்சர் அமித் ஷா வெளியிட்டுள்ள பதிவில், “இமாச்சலப் பிரதேசத்தின் பிலாஸ்பூரில் ஏற்பட்ட நிலச்சரிவால் ஏற்பட்ட பேருந்து விபத்து குறித்து நான் மிகவும் வருத்தமடைந்துள்ளேன். தேசிய பேரிடர் மீட்புப் படையினர் சம்பவ இடத்திற்கு விரைந்து மீட்புப் பணிகளில் ஈடுபட்டுள்ளனர். இந்த விபத்தில் தங்கள் அன்புக்குரியவர்களை இழந்தவர்களுக்கு எனது இரங்கலைத் தெரிவித்துக் கொள்கிறேன். காயமடைந்தவர்கள் விரைவில் குணமடையவும் பிரார்த்திக்கிறேன்” என்று தெரிவித்துள்ளார்.
சுமார் 18 பேர் உயிரிழந்த மற்றும் பலர் காயமடைந்த இந்த துயரமான பேருந்து விபத்து குறித்து முதலமைச்சர் தாக்கூர் சுக்விந்தர் சிங் சுகு ஆழ்ந்த வருத்தத்தையும் வேதனையையும் தெரிவித்தார். “பிலாஸ்பூர் மாவட்டத்தின் ஜந்துடா சட்டமன்றத் தொகுதியில் உள்ள பலுகாட் (பல்லு பாலம்) அருகே ஏற்பட்ட மிகப்பெரிய நிலச்சரிவு பற்றிய செய்தி என்னை மிகவும் உலுக்கியுள்ளது” என்று அவர் கூறினார்.
“ஒரு தனியார் பேருந்து இந்த பெரிய நிலச்சரிவில் சிக்கி 18 பேர் உயிரிழந்த சோகமான செய்தியை நாங்கள் பெற்றுள்ளோம், மேலும் பலர் இடிபாடுகளுக்குள் சிக்கியிருக்கலாம் என்று அஞ்சப்படுகிறது. மீட்புப் பணிகள் போர்க்கால அடிப்படையில் நடைபெற்று வருகின்றன. முழு இயந்திரங்களையும் பயன்படுத்த அதிகாரிகளுக்கு அறிவுறுத்தப்பட்டுள்ளது. உள்ளூர் நிர்வாகத்துடன் நான் தொடர்பில் இருக்கிறேன், மேலும் முழு மீட்புப் பணி குறித்தும் நிமிடத்திற்கு நிமிடம் புதுப்பிப்புகளைப் பெற்று வருகிறேன். இறந்தவர்களின் ஆன்மாக்களுக்கு கடவுள் சாந்தியையும், துக்கத்தில் இருக்கும் குடும்பங்களுக்கு பலத்தையும் அளிக்கட்டும். இந்த கடினமான நேரத்தில் பாதிக்கப்பட்ட அனைத்து குடும்பங்களுடனும் நான் நிற்கிறேன்” என்று அவர் கூறினார்.
Readmore: கரூர் செல்கிறார் விஜய்? எப்போது தெரியுமா? வெளியான முக்கிய தகவல்..
