காந்தி (1982) திரைப்படத்திற்காக அகாடமி விருதை வென்ற பிரபல பிரிட்டிஷ் ஒளிப்பதிவாளரும் ஆஸ்கர் விருதுபெற்றவருமான பில்லி வில்லியம்ஸ், 96 வயதில் காலமானார். பிரிட்டிஷ் சினிமாட்டோகிராஃபர் பத்திரிகை அவரது மரணத்தை உறுதிப்படுத்தியது, இருப்பினும் காரணம் இன்னும் வெளியிடப்படவில்லை. திரையில் பில்லி வில்லியம்ஸின் பாரம்பரியம் பாதி நூற்றாண்டைக் கடந்த ஒரு பெரும் பயணமாகும். பல்வேறு வகையான திரைப்படங்களில், ஒளி, உணர்வு மற்றும் கதையைக் கலைப்பொருளாக பின்னிப் பிணைக்கும் அவரது அற்புத திறமை, பல தலைமுறைகளை ஊக்குவித்துள்ளது.
வில்லியமின் ஆரம்பகால வாழ்க்கை: Mybigplunge அறிக்கையின்படி, பில்லி 1929 இல் லண்டனின் வால்தாம்ஸ்டோவில் பிறந்தார். போர்க்கால ஆவணப்படத் தயாரிப்பாளரான அவரது தந்தையால் வில்லியம்ஸ் திரைப்படத் தயாரிப்பில் அறிமுகப்படுத்தப்பட்டார். 14 வயதிற்குள், அவர் ஏற்கனவே தனது தந்தைக்கு உதவியாளராக பணியாற்றினார். இதையடுத்து, ஒளிப்பதிவின் தொழில்நுட்ப மற்றும் கதை சொல்லும் அம்சங்களைக் கற்றுக்கொண்டார்.
ராயல் விமானப்படையில் புகைப்படக் கலைஞராகப் பணியாற்றிய பிறகு, வில்லியம்ஸ் போக்குவரத்து அமைச்சகத்திற்காக ஆவணப்படங்களை எடுக்கத் தொடங்கினார், இது அவருக்கு திரைப்படங்களுக்கான கதவுகளைத் திறந்தது. அவரது திரைப்பயணத்தில் மிக முக்கியமான திருப்புமுனை 1965 ஆம் ஆண்டு வெளியான நகைச்சுவை திரைப்படமான San Ferry Ann மூலம் உருவானது. இதன் பின்னர், இயக்குநர் கென் ரசல் உடன் இணைந்து 1969 ஆம் ஆண்டில் உருவான Women in Love திரைப்படத்தில் பணியாற்றி, தனது திறமையை உலகளவில் அறிமுகப்படுத்தினார். இந்த படத்துக்காகவே அவருக்கு முதல் ஆஸ்கர் விருதுக்கு பரிந்துரைக்கப்பட்டார்.
காந்தி திரைப்பட பயணம்: பில்லி வில்லியம்ஸின் திரைப்பட வாழ்க்கையில் மிக முக்கியமான திருப்புப்புள்ளி “காந்தி” (1982) திரைப்படம் தான். ரிச்சர்ட் அட்டன்பரோ இயக்கிய இந்த வரலாற்றுச் சிறப்பு மிக்க படத்தில், அவர் ஒளிப்பதிவாளராக சிறப்பாக பணியாற்றினார். இந்தப் படத்தில் ஒளியையும், நிறங்களையும், பிரம்மாண்டக் காட்சிகளையும் மூலம் இந்தியாவின் சுதந்திரப் போராட்டத்தையும், மகாத்மா காந்தியின் உள்நிலை உணர்வுகளையும் ஆழமாகக் காண்பிக்க அவர் பெற்ற பரிணாமம், திரைப்பட உலகில் மிகுந்த பாராட்டைப் பெற்றது. இந்த படத்திற்காகவே அவர் தனது ஒரே ஆஸ்கார் விருதை வென்றார், இது அவரது வாழ்க்கை மற்றும் பணியின் உச்சக் கட்டமாகப் பார்க்கப்படுகிறது.
சினிமாவில் நீடித்த செல்வாக்கு: பில்லி வில்லியம்ஸ் தனது திரைப்பட வாழ்க்கையில் பல முக்கியமான படங்களுக்கு ஒளிப்பதிவாளராக பணியாற்றியுள்ளார். குறிப்பாக, The Exorcist (1973), Voyage of the Damned, மற்றும் The Wind and the Lion ஆகிய திரைப்படங்கள் இவரது திறமையை வெளிக்காட்டிய முக்கியமான படைப்புகள்.
அவர் பல முறை பிரிட்டிஷ் அகாடமி ஆஃப் ஃபிலிம் அண்ட் டெலிவிஷன் ஆர்ட்ஸ் (BAFTA) விருதுகளுக்கு பரிந்துரைக்கப்பட்டுள்ளார். இவற்றுடன், அவரது திரைப்படத்துறையில் செய்த பங்களிப்பை பாராட்டி பல வாழ்நாள் சாதனை விருதுகள் வழங்கப்பட்டுள்ளன. மேலும், 2009ஆம் ஆண்டில் அவர் “Officer of the Order of the British Empire (OBE)” எனும் பட்டம் வழங்கப்பட்டு, மன்னர் அரசு சார்பில் கவுரவிக்கப்பட்டார்.
பில்லி வில்லியம்ஸ் பல இளைய ஒளிப்பதிவாளர்களுக்கு வழிகாட்டியாகவும் இருந்தார், தனது கலை மீது கொண்ட பாசத்தையும், அனுபவங்களையும் அப்படியே அவர்களுக்கு கற்றுக்கொடுத்தார்.
