மேற்கு ஆசியாவில் 38 நாட்களாக நீடித்து வரும் போரை முடிவுக்கு கொண்டு வருவததற்காக, அமெரிக்காவுடன் போர்நிறுத்த ஒப்பந்தத்தை ஏற்படுத்த ஈரானை பேச்சுவார்த்தை மேசைக்கு கொண்டு வந்தது சீனாதான் என்று டொனால்ட் டிரம்ப் ஒப்புக்கொண்டுள்லார்…
போர்நிறுத்தத்தை எட்டுவதில் சீனா ஈடுபட்டதா என்ற செய்தியாளரின் கேள்விக்கு பதிலளித்த டிரம்ப், “ஆம் என்று தான் நினைக்கிறேன்” என்று பதிலளித்தார். இதன் மூலம், இந்த மோதலுக்கு மத்தியில் சீனா மீண்டும் ஒருமுறை விவாதப் பொருளாகியுள்ளது.
மேற்கு ஆசியாவில் உருவாகி வரும் புவிசார் அரசியல் சூழ்நிலையில் சீனாவின் பங்கு மற்றும் செயல்பாடுகள் குறித்து அதிகம் செய்திகள் வெளிவந்தபோதிலும், அந்நாட்டின் தலைமை தனது எதிர்வினைகள் அல்லது ஈடுபாடு குறித்து பகிரங்கமாக அதிகம் வெளியிடவில்லை.
அமெரிக்க-ஈரான் போர்நிறுத்தத்தில் சீனாவின் பங்கு
ஈரானின் மிகப்பெரிய வர்த்தகப் பங்காளியான சீனா, அமெரிக்க-ஈரான் போரை நிறுத்துவதிலும், இரு தரப்பினரையும் பேச்சுவார்த்தைக்கு ஒன்றிணைப்பதிலும் திரைக்குப் பின்னால் ஒரு நுட்பமான பங்கை ஆற்றியுள்ளதாக சர்வதேச ஊடகங்கள் தகவல் வெளியிட்டுள்ளன..
துருக்கி, எகிப்து மற்றும் பாகிஸ்தான் போன்ற மத்தியஸ்தத் தரப்பினருடன் பேச்சுவார்த்தைகளை அமைப்பதற்காகப் பணியாற்றியதன் மூலம், சீனா ஈரானை அமைதிப் பாதைக்கு மெதுவாக கொண்டு சென்றது..
மே மாத நடுப்பகுதியில் ஷி ஜின்பிங்குடன் பேச்சுவார்த்தை நடத்துவதற்காக டொனால்ட் டிரம்ப் சீனாவுக்குப் பயணம் செய்வதற்கு முன்பு, மோதல் தணிவதைக் காண்பதில் பெய்ஜிங்கிற்கு ஒரு தெளிவான உந்துதல் உள்ளது. நடந்து கொண்டிருக்கும் போரின் தேவைகளைக் காரணம் காட்டி, மார்ச் மாத இறுதியில் திட்டமிடப்பட்டிருந்த தனது பயணத்தை டிரம்ப் முன்னதாகவே ஒத்திவைத்திருந்தார்.
பேச்சுவார்த்தைகள் முன்னேறிக் கொண்டிருந்தபோது, சீன அதிகாரிகள் தங்கள் ஈரானிய அதிகாரிகளுடன் தொடர்பில் இருந்தனர். சீனா தனது பங்கை பகிரங்கமாக உறுதிப்படுத்தவில்லை என்றாலும், ஈரானில் நடக்கும் நிகழ்வுகளில் செல்வாக்கு செலுத்துவதற்காக பாகிஸ்தான், துருக்கி மற்றும் எகிப்து போன்ற இடைத்தரகர்கள் மூலம் பெய்ஜிங் செயல்பட்டு வருவதாக அதிகாரிகள் குறிப்பிட்டனர்.
இந்த நிகழ்வுகள், உலக விவகாரங்களில் ஒரு முக்கியப் பங்கை வகிப்பதற்கான சீனாவின் பரந்த முயற்சியைப் பிரதிபலிக்கின்றன. சீன வெளியுறவு அமைச்சகம் தனது ஈடுபாடு குறித்து அதிகாரப்பூர்வ அறிக்கை எதையும் வெளியிடவில்லை என்றாலும், மோதல் தொடங்கியதிலிருந்து பெய்ஜிங் “அமைதிக்காக அயராது உழைத்து வருகிறது” என்று வாஷிங்டனில் உள்ள சீனத் தூதரகம் முன்னதாகக் கூறியிருந்தது.
போர் நிறுத்தத்திற்குப் பிறகு என்ன நடக்கும்?
இந்தத் தற்காலிகப் போர் நிறுத்தம், ஏப்ரல் 10 அன்று இஸ்லாமாபாத்தில் நடைபெறும் தூதரகப் பேச்சுவார்த்தைகளுக்கு வழிவகுத்துள்ளது. அங்கு அமெரிக்காவும் ஈரானும் போர் நிறுத்த ஒப்பந்தத்தின் விதிமுறைகளை இறுதி செய்து, மோதலை முடிவுக்குக் கொண்டுவரும் நோக்கில் நகரக்கூடும் என்று எதிர்பார்க்கப்படுகிறது.
நேரடிப் பேச்சுவார்த்தைகள் குறித்த கலந்துரையாடல்கள் நடைபெற்று வருவதாக வெள்ளை மாளிகையின் பத்திரிகைச் செயலாளர் கரோலின் லீவிட் கூறினார், ஆனால் ஜனாதிபதியால் அதிகாரப்பூர்வமாக அறிவிக்கப்படும் வரை எதுவும் உறுதி செய்யப்படவில்லை என்றும் அவர் வலியுறுத்தினார்.
ஹார்முஸ் நீரிணை தற்போது கப்பல் போக்குவரத்திற்காகத் திறக்கப்படவுள்ளது. இரண்டு வார கால போர்நிறுத்தத்தின் போது, ஓமனுடன் ஒருங்கிணைந்து, ஹோர்முஸ் நீரிணை வழியாகச் செல்லும் கப்பல்களுக்கு ஈரான் கட்டணங்களை விதிக்கக்கூடும் என்றும், இக்கட்டணங்கள் மூலம் கிடைக்கும் வருவாய் மறுசீரமைப்புப் பணிகளுக்குப் பயன்படுத்தப்படலாம் என்றும் எதிர்பார்க்கப்படுகிறது. இந்நீரிணை வழியாக நடைபெறும் கப்பல் போக்குவரத்துகள், ஈரானிய இராணுவத்தால் ஒருங்கிணைந்த முறையில் நிர்வகிக்கப்படும்.
