வரவிருக்கும் ஐபிஎல் 2027 தொடருக்கு முன்னதாக, மும்பை இந்தியன்ஸ் அணியின் தலைமைப் பயிற்சியாளர் பதவியிலிருந்து மஹிலா ஜெயவர்த்தனே விலகியுள்ளார். அணியும் அவரும் பரஸ்பர உடன்பாட்டின் அடிப்படையில் தங்களது வழிகளைப் பிரித்துக் கொண்டுள்ளதாக அதிகாரப்பூர்வமாக அறிவிக்கப்பட்டுள்ளது.
மும்பை இந்தியன்ஸ் அணியுடன் சுமார் ஒரு தசாப்த கால நீண்ட நெடிய தொடர்பைக் கொண்டிருந்த ஜெயவர்த்தனேவின் இந்த திடீர் முடிவு, அணியின் அடுத்த கட்ட நகர்வுகள் குறித்த எதிர்பார்ப்பை ஏற்படுத்தியுள்ளது.
கடந்த ஐபிஎல் 2026 தொடரில் மும்பை இந்தியன்ஸ் அணியின் செயல்பாடு மிகவும் மோசமாக இருந்தது. லீக் சுற்றில் அந்த அணி ஒன்பதாவது இடத்தைப் பிடித்து பரிதாபமாக வெளியேறியது. இந்தத் தோல்விக்குப் பிறகு தற்போது இந்த முக்கிய முடிவு எடுக்கப்பட்டுள்ளது குறிப்பிடத்தக்கது.
கடந்த 2017 ஆம் ஆண்டு முதன்முதலாக மும்பை அணியின் தலைமைப் பயிற்சியாளராக நியமிக்கப்பட்ட ஜெயவர்த்தனே, பல்வேறு பொறுப்புகளில் சுமார் ஒரு தசாப்த காலம் (10 ஆண்டுகள்) அணியுடன் பயணித்துள்ளார். இவரது சிறப்பான பயிற்சியின் கீழ், மும்பை இந்தியன்ஸ் அணி 2017, 2019 மற்றும் 2020 ஆகிய ஆண்டுகளில் மூன்று முறை ஐபிஎல் கோப்பைகளைக் கைப்பற்றி மிரட்டியது.
அணியின் இந்த நீண்ட காலப் பயணம் குறித்துப் பேசியுள்ள உரிமையாளர் நீதா அம்பானி, மஹிலா ஜெயவர்த்தனேவின் சேவைகளைப் பாராட்டி நன்றி தெரிவித்துள்ளார். “மும்பை இந்தியன்ஸ் அணிக்கு மஹிலா செய்த பங்களிப்பு மிகவும் அளப்பரியது. அவரது அமைதியான தலைமைப் பண்பு, நேர்மை மற்றும் விளையாட்டின் மீதான பற்று ஆகியவை எங்களுக்கு எப்போதும் ஸ்பெஷலானவை” என்று அவர் கூறியுள்ளார்.
மேலும், “ஒட்டுமொத்த மும்பை இந்தியன்ஸ் குடும்பத்தின் சார்பாக, பல ஆண்டுகளாக அவர் வழங்கிய அசைக்க முடியாத அர்ப்பணிப்புக்கும் மகத்தான பங்களிப்புக்கும் எனது நன்றியைத் தெரிவித்துக் கொள்கிறேன். நாங்கள் பகிர்ந்து கொண்ட பயணத்தையும், உருவாக்கிய பொன்னான நினைவுகளையும் எப்போதுமே போற்றுவோம்” என்று நீதா அம்பானி நெகிழ்ச்சியுடன் குறிப்பிட்டுள்ளார்.
