ஈரானின் நாடாளுமன்ற சபாநாயகர் முகமது பாகர் காலிபாஃப் இந்த வாரம் அமெரிக்கா மீது கடுமையான விமர்சனங்களை முன் வைத்தார்.. அது ராஜதந்திரிகளின் அல்லது கேலிச்சித்திரக்காரர்களின் மொழியில் அல்ல, மாறாக கணிதத்தில் உள்ள ஒரு சூத்திரத்தைப் பயன்படுத்தி அவர் விமர்சித்துள்ளார்..
X தளத்தில் ஒரு பதிவில், ஈரான் மீதான அமெரிக்காவின் அழுத்தம் உலகளாவிய எண்ணெய் சந்தைகளில் ஒரு தொடர் விளைவைத் தூண்டக்கூடும் என்றும், அது எவ்வளவு கடுமையாக இருக்குமோ, அந்த அளவிற்கு அமெரிக்கர்கள் இன்றைய எரிபொருள் விலைகளை நினைத்து ஏங்குவார்கள் என்றும் காலிபாஃப் எச்சரித்தார்.
“தற்போதைய பெட்ரோல் விலை நிலவரத்தை அனுபவியுங்கள். ‘தடை’ என்று சொல்லப்படுவதால், விரைவில் நீங்கள் 4–5 டாலர் பெட்ரோல் விலையை நினைத்து ஏங்குவீர்கள்,” என்று அவர் எழுதினார்.
அதனுடன் அவர் ஒரு புள்ளிவிவர சூத்திரத்தையும் எழுதினார்: ΔO_BSOH > 0 ⇒ f(f(O)) > f(O). எனவே அதுகுறித்து பார்க்கலாம்..
தன் கருத்தை விளக்க காலிபாஃப் கணிதத்தை எவ்வாறு பயன்படுத்தினார்?
முகமது பாகர் காலிபாஃப், பல ஈரானியத் தலைவர்களைப் போலவே, முனைவர் பட்டம் பெற்றவர். அவர் தெஹ்ரானில் உள்ள தர்பியாத் மொடாரஸ் பல்கலைக்கழகத்தில் அரசியல் புவியியலில் முனைவர் பட்டம் பெற்றவர். மற்ற பதவிகளுடன், அவர் தெஹ்ரான் நகர மேயராகவும் (2005–2017) பணியாற்றியுள்ளார். அவர் பொறியியலும் படித்ததாக சில தகவல்கள் உள்ளன. அவர் சாலைகள், சரக்கு போக்குவரத்து, குழாய் வழிகள் மற்றும் ஹோர்முஸ் நீரிணை போன்ற கப்பல் வழித்தடங்களைக் கையாண்டுள்ளார். ஒரு புவிசார் அரசியல் பதற்றப் புள்ளியான இந்த நீரிணை, உலகளாவிய எண்ணெய் தளவாடப் போக்குவரத்தில் ஒரு முக்கியத் தடையாக மாறியுள்ளது. பாரசீக வளைகுடாவின் முகப்பில் ஈரான் மற்றும் ஓமானுக்கு இடையே உள்ள ஒரு குறுகிய நீர்வழிப்பாதையான இது, மிகவும் குறுகலான நிலையில் வெறும் 33 கிலோமீட்டர் அகலம் மட்டுமே கொண்டது.
வளைகுடாவிலிருந்து தெற்காசியா மற்றும் அதற்கு அப்பால் உள்ள பெருங்கடலை நோக்கிய ஒரே கடல்வழி வெளியேறும் பாதை இதுவாகும். இது முற்றுகையிடப்படாத பட்சத்தில், உலகின் மொத்த எண்ணெய் விநியோகத்தில் சுமார் 20% ஒவ்வொரு நாளும் இதன் வழியாகவே செல்கிறது. அமெரிக்கா மற்றும் இஸ்ரேலுடன் நடந்து வரும் போரில் ஒரு பேரம்பேசும் சக்தியாக ஈரான் இதன் மீது முற்றுகையிட்டுள்ளது.
கடந்த வாரம் பாகிஸ்தான் தலைநகர் இஸ்லாமாபாத்தில் அமைதிப் பேச்சுவார்த்தைகள் தோல்வியடைந்ததைத் தொடர்ந்து, அமெரிக்க அதிபர் டொனால்ட் டிரம்ப், அமெரிக்காவும் அந்த வழியை முற்றுகையிடும் என்று கூறினார். இதன் மூலம், ஈரான் சில கப்பல்களைத் தேர்ந்தெடுத்து அனுமதிக்காமல் தடுக்கப்பட்டது. அந்தக் கப்பல்களில் சிலவற்றிற்கு இஸ்லாமியக் குடியரசு 2 மில்லியன் டாலர் கட்டணம் வசூலிப்பதாகக் கூறப்படுகிறது.
சவூதி அரேபியா, ஈராக், குவைத், ஐக்கிய அரபு அமீரகம் மற்றும் கத்தார் ஆகிய நாடுகள் அனைத்தும் தங்களது எண்ணெயை ஹோர்முஸ் வழியாகவே அனுப்புகின்றன. மாற்று வழிகள் அவ்வளவு சிறப்பாகச் செயல்படுவதில்லை. இது ஏற்கனவே உலகளாவிய எண்ணெய் விநியோகத்தை அதலபாதாளத்தில் தள்ளியுள்ளது. விநியோகம் குறையும்போது ஏற்படுவது போலவே, விலைகள் கடுமையாக உயர்ந்துள்ளன.
காலிபாஃபின் சூத்திரம் என்ன?
பாகிஸ்தானின் தேசிய தொழிற்கல்வி மற்றும் தொழில்நுட்பப் பயிற்சி ஆணையத்தின் (NAVTTC) முன்னாள் தலைவரான பொருளாதார நிபுணர் ஜாவேத் ஹசன், X தளத்தில் இதை விளக்கினார். “BSOH = ஹார்முஸ் ஜலசந்தியின் முற்றுகை என்பதன் விளைவாக எண்ணெய் விலை மிகவும் மோசமாக இருக்கும் என்ற கருத்தை காலிபாஃப் கணிதரீதியாக முன்வைக்கிறார்,” என்று ஹசன் எழுதினார்.
அவரிடமிருந்து ஒரு குறிப்பைப் பெற்று, செயற்கை நுண்ணறிவு (AI) அடிப்படையிலான மாதிரிகளின் உதவியுடன், ΔO_BSOH > 0 ⇒ f(f(O)) > f(O) என்ற சூத்திரத்தில் உள்ள ஒவ்வொரு பகுதியும் எதைக் குறிக்கிறது என்பது இங்கே கொடுக்கப்பட்டுள்ளது.
இங்கு ‘O’ என்பது எண்ணெயின் தற்போதைய விலையாகும். உதாரணமாக, அமெரிக்கர்கள் ஒரு கேலன் பெட்ரோலுக்கு 4-5 டாலர் செலுத்துகிறார்கள்.
‘BSOH’ என்பது ஹார்முஸ் ஜலசந்தியின் முற்றுகையைக் குறிக்கிறது. முன்னால் ‘டெல்டா’ குறியீட்டுடன் கூடிய ‘ΔO_BSOH > 0’ என்பது, முற்றுகையானது எண்ணெய் விலைகளை உயரச் செய்கிறது என்பதை எளிமையாகக் குறிக்கிறது.
‘f(O)’ என்பது முதல்-வரிசை விளைவைக் குறிக்கிறது: இது உடனடியான மற்றும் நேரடியான பின்விளைவாகும். எனவே, எண்ணெய் டேங்கர்களால் ஹார்முஸ் ஜலசந்தி வழியாக நகர முடியாது; அதனால் விநியோகம் குறைகிறது; மற்றும் விலை கடுமையாக உயரும். இது கணிக்கக்கூடியது.
பின்னர் அவர் இரண்டாம்-வரிசை விளைவுகளைப் பற்றிப் பேச ‘f(f(O))’ என்பதைப் பயன்படுத்துகிறார். எண்ணெய் விலை கடுமையாக உயர்ந்தாலும், ஜலசந்தி முற்றுகையிடப்பட்டே இருக்கும்போது, கப்பல் நிறுவனங்கள் போர் மண்டலத்திற்குள் டேங்கர்களை அனுப்ப மறுக்கின்றன, அல்லது காப்பீட்டு பிரீமியங்கள் மிகவும் அதிகமாகி செலவுகள் மேலும் உயர்கின்றன. அந்தச் செலவு நுகர்வோர் மீது சுமத்தப்படுகிறது. எல்லா மட்டங்களிலும் செலவுகள் வெடித்துச் சிதறுகின்றன.
ஆரம்ப விலை அதிர்ச்சி இப்போது ஒரு பெருக்கி விளைவைக் கொண்டுள்ளது. ஒன்று மற்றொன்றைத் தூண்டுகிறது. கலிபாஃப், “வெள்ளை மாளிகைக்கு அருகிலுள்ள எரிவாயு நிலையங்களில்” உள்ள அமெரிக்க பெட்ரோல் பம்ப் விலைகளைக் காட்டும் ஒரு வரைபடத்தையும் பகிர்ந்துகொண்டார்.
சூயஸ் உதாரணம்
நெரிசல் புள்ளிகள் ஒரு சங்கிலித் தொடர் விளைவை ஏற்படுத்துவதற்கு இது போன்ற நிகழ்வுகள் முன்பும் நடந்துள்ளன.
2021-ல், ‘எவர் கிவன்’ என்ற ஒற்றை கொள்கலன் கப்பல் தரைதட்டி, சூயஸ் கால்வாயை வெறும் ஆறு நாட்களுக்குத் தடுத்தது. இதன் விளைவாக, வர்த்தகம் தாமதமானதால் ஒரு நாளைக்கு பில்லியன் கணக்கில் இழப்பு ஏற்பட்டது என்று அக்கால அறிக்கைகள் தெரிவித்தன. பல மாதங்களுக்கு விநியோகச் சங்கிலிகள் சீர்குலைந்தன, மேலும் கப்பல் போக்குவரத்துடன் வெளிப்படையாகத் தொடர்பில்லாத பொருட்களுக்கும் தட்டுப்பாடு ஏற்பட்டது — ஏனெனில் இவை அனைத்தும் ஒன்றோடொன்று தொடர்புடையவை.
ஹோர்முஸ் ஜலசந்தி, சூயஸ் கால்வாயை விட ஐந்து மடங்கு மூலோபாய ஆழத்தைக் கொண்டுள்ளது. இந்த முற்றுகை ஏற்கனவே ஆறு வாரங்களுக்கு மேல் நீடிக்கிறது, ஆனால் சூயஸ் கால்வாய் வெறும் ஆறு நாட்களுக்கு மட்டுமே முற்றுகையிடப்பட்டது.
பிறகு கடந்த வார இறுதியில் இஸ்லாமாபாத்தில் நடந்த அமைதிப் பேச்சுவார்த்தைகளில் காலிபாஃப் ஈரானின் தூதுக்குழுவிற்குத் தலைமை தாங்கினார். அங்கு, அமெரிக்கத் துணை ஜனாதிபதி ஜே.டி. வேன்ஸ் மற்றும் அவரது குழுவினருடன் 21 மணி நேரம் நடந்த பேச்சுவார்த்தை எந்தவொரு உடன்பாடும் எட்டப்படாமல் முடிவடைந்தன.
பேச்சுவார்த்தைகள் முறிந்த சில மணி நேரங்களிலேயே, ஹோர்முஸ் ஜலசந்தியை முற்றுகையிடத் தொடங்குமாறு அமெரிக்கக் கடற்படைக்கு ஜனாதிபதி டிரம்ப் உத்தரவிட்டார். காலிபாஃப் அதே நாளில் தனது சமன்பாட்டை வெளியிட்டார்.
ஜலசந்தியைக் கண்காணிக்க ஈரானை அனுமதிக்காமல், அதன் மூலம் பொருளாதார ரீதியாக நெருக்கடியை ஏற்படுத்த முடியும் என்பதே அமெரிக்க நிர்வாகத்தின் அடிப்படைக் கணிப்பாகும். இது அமெரிக்க நுகர்வோர் மற்றும் உலகப் பொருளாதாரத்தில் பின்விளைவுகளை ஏற்படுத்தும் என்பதே காலிபாஃபின் வாதமாகும்.
