2000-களின் தொடக்கத்தில் தொலைக்காட்சி வாயிலாகத் தமிழ் அல்லது தெலுங்குப் படங்களைப் பார்த்திருந்தால், ‘பொட்டு அம்மன்’ படத்தில் நடிகர் சுரேஷ் கிருஷ்ணாவின் தோற்றம் நிச்சயமாக உங்களை மிரட்டியிருக்கும். 2000ஆம் ஆண்டு வெளியான தமிழ் – தெலுங்கு இருமொழிப் படமான இதில் (தெலுங்கில் ‘துர்கா’ என்ற பெயரில் வெளியானது), அவர் அகோரி போன்ற தோற்றத்தில் மந்திரவாதி என்ற கொடூர வில்லன் கதாபாத்திரத்தில் நடித்திருந்தார். நீண்ட தலைமுடி, மிரட்டலான தோற்றம் மற்றும் அசாத்தியமான நடிப்பு மூலம், அந்தத் தலைமுறை ரசிகர்களுக்குப் பயத்தின் அடையாளமாக மாறினார் சுரேஷ் கிருஷ்ணா. தற்போது 2026ஆம் ஆண்டில் அவர் மீண்டும் வெளிச்சத்திற்கு வந்துள்ளார், ஆனால் இந்த முறை முற்றிலும் மாறுபட்ட ஒரு காரணத்திற்காக! ‘பெத்லகேம் குடும்ப யூனிட்’ (Bethlehem Kudumba Unit) படத்திற்குப் பிறகு, ஒரு காலத்தில் மிரட்டிய அதே வில்லன் தற்போது ரசிகர்களின் ஃபேவரைட் ஸ்டாராக மாறியுள்ளார். அதில் அவரது ‘பூமர்’ தனமான செயல்களும், மோகன்லாலின் ‘துடரும்’ படக் காட்சியை அவர் மீள் உருவாக்கம் செய்த விதமும் தமிழ் ரசிகர்களிடம் அவருக்கு மிகுந்த அன்பைப் பெற்றுத் தந்துள்ளது.
இயக்குநர் ஆர்.கே. செல்வமணி இயக்கத்தில் வெளியான ‘பொட்டு அம்மன்’ படம் மூலம் தமிழில் அறிமுகமானார் சுரேஷ் கிருஷ்ணா. இப்படத்தில் ரோஜா தனது 100வது படத்தில் இரட்டை வேடங்களில் நடித்திருந்ததுடன், சுவலட்சுமி, கே.ஆர். விஜயா மற்றும் வேணு ஆகியோரும் நடித்துள்ளனர். குறிப்பிடத்தக்க விஷயம் என்னவென்றால், இப்படத்தில் தனது கதாபாத்திரத்திற்கான தோற்றத்தை தாமாகவே முன்வந்து வடிவமைப்பதில் சுரேஷ் கிருஷ்ணா தீவிரமாக ஈடுபட்டாராம்.
இரண்டு தசாப்தங்களுக்கும் மேலான இடைவெளிக்குப் பிறகு, ‘பெத்லகேம் குடும்ப யூனிட்’ படத்தின் மூலமாக அவர் மீண்டும் தமிழ் ரசிகர்களின் கவனத்தை ஈர்த்துள்ளார். கிரீஷ் ஏ.டி. இயக்கத்தில் வெளியான இந்த மலையாளப் படத்தில், நிவின் பாலியின் கதாபாத்திரமான ஜஸ்டினின் நண்பராக பைஜூ சேவியர் என்ற வேடத்தில் அவர் நடித்துள்ளார்.
சமீபத்தில் ‘பொட்டு அம்மன்’ மற்றும் ‘பெத்லகேம் குடும்ப யூனிட்’ படங்களின் புகைப்படங்களைச் சமூக வலைத்தளத்தில் பகிர்ந்துகொண்ட சுரேஷ் கிருஷ்ணா, இரண்டு கதாபாத்திரங்களிலும் நடித்தது தான்தான் என்பதை உறுதிப்படுத்தினார். “தமிழ் நண்பர்களே, இவை இரண்டும் நான்தான், எந்தச் சந்தேகமும் வேண்டாம்” என்று குறிப்பிட்ட அவர், ரசிகர்கள் தனக்கு அளித்து வரும் அன்பிற்கு நன்றியையும் தெரிவித்தார்.
மணிரத்னம் பட வாய்ப்பை நூழிலையில் இழந்த சுரேஷ் கிருஷ்ணா:
‘பொட்டு அம்மன்’ மட்டுமே சுரேஷ் கிருஷ்ணாவின் ஒரே தமிழ்ப் படமாக இருந்தாலும், அதன் பிறகு அவர் புகழ்பெற்ற இயக்குநர் மணிரத்னத்தின் திட்டத்தில் இணையவிருந்த வாய்ப்பை நூழிலையில் தவறவிட்டார். மம்மூட்டியுடன் இணைந்து அவர் நடித்த ‘குட்டி ஸ்ராங்க்’ படத்திலுள்ள அவரது நடிப்பு மணிரத்னத்தின் கவனத்தை ஈர்த்தது. ‘சினிமா விகடன்’ பேட்டி ஒன்றில் இதைப் பற்றிப் பேசிய சுரேஷ் கிருஷ்ணா, ‘கடல்’ படத்திற்காக நடிகர் தேடிக்கொண்டிருந்தபோது சென்னை அலுவலகத்திற்கு மணிரத்னம் தன்னை அழைத்ததை நினைவுகூர்ந்தார்.
ஆனால், ‘குட்டி ஸ்ராங்க்’ படத்தில் பார்த்த அதே நடிகர் தானா என்பதை மணிரத்னத்தால் ஆரம்பத்தில் அடையாளம் காண முடியவில்லையாம். ஆனாலும் அவரது நடிப்பால் ஈர்க்கப்பட்ட இயக்குநர், மூன்று விதமான தோற்றங்களைக் கொண்ட ஒரு கதாபாத்திரத்திற்காக அவரை யோசித்திருக்கிறார். எனினும், அந்த வேடம் இறுதியில் அவருக்குக் கிடைக்கவில்லை. அந்த வாய்ப்பு கைகூடாமல் போனது குறித்து தனக்கு எந்த வருத்தமும் இல்லை என்றும் அவர் தெரிவித்தார்.
இன்று, எதிர்பாராத விதமாக அவரது திரையுலகப் பயணம் முழு வட்டம் அடித்து மீண்டும் ரசிகர்களைச் சென்றடைந்துள்ளது குறிப்பிடத்தக்கது.
