உத்தரப்பிரதேசத்தில் ஓடும் ரயிலில் இளம்பெண் ஒருவர் டிக்கெட் பரிசோதகரால் பாலியல் பலாத்காரம் செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. கடந்த 16ஆம் தேதி டேராடூன்-சுபேதர்கஞ்ச் விரைவு ரயில் பொதுப் பெட்டியில் 33 வயது பெண் ஒருவர் சந்தௌசியில் இருந்து பிரயாக்ராஜ் அருகே உள்ள சுபேதர்கஞ்ச் நோக்கிப் பயணித்துக் கொண்டிருந்துள்ளார். அப்போது அங்கு வந்த டிக்கெட் பரிசோதகர் கே.என்.சிங் அந்த பெண்ணுக்கு ஏ.சி பெட்டியில் இருக்கை ஏற்பாடு செய்து கொடுக்க, அவரும் அதில் பயணித்து வந்துள்ளார். இதையடுத்து, இரவு 10 மணியளவில் அந்த ரயில் உத்தரப்பிரதேசத்தில் அலிகார் அருகே சென்று கொண்டிருந்தபோது டிக்கெட் பரிசோதகர் கே.என்.சிங், மற்றொருவருடன் சேர்ந்து அந்த பெண்ணை வலுக்கட்டாயமாக கூட்டுப் பாலியல் பலாத்காரம் செய்துள்ளார்.
இந்த சம்பவத்தை தொடர்ந்து அந்த பெண் சந்தாசி ரயில் நிலைய போலீசாரிடம் புகார் அளித்துள்ளார். புகாரின் அடிப்படையில், கே.என். சிங்கை கைது செய்த காவல்துறையினர், இந்த சம்பவத்தில் ஈடுபட்ட மற்றொரு நபர் தப்பித்துச் சென்றுவிட்டதாகவும், அவரைத் தேடி வருவதாகவும் தெரிவித்துள்ளனர். ஓடும் ரயிலில் இளம்பெண்ணை பாலியல் பலாத்காரம் செய்த டிக்கெட் பரிசோதகரை இந்திய ரயில்வே பணியிடை நீக்கம் செய்துள்ளதாகத் தெரிவித்துள்ளது.
