இரண்டு நாள் பயணமாக வெள்ளிக்கிழமை (ஜூன் 20) ஜம்மு-காஷ்மீரில் உள்ள உதம்பூருக்கு பாதுகாப்பு அமைச்சர் ராஜ்நாத் சிங் சென்றடைந்தார். சர்வதேச யோகா தினமான இன்று சனிக்கிழமை (ஜூன் 21) ஏற்பாடு செய்யப்பட்டுள்ள நிகழ்ச்சியில் ராஜ்நாத் சிங் பங்கேற்று, உதம்பூர் கண்டோன்மென்ட்டில் உள்ள ஆயுதப்படை வீரர்களுடன் கலந்துரையாடவுள்ளார்.
வெள்ளிக்கிழமை (ஜூன் 20) உதம்பூரில் உள்ள வடக்கு கட்டளை தலைமையகத்தில் ராணுவ வீரர்களிடையே உரையாற்றிய அவர், புதிய இந்தியா உறுதியானது என்பதற்கும், இனி பயங்கரவாதத்திற்கு இரையாகாது என்பதற்கும் ஆபரேஷன் சிந்தூர் சான்றாகும். அது வலிமை மற்றும் மூலோபாயத்துடன் பதிலளிக்கும்” என்று அவர் கூறினார்.
“இந்தியா இனி பயங்கரவாதத்தை பொறுத்துக்கொள்ளாது, அதன் ஒற்றுமைக்கும் ஒருமைப்பாட்டிற்கும் பாதிப்பு ஏற்பட்டால், அது தகுந்த பதிலடி கொடுக்கும். ஆபரேஷன் சிந்தூர் இன்னும் முடிவடையவில்லை. இது ஒரு இடைநிறுத்தம் மட்டுமே. இதை நான் என் அண்டை நாட்டிற்குச் சொல்ல விரும்புகிறேன்” என்று அவர் கூறினார்.
“பயங்கரவாதத்தை நோக்கிய இந்தியாவின் கொள்கையில் ஏற்பட்ட மாற்றம், நாட்டின் வீரர்களின் இணையற்ற வீரம் மற்றும் அர்ப்பணிப்பின் விளைவாகும்” என்று ராஜ்நாத் சிங் கூறினார். மேலும், பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் (POK) பயங்கரவாத உள்கட்டமைப்பை அழிப்பதில் ஆயுதப்படைகள் மற்றும் உளவுத்துறை அமைப்புகளின் துல்லியம், ஒருங்கிணைப்பு மற்றும் துணிச்சலை அவர் பாராட்டினார். இந்த நிகழ்வில், ராணுவத் தளபதி ஜெனரல் உபேந்திர திவேதி, வடக்கு கட்டளைத் தளபதி லெப்டினன்ட் ஜெனரல் பிரதீக் சர்மா மற்றும் மூத்த ராணுவ அதிகாரிகளும் அவருடன் இருந்தனர்.
சிந்தூர் நடவடிக்கை வெறும் இராணுவ நடவடிக்கை மட்டுமல்ல, எல்லையைத் தாண்டிய பயங்கரவாதிகளுக்கும் அவர்களை ஆதரிப்பவர்களுக்கும் ஒரு எச்சரிக்கை என்றும் பாதுகாப்பு அமைச்சர் விவரித்தார் . வீரர்களின் உயிர்கள் துணிச்சலும் தியாகமும் நிறைந்தவை என்று விவரித்த அவர், தாய்நாட்டிற்கு தங்கள் கடமையைச் செய்யும்போது ஆயுதப்படைகள் செய்யும் சேவைகளுக்கு தேசம் எப்போதும் கடமைப்பட்டிருக்கும் என்றார்.
மேலும் சர்வதேச யோகா தினத்தை முன்னிட்டு ஆயுதப்படைகளால் நடத்தப்பட்ட ‘பதகானா’ என்ற மதிய உணவின்போது பேசிய, பாதுகாப்பு அமைச்சர் ராஜ்நாத் சிங், வீரர்கள் உடல் மற்றும் மன நலனில் கவனம் செலுத்த வேண்டும் என்றும், வாழ்க்கையில் வலிமை மற்றும் ஆரோக்கியத்தின் முக்கியத்துவத்தை அடிக்கோடிட்டுக் காட்டினார்.
“நீங்கள் வலுவாக இருந்தால், நமது எல்லைகள் வலுவாக இருக்கும். எல்லைகள் வலுவாக இருந்தால், இந்தியாவும் வலுவாக இருக்கும்” என்று சிங் கூறினார். இந்த நிகழ்ச்சியின் ஒரு பகுதியாக ஒரு கலாச்சார நிகழ்ச்சியும் ஏற்பாடு செய்யப்பட்டது.
Readmore: இசைக்கு மயங்காதோர் உலகில் எவரும் இல்லை!. இன்று உலக இசை தினம்!
