கன்னியாகுமரி மாவட்டம் மத்தூர் ஓட்டலிவிளை பகுதியில் தனியாருக்குச் சொந்தமான சமூக நலக்கூடம் உள்ளது. இங்கு நேற்று மாலை நேரத்தில் விருந்து நடந்தது. அங்கு சாப்பிட்டவர்கள் கை கழுவ சென்றனர்.
இந்த பார்ட்டிக்கு வந்திருந்த சுஜிஜாவும் சாப்பிட்டுவிட்டு கை கழுவ சென்ற நிலையில் அந்த இடத்தின் அருகே நின்று கொண்டிருந்த போது திடீரென தரை இடிந்து விழுந்தது. பள்ளத்தில் விழுந்தவரின் தலையில் சிமென்ட் அடுக்குகள் விழுந்தன.
இந்நிலையில் சுஜிஜாவை காப்பாற்ற முயன்ற இருவரும் திடீரென பள்ளத்தில் விழுந்தனர். இதுபற்றி தகவல் கிடைத்ததும் குலசேகரம் போலீசார் விரைந்து வந்து 3 பேரையும் மீட்டனர். ஆனால் சுஜிஜா உயிர் இழந்தார்.
பின்னர் அந்த தனியார் சமூக நலக்கூடத்தின் கைகழுவும் பகுதியில் கூடத்தில் கழிவுகளை சேகரிக்க செப்டிக் டேங்க் அமைக்கப்பட்டது தெரியவந்தது. சாப்பிட்டுவிட்டு அவ்வழியாக செல்பவர்கள் செப்டிக் டேங்க் மேலே நின்று கைகளை கழுவ வேண்டும்.
கன்னியாகுமரி மாவட்டத்தில் கடந்த சில நாட்களாக பெய்து வரும் கனமழையால் கழிவுநீர் தொட்டி பகுதியில் மண் அரிப்பு ஏற்பட்டுள்ளது. இதனால் தரை இடிந்து விழுந்தது தெரியவந்துள்ளது.
