கனடாவில் விமானப் பயிற்சியின் போது ஏற்பட்ட கோர விபத்தில் தமிழ்நாட்டைச் சேர்ந்த மனோஜ் சிவகுமார் மற்றும் புதுச்சேரியைச் சேர்ந்த ஸ்ரீசரண் திருஞானசம்பந்தம் ஆகிய இரண்டு மாணவர்கள் பரிதாபமாக உயிரிழந்தனர்.
இச்சம்பவத்திற்கு ஆழ்ந்த இரங்கலைத் தெரிவித்துள்ள வான்கூவரில் உள்ள இந்தியத் தூதரகம் (Consulate General of India, Vancouver), உயிரிழந்த மாணவர்களின் உடல்களை இந்தியாவிற்கு கொண்டு வருவதற்கான அனைத்து உதவிகளையும் தூதரகம் செய்யும் எனத் தெரிவித்துள்ளது.
விபத்து நடந்தது எப்படி? விபத்து தொடர்பான கூடுதல் தகவல்கள் உடனடியாக வெளியாகாத போதிலும், ‘ஹார்வ்ஸ் ஏர்’ (Harv’s Air) என்ற விமானப் பயிற்சிப் பள்ளிக்குச் சொந்தமான ‘செஸ்னா 172’ (Cessna 172) ரக விமானம் விபத்துக்குள்ளானதாகக் கனடா ஊடகங்கள் செய்தி வெளியிட்டுள்ளன. வர்த்தக ரீதியிலான விமானி உரிமம் (Commercial Pilot License) பெறுவதற்காக, தேவையான பறக்கும் நேரத்தை (Flight Hours) பூர்த்தி செய்ய இரு மாணவர்களும் இந்த இரவுக் காலப் பயணத்தை மேற்கொண்டுள்ளனர்.
ரெஜினாவில் (Regina) இருந்து மேனிடோபாவில் உள்ள ஸ்டீன்பேக் நோக்கிய பயணத்தின் போது, சஸ்காட்செவனில் உள்ள கிஸ்பே (Kisbey) பகுதிக்கு அருகே இந்த விமானம் விபத்துக்குள்ளானது. நிர்ணயிக்கப்பட்ட நேரத்திற்குள் விமானம் சேர வேண்டிய இடத்தை அடையாததால் தேடுதல் வேட்டை தொடங்கப்பட்டது. மீட்புக் குழுவினர் வெள்ளிக்கிழமை மாலை விமானத்தின் பாகங்களைக் கண்டறிந்த நிலையில், அதற்குள் இருந்த இரண்டு மாணவர்களும் சம்பவ இடத்திலேயே உயிரிழந்தது உறுதி செய்யப்பட்டது.
மத்திய அரசின் தூதரக உதவிகள் வெளிநாடுகளில் வாழும் மற்றும் படிக்கும் இந்தியர்களின் பாதுகாப்பை உறுதி செய்யவும், அவசர காலத்தில் உதவிகளை வழங்கவும் இந்திய வெளியுறவு அமைச்சகம் (MEA) 24 மணி நேரமும் செயல்படும் அவசர உதவி எண்களையும் சிறப்பு மையங்களையும் இயக்கி வருகிறது. அந்த வகையில், உயிரிழந்த மாணவர்களின் குடும்பத்தினருக்குத் தேவையான அனைத்து ஆவணச் செயல்பாடுகள் மற்றும் தூதரக உதவிகள் விரைவாகச் செய்யப்பட்டு வருகின்றன.
