சென்னை அயனாவரம் பங்காரு தெருவை சேர்ந்தவர் மாரீஸ்வரன்(30) இவர் நேற்று முன்தினம் அதிகாலை 1 மணி அளவில் வீட்டில் உறங்கிக் கொண்டிருந்த போது ஆட்டோவில் வந்த ஐந்து பேர் மாரீஸ்வரன் வீட்டுக்குள் நுழைந்து மாரீஸ்வரனை கத்தியை காட்டி மிரட்டி இருக்கின்றனர். அதன் பிறகு அவரையும், அவரது நண்பர்களையும் சரமாரியாக தாக்கி விட்டு அவர்களிடம் இருந்த பணம் மற்றும் 7 செல்போன்களை பறித்துக் கொண்டு ஆட்டோவில் தப்பிச் சென்றனர்.
இது தொடர்பான புகாரின் பேரில் திருமங்கலம் காவல்துறையினர் வழக்கு பதிவு செய்து விசாரணை நடத்தினர். வீடு புகுந்து தாக்குதல் நடத்தியதுடன் பணப்பறிப்பில் ஈடுபட்டது பெரும்பாக்கம் எழில் நகரை சேர்ந்த விஜய பிரபு (26) என்பவர் தான் என தெரியவந்தது.
தலைமறைவாக இருந்த அவரை கடந்த 26ம் தேதி காவல்துறையினர் கைதுசெய்தனர். அவரிடமிருந்து 4 செல்ஃபோன்கள், ஒரு ஆட்டோ மற்றும் ஒரு கத்தி உள்ளிட்டவை பறிமுதல் செய்யப்பட்டனர்.
மேலும் அவரிடம் நடத்தப்பட்ட விசாரணையில் கைது செய்யப்பட்ட விஜய் பிரபு ஆட்டோ ஓட்டுவதும், அவர் தன்னுடைய நண்பர்களான கல்லறை ஜான், விஜய் பாபு மற்றும் மேலும் இருவருடன் சேர்ந்து வீடு புகுந்து கொள்ளையில் ஈடுபட்டு வந்ததும் தெரிய வந்ததாக காவல்துறையினர் தரப்பில் தெரிவிக்கப்படுகிறது. தலைமுறைவாக இருக்கின்ற கல்லறை ஜான் உட்பட 4️ பேரை காவல்துறையினர் தனிப்படை அமைத்து தீவிரமாக தேடி வருகின்றனர்.
