மும்பையில் உள்ள MLA விருந்தினர் மாளிகையில் ஒரு கேன்டீன் ஊழியரை சிவசேனா (ஷிண்டே பிரிவு) சட்டமன்ற உறுப்பினர் தாக்கியதன் மூலம் புதிய சர்ச்சையில் சிக்கி உள்ளார்.. புல்தானா தொகுதி MLA சஞ்சய் கெய்க்வாட், விருந்தினர் மாளிகை கேன்டீனில் வழங்கப்படும் உணவின் தரத்தில் அதிருப்தி அடைந்ததாக கூறப்படுகிறது.. இதனால் அந்த கேண்டீன் ஊழியரை அவர் தாக்கியதாகவும் கூறப்படுகிறது.
அவருக்கு வழங்கப்பட்ட உணவின் தரம் மோசமாக இருந்ததாகவும், அவர் ஊழியர்களை கடுமையாக சாடியதாகவும், கேன்டீன் ஊழியர்களில் ஒருவரைத் தாக்கியதாகவும் கூறப்படுகிறது. கேன்டீன் ஊழியர்களைத் தாக்கியது குறித்து கேட்டபோது, உணவு மிக மோசமான நிலையில் இருப்பதாகவும், இதேபோன்ற சேவைக்காக மீண்டும் கேன்டீன் ஊழியர்களைத் தாக்குவேன் என்றும் கெய்க்வாட் கூறினார்.
“நான் எந்தத் தவறும் செய்யவில்லை. உணவின் தரம் மிக மோசமான நிலையில் இருந்தது. நான் அவரை மீண்டும் அடிப்பேன், எனக்கு எந்த வருத்தமும் இல்லை” என்று கெய்க்வாட் கூறினார்.
மகாராஷ்டிரா சட்டமன்றத்தின் மழைக்காலக் கூட்டத்தொடரின் போது, பல சட்டமன்ற உறுப்பினர்கள் தங்கியுள்ள அரசு நடத்தும் விருந்தினர் மாளிகையில் இந்த சம்பவம் நடந்ததாகக் கூறப்படுகிறது. கேன்டீன் ஊழியர்களுக்கும் சிவசேனா எம்எல்ஏவுக்கும் இடையிலான மோதல் வேகமாக அதிகரித்ததாகவும், இது உடல் ரீதியான வன்முறைக்கு வழிவகுத்தது என்று நேரில் பார்த்தவர்கள் தெரிவித்தனர்.. இதுவரை, இந்த சம்பவம் குறித்து சஞ்சய் கெய்க்வாட் அல்லது சிவசேனா (ஷிண்டே பிரிவு) தரப்பிலிருந்து எந்த அதிகாரப்பூர்வ அறிக்கையும் வரவில்லை.
மாநிலத்தில் வசிப்பவர்களிடையே மராத்தி மொழியைப் பயன்படுத்துவதை ஊக்குவிக்கும் எம்என்எஸ்-இன் ஆவேசமான பிரச்சாரம் தொடர்பாக எம்என்எஸ் மற்றும் பாஜக தலைமையிலான மகாயுதி அரசாங்கத்திற்கு இடையே நடந்து வரும் அரசியல் மோதல்களுக்கு மத்தியில் இந்த சம்பவம் நிகழ்ந்துள்ளது.
முன்னதாக மராத்தி பேச மறுத்த வட இந்திய கடைக்காரரை எம்என்எஸ் தொழிலாளர்கள் தாக்கிய சம்பவங்கள் அதிர்ச்சியை ஏற்படுத்தியது.. இது தொடர்பான வீடியோக்கள் வெளியான நிலையில் ராஜ் தாக்கரே தலைமையிலான கட்சி கடுமையான விமர்சனங்களுக்கு உள்ளானது. இதற்கு பதிலளிக்கும் விதமாக, ராஜ் தாக்கரே தனது ஊழியர்களை “அவர்களை அடிக்கவும், வீடியோக்களை பதிவு செய்ய வேண்டாம்” என்று அறிவுறுத்தினார்.
இந்த நிகழ்வு மகாராஷ்டிரா மட்டுமின்றி, தேசிய அளவிலும் ஒரு சூடான அரசியல் விவாதத்தை தூண்டி உள்ளது. பல்வேறு கட்சிகளின் தலைவர்கள் வன்முறையைக் கண்டித்து, பொறுப்புக்கூறலுக்கு அழைப்பு விடுத்தனர்.
இதற்கிடையில், மராத்தி மொழிக்கு ஏற்படும் எந்தவொரு அவமானத்திற்கும் கட்சி கடுமையான எதிர்வினையை எதிர்கொள்ளும் என்று கூறி, எம்என்எஸ் தனது நிலைப்பாட்டை ஆதரித்தது என்பது குறிப்பிடத்தக்கது.
