சூரியன் மிகவும் சுறுசுறுப்பாக செயற்படத் தொடங்கியுள்ளது என்றும் இதனால் வரும் வாரங்களில் பூமியை கடுமையான சூரிய புயல்கள் தாக்கக்கூடும் என்றும் நாசா எச்சரித்துள்ளது. இதனால் தகவல்தொடர்பு குறைபாடுகள் மட்டுமல்ல, மனித உடல்நலத்துக்கும் பாதிப்பு ஏற்படலாம் என புதிய ஆய்வு எச்சரித்துள்ளது.
பிரேசிலில் உள்ள தேசிய விண்வெளி ஆராய்ச்சி நிறுவனத்தின் (INPE) ஆராய்ச்சியாளர்கள், பூமியைச் சுற்றியுள்ள கண்ணுக்குத் தெரியாத பூமியின் மின்காந்தப் புலமாக செயல்படும் கவசத்தை சூரிய புயல்கள் தாக்கும்போது ஏற்படும் வினோதமான விளைவைக் கண்டறிந்துள்ளனர். ஆய்வாளர்கள் வெளியிட்ட தகவலின்படி, பூமியின் மின்காந்தப் புலத்தை சூரிய புயல்கள் தாக்கும் நாட்களில் பெண்களுக்கு மாரடைப்பு ஏற்படும் அபாயம் மூன்று மடங்கு அதிகம் என்று எச்சரித்துள்ளனர்.
அதாவது, மின்காந்தப் புலமாக செயல்படும் கவசம் பூமியை பாதுகாக்கிறது. இந்தநிலையில் சூரிய புயல்களால் இந்தக் கவசம் பலவீனமாகும் பட்சத்தில், அது மனிதர்களின் உடல்நலத்திற்கு தீங்காக அமைந்திடக்கூடும் என்று விஞ்ஞானிகள் எச்சரிக்கின்றனர். சூரிய புயல்கள் இந்தக் கவசத்தைத் தாக்கும் போது, இதயம் பாதிக்கப்படுகிறது, ஏனெனில் உடலின் இயற்கையான தாளங்கள் மற்றும் அழுத்த அமைப்புகள் பாதிக்கப்படுவதாக புதிய ஆய்வு தெரிவிக்கிறது.
சூரிய துகள்கள் பெரிய உடல்நலப் பிரச்சினைகளை ஏற்படுத்தும்: சூரிய புயல்கள் காந்தப்புலத்தில் மிகக் குறைந்த அதிர்வெண் சமிக்ஞைகளை மாற்றுகின்றன என்று ஆய்வு ஆசிரியர்கள் கூறுகின்றனர். இது மூளை அலைகளை மோசமாகப் பாதிக்கும் மற்றும் உடலின் சரியான செயல்பாட்டிற்கு அவசியமான மெலடோனின் மற்றும் செரோடோனின் போன்ற ஹார்மோன்களின் சமநிலையை சீர்குலைக்கும். இவை அனைத்தும் இரத்த அழுத்தம், இதய செயல்பாடு மற்றும் பிற செயல்முறைகளை ஒழுங்குபடுத்துவதற்கு இன்றியமையாதவை.
31 வயதுக்கு மேற்பட்ட பெண்கள் புவி காந்த மாற்றங்களுக்கு ஆளாக நேரிடும் என்று விஞ்ஞானிகள் குழு கண்டறிந்துள்ளது. 31 முதல் 60 வயதுக்குட்பட்டவர்கள் காந்த இடையூறுகள் உள்ள நாட்களில் மூன்று மடங்கு மாரடைப்புக்கு ஆளாக நேரிடும். மற்ற பக்க விளைவுகளில் அதிகப்படியான புற ஊதா (UV) கதிர்வீச்சு காரணமாக தோல் புற்றுநோய் ஏற்படும் அபாயமும் அடங்கும். ஆஸ்துமா உள்ளவர்கள் சூரிய புயல்களின் போது சுவாசப் பிரச்சினைகளையும் சந்திக்க நேரிடும்.
சூரியன் பெரும்பாலும் மிகப்பெரிய எரிப்புகளையும், கொரோனல் மாஸ் எஜெக்ஷன்கள் (CMEs) எனப்படும் சூடான பொருட்களை வெளியேற்றுகிறது. இதில் சார்ஜ் செய்யப்பட்ட துகள்கள் அடங்கும். இவை விண்வெளியில் பல திசைகளில் செல்லும் போது, சில பூமிக்குக் கூட வரும் வாய்ப்பு உண்டு. அவை பூமியின் மின்காந்தக் களத்தை தாக்கும்போது, அழகிய ஒளிர்வுகள் (auroras) தோன்றும். அதே சமயத்தில், செயற்கைக்கோள் தொடர்புகளில் கசிவு போன்ற தீமைகள் ஏற்படும். இந்த ஆராய்ச்சி “Nature Communications Medicine” என்ற அறிவியல் பத்திரிகையில் வெளியிடப்பட்டுள்ளது.
Readmore: Flash : 9 பேர் பலி.. சென்னை அனல் மின் நிலையத்தில் பயங்கர விபத்து..
