புத்தாண்டு என்றாலே அது மது ஆட்டம் பாட்டம் என தொடங்கும் கலாச்சாரம் கடந்த சில வருடங்களாக நமது தமிழ் கலாச்சாரத்தில் தொற்றிக்கொண்டுள்ளது. புத்தாண்டின் போது நாம் வசிக்கும் தெருவில் உள்ள நண்டு சிண்டு வண்டு எல்லாம் கூட, நள்ளிரவு 12 மணிக்கு குடித்துவிட்டு குத்தாட்டம் போடும் பழக்கமும் சமீபகாலமாக பின்பற்றப்படுகிறது. குடித்துவிட்டு வாகனம் ஓட்டி கீழே விழுந்து காயம் அடைவோருக்காகவே புத்தாண்டின் போது அரசு மருத்துவமனையில் சிறப்பு வார்டு ஆண்டுதோறும் தமிழக அரசால் ஏற்பாடு செய்யப்பட்டு வருகிறது. மாமல்லபுரம் மற்றும் அண்டை மாநிலமான புதுச்சேரி உள்ளிட்ட இடங்களில் தற்போதே ஹோட்டல் அறைகள் எல்லாம் புக் செய்யப்பட்டுவிட்டன.
இந்த ஏற்பாடெல்லாம் ஒரு புறம் நடந்துகொண்டிருக்க, வரும் புத்தாண்டிற்கு ரூ.400 கோடி வரையில் மது விற்பனை செய்ய டாஸ்மாக் இலக்கு நிர்ணயிக்கப்பட்டுள்ளதாக தகவல் வெளியாகியுள்ளது. தமிழகத்தில் 5000க்கும் அதிகமான டாஸ்மாக் கடைகள் செயல்பட்டு வருகின்றன. சாதாரண நாட்களில் விற்பனையை விட பண்டிகைக் காலங்களில் மதுவிற்பனை இருமடங்கு அதிகரிக்கும் அதனை கணக்கில் கொண்டு இந்த டார்கெட் ஃபிக்ஸ் செய்யப்பட்டுள்ளதாக கூறப்படுகிறது. கடந்த பொங்கல் தினத்தில் தொடர்ச்சியாக விடுமுறை என்பதால் 3 நாட்களில் ரூ.675 கோடி அளவுக்கு மது விற்பனையாகி இருந்தது. தற்போது ஆங்கில புத்தாண்டையொட்டி சனி, ஞாயிறு 2 நாட்கள் விடுமுறை உள்ளது. வார இறுதி நாட்களில் புத்தாண்டு தினம் வருவதால் அதையொட்டி 2 நாட்கள் மதுவிற்பனை களைகட்டும் என்று எதிர்பார்க்கப்படுகிறது.
