குழந்தையின் அழுகையை வைத்து சந்தேகப்பட்ட ஆட்டோ ஓட்டுநரின் சாமர்த்தியம், தமிழ்நாட்டில் செயல்பட்டு வந்ததாகக் கண்டறியப்பட்ட குழந்தைகள் கடத்தல் கும்பலை போலீசாரிடம் சிக்க வைத்துள்ளது. ஒரே குழந்தையை மீட்பதில் தொடங்கிய விசாரணை, இறுதியில் 11 குழந்தைகள் மீட்கப்படும் அளவுக்கு சென்றுள்ளது.
சென்னையைச் சேர்ந்த டி. ஜோசப் ஆட்டோ ஓட்டி வருகிறார். மருத்துவமனை அருகே பெண் ஒருவர் தனது கையில் ஒன்றரை வயது குழந்தையுடன் ஆட்டோவில் ஏறியுள்ளார். பயணம் தொடங்கிய சிறிது நேரத்திலேயே குழந்தை தொடர்ந்து அழுதுகொண்டே இருந்துள்ளது.
குழந்தையின் அழுகையைப் பார்த்த ஜோசப்புக்கு, அந்தப் பெண்ணின் நடவடிக்கையில் சந்தேகம் ஏற்பட்டுள்ளது. குழந்தை நீண்ட நேரமாக கதறி அழுதபோதும், அந்தப் பெண் எந்த பதற்றமும் இல்லாமல் இருந்துள்ளார். இதனால் குழந்தைக்கும் அந்தப் பெண்ணுக்கும் உள்ள தொடர்பு குறித்து ஜோசப்புக்கு சந்தேகம் வலுத்துள்ளது.
இதையடுத்து நேராக மருத்துவமனை அருகே இருந்த பாதுகாப்புப் பணியில் ஈடுபட்டிருந்த போலீசாரிடம் ஆட்டோவை நிறுத்திய ஜோசப், நடந்ததை தெரிவித்துள்ளார். போலீசார் அந்தப் பெண்ணிடம் விசாரணை நடத்தியதுடன், குழந்தை தொடர்பான தகவல்களையும் சேகரித்தனர்.
அதே நேரத்தில், தனது குழந்தையை காணவில்லை என உண்மையான தாய் மருத்துவமனை வளாகத்தில் பதற்றத்துடன் தேடிக்கொண்டிருந்தார். போலீசாரின் விசாரணையில், ஆட்டோவில் அழைத்துச் செல்லப்பட்ட குழந்தை கடத்தப்பட்டிருப்பது தெரியவந்தது.
இதையடுத்து விசாரணையை விரிவுபடுத்திய போலீசார், குழந்தைகள் கடத்தல் மற்றும் சட்டவிரோத தத்தெடுப்பு தொடர்பான கும்பலின் செயல்பாடுகளை கண்டறிந்தனர். தமிழ்நாட்டின் பல்வேறு பகுதிகளுடன் தொடர்புடையதாகக் கண்டறியப்பட்ட இந்த வழக்கில், ஒன்றரை வயது குழந்தை உள்ளிட்ட 11 குழந்தைகள் மீட்கப்பட்டனர்.
மீட்கப்பட்ட குழந்தைகள் அவர்களது பெற்றோரிடம் ஒப்படைக்கப்பட்டனர். ஒரு குழந்தையின் நடவடிக்கையை வைத்து சந்தேகமடைந்து உடனடியாக போலீசாருக்கு தகவல் அளித்த ஜோசப்பின் விழிப்புணர்வு, இந்த வழக்கில் முக்கிய திருப்பமாக அமைந்தது.
Also Read: “லண்டன் செல்ல வேண்டாம்.. கோவை, மதுரைக்கு போங்க!”.. விஜய்க்கு அண்ணாமலை சொன்ன அட்வைஸ்!
