செயற்கை நுண்ணறிவு பாதுகாப்பு குறித்த விவாதங்கள் சூடுபிடித்துள்ள நிலையில், மனிதக் கட்டுப்பாட்டையும் சமுதாயத்திற்கு அது அளிக்கும் நன்மைகளையும் மையமாகக் கொண்டே அதிநவீன AI வளர்ச்சி இருக்க வேண்டும் என்று மைக்ரோசாஃப்ட் நிறுவனத்தின் தலைமைச் செயல் அதிகாரி சத்யா நாதெல்லா வலியுறுத்தியுள்ளார்.
அதிநவீன AI முகவர்கள் மூன்றாம் தரப்பு அமைப்புகளை ஹேக் செய்வது மற்றும் அங்கீகரிக்கப்படாத வகையில் வலைத்தளங்களுக்குள் நுழைவது போன்ற சமீபத்திய சம்பவங்களால் கவலைகள் அதிகரித்து வருகின்றன.
எல்லை மீறும் AI வளர்ச்சியின் வேகத்தைக் குறைக்க வேண்டும் என்று ஆந்த்ரோபிக் நிறுவனத்தின் தலைமைச் செயல் அதிகாரி டேரியோ அமோடி கேட்டுக் கொண்டிருந்தார். AI-ன் திறன்கள் மிக வேகமாக வளர்ந்து வருவதாகவும், அந்த வேகத்திற்கு ஏற்ப பாதுகாப்பு நடவடிக்கைகளால் ஈடுகொடுக்க முடியாமல் போகலாம் என்றும் அவர் வாதிட்டிருந்தார். சக்திவாய்ந்த AI அமைப்புகளை மதிப்பீடு செய்வதற்கான வழிமுறைகளை உருவாக்குவது, நிறுவனங்களுக்கு இடையே ஒத்துழைப்பை ஊக்குவிப்பது மற்றும் இது தொடர்பாக பரந்த சர்வதேச ஒருங்கிணைப்பை ஏற்படுத்துவது போன்றவற்றை அவரது திட்டம் மையமாகக் கொண்டுள்ளது.
மேலும், ஓபன்ஏஐ (OpenAI) தலைமைச் செயல் அதிகாரி சாம் ஆல்ட்மேன், கூகுள் டீப்மைண்ட் இணை நிறுவனர் டெமிஸ் ஹசாபிஸ், எக்ஸ்ஏஐ (xAI) தலைமைச் செயல் அதிகாரி எலான் மஸ்க் உள்ளிட்ட பல முக்கிய தொழில்நுட்பத் தலைவர்களும் இத்தகைய முன்மொழிவுகளுக்கு ஆதரவு தெரிவித்துள்ளனர்.
இந்தநிலையில் ஞாயிற்றுக்கிழமை எக்ஸ் தளத்தில் பதிவிட்ட மைக்ரோசாஃப்ட் நிறுவனத்தின் தலைமைச் செயல் அதிகாரி சத்யா நாதெல்லா, AI தொழில்நுட்பம் மனிதகுலத்திற்குப் பயனளிக்கும் வகையிலும், மனிதக் கட்டுப்பாட்டை மீறிச் செல்லாத வகையிலும் அதன் இலக்கு இருக்க வேண்டும் என்று தெரிவித்தார். “நாம் உருவாக்கும் AI மனிதகுலத்திற்கு உதவவில்லை என்றால் மற்றும் அது மனிதக் கட்டுப்பாட்டின் கீழ் இல்லை என்றால், அந்த அதிநவீன AI-ஐத் பின்தொடர்வதிலும் எந்த அர்த்தமும் இல்லை என்பதே அடிப்படைக் கொள்கையாக இருக்க வேண்டும்” என்று அவர் குறிப்பிட்டார்.
AI-ன் பலன்கள் ஒரு சில நிறுவனங்கள் அல்லது நாடுகளிடம் மட்டுமே குவிந்திருக்கக் கூடாது என்றும் சத்யா நாதெல்லா வாதிட்டார். திறந்த மூல (Open-source) மற்றும் மூடப்பட்ட (Closed) என இரண்டு வகையான AI மாதிரிகளும் (Models) இணைந்து வளர்வதற்கான சூழலை AI வளர்ச்சி அனுமதிக்க வேண்டும் என்றார்.
“நாடுகள், சமூகங்கள் மற்றும் நிறுவனங்கள் முழுவதும் AI-ன் பலன்கள் பரவலாகக் கிடைக்கும் வகையில் நாம் அதை விரைவுபடுத்த வேண்டும். அதற்கு மூடப்பட்ட மற்றும் திறந்த மூல மாதிரிகள் இரண்டும் செழித்து வளரக்கூடிய ஒரு சூழல் அவசியமாகும்” என்று தெரிவித்தார்.
மேலும், நிறுவனங்கள் ஒரு குறிப்பிட்ட AI வழங்குநரை முழுமையாக நம்பியிராமல், தங்களது சொந்த அறிவு மற்றும் தகவல்கள் மீது முழுமையான கட்டுப்பாட்டைக் கொண்டிருக்க வேண்டும் என்றும் நாதெல்லா வலியுறுத்தினார்.
“நிறுவனங்களைப் பொறுத்தவரை, தங்களது தனித்துவமான மற்றும் மறைமுகமான அறிவின் மீது முழுமையான கட்டுப்பாட்டைப் பராமரிப்பது மிகவும் அவசியமாகும். எந்தவொரு மாடல் வழங்குநரையும் சாராமல், ஒவ்வொரு நிறுவனமும் தனது சொந்த தொடர் கற்றல் அமைப்பை உருவாக்கிக்கொள்ளவும், தங்களின் கட்டுப்பாட்டில் உள்ள மாடல்களில் சொந்த அறிவைப் புகுத்தவும் திறன் பெற்றிருக்க வேண்டும்” என்று நாதெல்லா வலியுறுத்தினார்.
AI அமைப்புகள் மேலும் சக்திவாய்ந்ததாக மாறுவதற்கு முன்பாக, அவற்றை மிகவும் பாதுகாப்பானதாக மாற்றுவதற்கான ஆராய்ச்சி மற்றும் நடவடிக்கைகளுக்கும் மைக்ரோசாஃப்ட் தலைமை அதிகாரி ஆதரவு தெரிவித்தார்.
“எனவே, இந்தச் சூழலில் சீரமைப்பு இலக்கை அடைவதற்குத் தேவையான ஆராய்ச்சி, கவனம் மற்றும் நிதானமான வேகம் ஆகியவற்றை நாங்கள் வரவேற்கிறோம். ‘உள்ளமைக்கப்பட்ட மதிப்பீட்டாளர்கள்’ போன்ற யோசனைகளையும், வெறும் பேச்சோடு நின்றுவிடாமல் இவற்றைச் செயல்படுத்தும் வழிமுறைகளை உருவாக்கும் முயற்சிகளையும் நாங்கள் வரவேற்கிறோம்” என்றார்.
மேம்பட்ட AI மீதான கட்டுப்பாடு ஒரு சில நிறுவனங்களின் கைகளில் மட்டுமே இருக்கக் கூடாது என்று சத்யா நாதெல்லா மீண்டும் ஒருமுறை சுட்டிக்காட்டினார். “இதன் முக்கிய அம்சம் என்னவென்றால், இது ஒருசில அமைப்புகளால் மட்டுமே கட்டுப்படுத்தப்படக்கூடாது; மாறாக கல்வியாளர்கள் உட்பட சுற்றுச்சூழல் அமைப்பு, நாடுகள் மற்றும் பல்வேறு துறைகளின் பரந்த பிரதிநிதித்துவத்தைக் கொண்டிருக்க வேண்டும்” என்றார்.
இறுதியாக, மைக்ரோசாஃப்ட் நிறுவனத்தின் AI அணுகுமுறை குறித்துக் குறிப்பிடுகையில், “AI தொழில்நுட்பத்தின் ஒவ்வொரு அடுக்கிலும் பரந்த அணுகுமுறையும் தேர்வும் இருப்பது, கற்றல் முறைகள் மற்றும் மாடல்கள் மீது நிறுவனங்களுக்குக் கட்டுப்பாடு இருப்பது, மேலும் எங்களது முதல் தரப்பு MAI மாடல்களுக்கு அடிப்படையாக விளங்கும் ‘நடத்தை விதிகள்’ (Code of Conduct) ஆகியவையே நாங்கள் பின்பற்றும் அணுகுமுறையாகும். இவை பொதுமக்களின் ஆலோசனைகளுக்காக வெளியிடப்படும்” என்று சத்யா நாதெல்லா தெரிவித்தார்.
