அரசு துறையில் இயங்கும் அனைத்து பெட்ரோல், டீசல் வாகனங்களை எலக்ட்ரிக் வாகனங்களாக மாற்ற ஹிமாச்சல பிரதேச அரசு முடிவு செய்துள்ளது..
ஹிமாச்சல பிரதேசத்தில் அதிகரித்து வரும் சுற்றுலாப் பயணிகளின் எண்ணிக்கை மற்றும் கார் வெளியேற்ற வாயுக்கள் உயர் இமயமலை சுற்றுச்சூழல் அமைப்புகளின் சுற்றுச்சூழல் அமைப்புக்கு தீங்கு விளைவிக்கின்றன என்று விஞ்ஞானிகள் தெரிவித்துள்ளனர்.. இதனால் பனிப்பாறைகள் வேகமாக உருகி வருகின்றன.. இந்நிலையில் ஹிமாச்சலப் பிரதேச மாநில அரசு, மின் வாகனங்களை ஊக்குவிப்பதன் மூலம் போக்குவரத்து மாசுபாட்டைக் குறைக்க நடவடிக்கை எடுத்துள்ளது.. அரசுத்துறையில் இயங்கும் பெட்ரோல் மற்றும் டீசல் அனைத்தையும் எலக்ட்ரிக் வாகனங்களுக்கு மாற்ற அம்மாநில போக்குவரத்துத்துறை முடிவு செய்துள்ளது..
நாட்டிலேயே முதல் மாநிலமாக ஹிமாச்சல பிரதேச அரசு இந்த திட்டத்தை அறிமுகம் செய்துள்ளது.. இந்த திட்டத்தின்படி, அனைத்து அரசுத் துறைகளின் பெட்ரோல் டீசல் வாகனங்களும் ஒரு வருடத்திற்குள் மின்சார வாகனமாக மாற்றப்படும்.. ஹிமாச்சல் சாலைப் போக்குவரத்துக் கழகத்தின் (HRTC) மொத்தம் 300 இ-பஸ்கள் சேர்க்கப்படும், இதற்காக 400 கோடி ரூபாய் ஒதுக்கப்பட்டுள்ளது என்று முதல்வர் சுக்ஜிந்தர் சுகு தெரிவித்துள்ளார்.. 2025 ஆம் ஆண்டிற்குள் அம்மாநில போக்குவரத்துக் கழகம் முழு இ-பேருந்துகளையும் பெற இலக்கு நிர்ணயிக்கப்பட்டுள்ளது.
பேருந்துகள் தொலைதூர கிராமங்களை நகர்ப்புறங்களுடன் இணைப்பதால் மாநிலத்திற்கும் அதன் பொருளாதாரத்திற்கும் முக்கியமானதாக இருக்கும் என்று எதிர்பார்க்கப்படுகிறது.. ஹிமாச்சல மாநில போக்குவரத்து கழகத்தில் 3,500 க்கும் மேற்பட்ட பேருந்துகள் இயங்கி வருகின்றன.. எனினும் பெட்ரோல், டீசல் விலை உயர்வு காரணமாக போக்குவரத்து கழகம் நஷ்டத்தை சந்தித்து வருகிறது. எலெக்ட்ரிக் வாகனங்கள், போக்குவரத்து கழகத்தின் தினசரி செலவான ரூ.1.5 கோடியை வெகுவாக குறைக்கும் என்று அதிகாரிகள் தெரிவித்துள்ளனர்…
2025 ஆம் ஆண்டுக்குள் பசுமை எரிசக்தி மாநிலமாக மாறுவதற்கு முன்னேறி வருவதாகவும், இலக்கை அடைய இ-மொபைலிட்டி முக்கியப் பங்காற்றும் என்றும் அம்மாநில முதலமைச்சர் தெரிவித்தார். இந்தியா-யுகே ஒப்பந்தத்தின் கீழ் சிம்லா நகரில் நடத்தப்பட்ட கணக்கெடுப்பின் உள்ளீடுகள் அதை ஸ்மார்ட் சிட்டியாக உருவாக்க உதவும் என்றார்.
சிம்லா, பட்டி, தர்மசாலா ஆகிய இடங்களில் குறைந்த மாசு வெளியேற்ற மண்டலங்களை உருவாக்குவதுடன், அனைத்து சுற்றுலாத் தலங்களிலும் இ-பஸ்கள், ஆட்டோ ரிக்ஷாக்கள் மற்றும் இ-கேப்கள் போன்ற எலக்ட்ரிக் வாகங்களை களை மட்டுமே அனுமதிக்கும் வகையில் புதிய திட்டம் செயல்படுத்தப்பட உள்ளது..
அம்மாநிலத்தின் மின்சார வாகனக் கொள்கையானது 2030 ஆம் ஆண்டிற்குள் 100 சதவிகிதம் மின்சார வாகனங்களுக்கு மாறுவதை இலக்காகக் கொண்டுள்ளது. மேலும், சுற்றுச்சூழலைக் காப்பாற்றுவது, எலக்ட்ரிக் வாகனங்களுக்கான தேவையை விரைவுபடுத்துவது, நிலையான போக்குவரத்து முறையை மேம்படுத்துவது மற்றும் எலக்ட்ரிக் வாகனங்களுக்கு பொது-தனியார் சார்ஜிங் உள்கட்டமைப்பை உருவாக்குவது ஆகியவை கொள்கையின் நோக்கம் என்று அரசு அதிகாரிகள் கூறுகிறார்கள்.
ஹோட்டல்கள், ஷாப்பிங் மால்கள் போன்ற வணிகக் கட்டிடங்களில் சார்ஜிங் இடங்கள் அமைக்க ஏற்பாடு செய்யப்படும்.. ஹிமாச்சல பிரதேச மோட்டார் வாகன வரிச் சட்டத்தின் கீழ் அனைத்து மின்சார வாகனங்களுக்கும் சாலை வரி செலுத்துவதில் இருந்து விலக்கு அளிக்கப்பட்டுள்ளது. வணிக மின் வாகனங்களுக்கும் அனுமதி தேவைப்படுவதில் இருந்து விலக்கு அளிக்கப்பட்டுள்ளது என்பது குறிப்பிடத்தக்கது.
