மெட்டா நிறுவனத்தின் கீழ் இயங்கும் வாட்ஸ்அப் செயலி, உலகெங்கிலும் உள்ள மில்லியன் கணக்கான மக்களின் அன்றாட வாழ்வில் ஒரு தவிர்க்க முடியாத அங்கமாக மாறிவிட்டது. பள்ளிப் பாடங்கள் முதல் அலுவலகப் பணிகள் வரை அனைத்திற்கும் வாட்ஸ்அப் பயன்படுத்தப்படும் நிலையில், பயனர்களின் வசதிக்காகப் பல்வேறு புதிய அம்சங்களை மெட்டா அறிமுகப்படுத்தி வருகிறது. அந்த வகையில், நீண்ட காலமாகக் காத்திருந்த குறுஞ்செய்திகளை ஸ்கெடியூல் (Message Schedule) செய்யும் வசதியை தற்போது வாட்ஸ்அப் நிறுவனம் சோதனை செய்து வருகிறது. இந்த வசதி பயன்பாட்டிற்கு வரும்போது, பயனர்கள் குறிப்பிட்ட நேரத்திற்கு தகவல்களைத் திட்டமிட்டு அனுப்பி வைக்க முடியும்.
தற்போதைய வேகமான உலகில், நள்ளிரவில் பிறந்தநாள் வாழ்த்துகள் கூறுவதற்கோ அல்லது அதிகாலையில் அலுவலகத் தகவல்களைப் பகிரவோ இந்த ‘ஸ்கெடியூல்’ அம்சம் ஒரு வரப்பிரசாதமாக அமையும். நீங்கள் அனுப்ப விரும்பும் தகவலை தட்டச்சு செய்து, அதற்கான நாள் மற்றும் நேரத்தைத் தேர்ந்தெடுத்துவிட்டால், குறிப்பிட்ட அந்தத் தருணத்தில் உங்களுடைய தலையீடு இன்றியே மெசேஜ் தானாக சென்றுவிடும். இதன் மூலம், முக்கியமான விஷயங்களை மறக்காமல் சரியான நேரத்தில் பகிர முடியும்.
வாட்ஸ்அப் அறிமுகப்படுத்தவுள்ள இந்த அம்சத்தில் மெசேஜ்களை திட்டமிடுவது மட்டுமின்றி, அவற்றை நிர்வகிப்பதற்கும் கூடுதல் வசதிகள் வழங்கப்பட உள்ளன. நீங்கள் எத்தனை மெசேஜ்களை ஸ்கெடியூல் செய்துள்ளீர்கள் என்பதை திரையிலேயே பார்த்துத் தெரிந்துகொள்ளலாம். மிக முக்கியமாக, ஸ்கெடியூல் செய்யப்பட்ட மெசேஜ் அந்த நபருக்கு அனுப்பப்படுவதற்கு முன்பாக, அதில் ஏதேனும் திருத்தங்கள் செய்யவோ அல்லது அந்த மெசேஜையே முற்றிலுமாக நீக்கவோ பயனர்களுக்கு அதிகாரம் வழங்கப்பட்டுள்ளது. இவ்வாறு நீக்கப்படும் தகவல்கள் குறித்து எதிர்முனையில் இருப்பவருக்கு எந்தவிதத் தகவலும் தெரியாது என்பது கூடுதல் சிறப்பம்சமாகும்.
தற்போது பீட்டா சோதனையில் உள்ள இந்த வசதி, தனிநபர் உரையாடல்கள் மற்றும் குழு உரையாடல்கள் என இரண்டு இடங்களிலும் அறிமுகம் செய்யப்பட உள்ளது. முதற்கட்ட சோதனைகள் முடிவடைந்தவுடன், அனைத்து ஆண்ட்ராய்டு மற்றும் ஐஓஎஸ் பயனர்களுக்கும் இந்த அப்டேட் கிடைக்கும் என எதிர்பார்க்கப்படுகிறது. தொழில்நுட்பப் போட்டியில் டெலிகிராம் போன்ற செயலிகளுக்கு இணையாக வாட்ஸ்அப் கொண்டு வரும் இந்த மாற்றம், அதன் பயன்பாட்டாளர்களின் அனுபவத்தை அடுத்த கட்டத்திற்கு இட்டுச் செல்லும் என்பதில் ஐயமில்லை.
