எப்போதும் மிகவும் நம்பிக்கையுடனும், சாமர்த்தியமாகவும் பேசும் ஒரு ஆண், தனக்குப் பிடித்தமான ஒரு பெண் அருகில் வரும்போது திடீரென பேச திணறுவதையோ அல்லது வார்த்தைகளை தேடுவதையோ பார்த்திருக்கிறீர்களா? அவர் சாதாரணமான உரையாடலின் போதே அளவுக்கு அதிகமாக சிந்திப்பது, தன்னைத் தானே சுயபரிசோதனை செய்துகொள்வது அல்லது தான் மற்றவர்களின் பார்வைக்கு எப்படி தெரிகிறோம் என்பதில் அதிக கவனம் செலுத்துவது போன்ற மாற்றங்களை வெளிப்படுத்துவார். இது சாதாரண நரம்புத் தளர்ச்சி அல்லது பதற்றம் மட்டுமல்லாமல், இதற்குப் பின்னால் ஒரு சுவாரஸ்யமான உளவியல் காரணம் இருப்பதாக ஆய்வுகள் கூறுகின்றன.
2009-ஆம் ஆண்டு ‘ஜர்னல் ஆஃப் எக்ஸ்பெரிமெண்டல் சோஷியல் சைக்காலஜி’யில் வெளியிடப்பட்ட ஆய்வில், எதிர் பாலினத்தைச் சேர்ந்தவர்களிடம் பேசுவது மனிதர்களின் அறிவாற்றல் திறனைத் தற்காலிகமாக பாதிக்கிறதா என்பது குறித்து ஆய்வு செய்யப்பட்டது.
ஜோகன் சி. கரேமன்ஸ் (Johan C. Karremans) தலைமையிலான ஆராய்ச்சியாளர்கள் மேற்கொண்ட இரண்டு பரிசோதனைகளில், ஆண்களுக்குப் பிடித்தமான ஒரு பெண்ணுடன் பேசிய பிறகு அவர்களின் அறிவாற்றல் சார்ந்த செயல்திறன் சற்று குறைவது கண்டறியப்பட்டது. ஆனால், பெண்களிடம் இந்த தாக்கம் எந்த வகையிலும் காணப்படவில்லை என்பது குறிப்பிடத்தக்கது.
மேலும், அந்தப் பெண் மிகவும் கவர்ச்சிகரமானவராக தோன்றும் போதும், தன்மீது நல்ல அபிப்பிராயத்தை ஏற்படுத்த வேண்டும் என்ற ஆர்வம் ஆண்களுக்கு அதிகரிக்கும் போதும் இந்தத் தாக்கம் இன்னும் அதிகமாக இருப்பது தெரியவந்துள்ளது.
இதற்கான முக்கியக் காரணம், மற்றவர்கள் மத்தியில் நல்ல அபிப்பிராயத்தை உருவாக்க வேண்டும் என்ற எண்ணம் ஏற்படுத்தும் உளவியல் அழுத்தமே ஆகும். உளவியலாளர்கள் இதனை ‘இம்பிரஷன் மேனேஜ்மென்ட்’ (Impression Management) என்று அழைக்கின்றனர். அதாவது, மற்றவர்கள் தன்னைப் பற்றி என்ன நினைப்பார்கள் என்பதைத் தாங்களே தீர்மானித்து, அதற்கு ஏற்ப தங்களது பாவனைகளையும் வார்த்தைகளையும் மாற்றிக் கொள்ள முயல்வது.
இயல்பாகப் பேசுவதைக் கடந்து, தாங்கள் பேசும் வார்த்தைகள் புத்திசாலித்தனமாக இருக்கிறதா, உடல் மொழி சரியா இருக்கிறதா என மூளை ஒரே நேரத்தில் பல வேலைகளைச் செய்ய முயலும்போது, அறிவாற்றல் ஆற்றல் திசைதிருப்பப்படுகிறது. இதனால் மற்ற பணிகளில் தற்காலிக சுணக்கம் ஏற்படுகிறது.
சந்திப்புக்கு முன்பே தொடங்கும் மன அழுத்தம்:
2012-ல் ‘ஆர்கைவ்ஸ் ஆஃப் செக்ஸ்வல் பிஹேவியர்’ இதழில் வெளியிடப்பட்ட மற்றொரு தொடர் ஆய்வில், ஒரு பெண்ணை சந்திக்கப் போவதை முன்கூட்டியே நினைத்துப் பார்ப்பது கூட ஆண்களின் அறிவாற்றல் திறனை பாதிக்கக்கூடும் என்று கண்டறியப்பட்டது. இதன் மூலம், ஒரு வார்த்தைகூட பேசுவதற்கு முன்பே, அந்தச் சந்திப்பின் எதிர்பார்ப்பு ஆண்களின் மூளையின் செயல்திறனை ஆக்கிரமித்துக் கொள்ளக்கூடும் என்பது தெளிவாகிறது.
எனவே, அடுத்த முறை உங்களுக்கு தெரிந்த நம்பிக்கையான ஒருவர் தனக்குப் பிடித்தமான பெண்ணின் அருகில் விசித்திரமாக நடந்து கொண்டால், அதற்கு வெறும் பதற்றம் மட்டும் காரணமல்ல; அவர் மீது நல்ல அபிப்பிராயத்தை ஏற்படுத்த வேண்டும் என்ற ஆழ்மன விருப்பமே காரணம் என்பதைப் புரிந்து கொள்ளலாம்.
