வங்கிக் கணக்கில் எதிர்பாராத விதமாகப் பணம் வரவு வைக்கப்பட்டால், அதைத் திருப்பி அனுப்புவதற்கு முன்பு ஒருமுறைக்கு இருமுறை யோசிக்க வேண்டும். ஏனெனில், இதையே பயன்படுத்தி வாடிக்கையாளர்களிடம் இருந்து அதிக தொகையை மோசடியாகப் பறிக்கும் புதிய உத்தி குறித்து பாரத ஸ்டேட் வங்கி (SBI) எச்சரிக்கை விடுத்துள்ளது.
‘ஜம்ப்டு டெபாசிட்’ (Jumped Deposit) எனப்படும் இந்த மோசடியில், வங்கிக் கணக்கில் தவறுதலாகப் பணம் அனுப்பிவிட்டதாகக் கூறி மர்ம நபர்கள் வாடிக்கையாளர்களைத் தொடர்புகொள்கின்றனர். பணத்தை உடனடியாகத் திருப்பித் தருமாறு வற்புறுத்துவதுடன், அவசரத்தையும் உணர்ச்சிப்பூர்வமான அழுத்தத்தையும் ஏற்படுத்தி அவர்களைச் செயல்பட வைக்கின்றனர்.
முதலில், மோசடி செய்பவர்கள் அறிமுகமில்லாத ஒருவரின் வங்கிக் கணக்கிற்கு சிறிய தொகையை அனுப்புகின்றனர். பின்னர், தவறுதலாகப் பணம் அனுப்பிவிட்டதாகக் கூறி அதைத் திருப்பி அனுப்புமாறு கேட்கின்றனர். இதன்மூலம் கணக்கு வைத்திருப்பவரின் நம்பிக்கையைப் பெற முயற்சிக்கின்றனர்.
அதன்பிறகு, பணத்தைத் திருப்பி அனுப்புவதற்கான வழிமுறை என்ற பெயரில், அதிக தொகைக்கான யுபிஐ (UPI) பணப்பரிவர்த்தனை கோரிக்கையை ஏற்குமாறு வற்புறுத்துகின்றனர். வாடிக்கையாளர் அதன் விவரங்களைச் சரிபார்க்காமல் ஒப்புதல் அளித்தால், அவருடைய கணக்கிலிருந்து பெரிய தொகை மோசடியாளர்களுக்குச் சென்றுவிடும் அபாயம் உள்ளது. எனவே, தெரியாத நபர்களிடமிருந்து வரும் பணப்பரிவர்த்தனை தொடர்பான அழைப்புகள் மற்றும் யுபிஐ கோரிக்கைகளைக் கவனமாகக் கையாள வேண்டும் என எஸ்பிஐ அறிவுறுத்தியுள்ளது.
வங்கிக் கணக்கில் தெரியாத நபரிடமிருந்து பணம் வந்தால், அந்த நபர் அனுப்பும் இணைப்புகள் அல்லது அவர் கூறும் வழிமுறைகளைப் பின்பற்றக் கூடாது. பணம் வரவு வைக்கப்பட்டுள்ளதா என்பதை வங்கியின் அதிகாரப்பூர்வ செயலி அல்லது பிற அதிகாரப்பூர்வ வழிகள் மூலம் சரிபார்க்க வேண்டும். பணத்தைத் திருப்பி அனுப்ப வேண்டியிருந்தாலும், வங்கியைத் தொடர்புகொண்டு உரிய நடைமுறையைப் பின்பற்றுவது பாதுகாப்பானது.
சந்தேகத்திற்குரிய தொலைபேசி எண்களைத் தடை செய்வதுடன், இதுபோன்ற சம்பவங்கள் குறித்து உடனடியாக வங்கியிடம் புகார் அளிக்கவும் எஸ்பிஐ கேட்டுக்கொண்டுள்ளது. அவசரமாகச் செயல்பட வைக்கும் உணர்ச்சிப்பூர்வமான பேச்சுகளுக்கும், உறுதிப்படுத்தப்படாத யுபிஐ கோரிக்கைகளுக்கும் அடிபணிய வேண்டாம் என்றும் எச்சரித்துள்ளது.
1600 என்ற எண்ணில் தொடங்கும் அழைப்புகள் குறித்து எஸ்பிஐ கூறியது என்ன?
வங்கிச் சேவை தொடர்பான அழைப்புகளுக்கு 1600 என்ற எண்ணில் தொடங்கும் எண்களைப் பயன்படுத்துவது குறித்தும் எஸ்பிஐ தனது அறிவுறுத்தலில் குறிப்பிட்டுள்ளது. இருப்பினும், அழைப்பின் உண்மைத்தன்மையையும் அதன் நோக்கத்தையும் உறுதிப்படுத்தாமல் தனிப்பட்ட வங்கித் தகவல்களைப் பகிரவோ, பணப்பரிவர்த்தனைக்கு ஒப்புதல் அளிக்கவோ கூடாது.
தேசிய சைபர் பாதுகாப்பு மாதத்தை முன்னிட்டு, அக்டோபர் 10ஆம் தேதி வெளியிட்ட விழிப்புணர்வுப் பதிவில் எஸ்பிஐ இந்த எச்சரிக்கையைப் பகிர்ந்துள்ளது. வங்கிக் கணக்கில் எதிர்பாராத பணம் வரவு வைக்கப்பட்டால், அதைத் திருப்பி அனுப்பும் அவசரத்தில் மோசடியில் சிக்கிவிடாமல் எச்சரிக்கையுடன் செயல்படுவதே பணத்தைப் பாதுகாப்பதற்கான முக்கிய வழியாகும்.
Also Read: தினமும் வேர்க்கடலை சாப்பிடுவீங்களா? இந்த தவறை மட்டும் பண்ணிடாதீங்க! டாக்டர்கள் கொடுக்கும் வார்னிங்!
