திருமணப் பரிசு என்றால் நகை, வாகனம், வெளிநாட்டு சுற்றுலா என வழக்கமான பரிசுகள்தான் பெரும்பாலும் நினைவுக்கு வரும். ஆனால், நாமக்கல் மாவட்டத்தைச் சேர்ந்த இளைஞர் ஒருவர் தனது வருங்கால மனைவிக்கு வாழ்நாளில் மறக்க முடியாத பரிசை வழங்க முடிவு செய்துள்ளார். பூமியில் ஒரு சொத்து வாங்குவதற்குப் பதிலாக, நிலவில் ஒரு ஏக்கர் நிலத்தை வாங்கி அதைத் தனது திருமணப் பரிசாக வழங்க உள்ளார்.
நாமக்கல் மாவட்டம் ராசிபுரம் அருகே வசிக்கும் அசோக் சரவணன் கட்டடப் பொறியாளராக பணியாற்றி வருகிறார். இவருக்கும் ராதிகா வர்ஷிணிக்கும் திருமணம் நிச்சயிக்கப்பட்டுள்ளது. வரும் 17-ம் தேதி இவர்களது திருமணம் நடைபெற உள்ளது.
திருமணத்தை முன்னிட்டு தனது வருங்கால மனைவிக்கு வித்தியாசமான பரிசு ஒன்றை வழங்க வேண்டும் என்று அசோக் சரவணன் விரும்பியுள்ளார். வழக்கமான பரிசுகளுக்கு மாற்றாக, வாழ்நாள் முழுவதும் நினைவில் இருக்கும் ஒன்றை வழங்க வேண்டும் என முடிவு செய்த அவர், நிலவில் நிலம் வாங்கும் முயற்சியில் இறங்கியுள்ளார்.
இதற்காக தனது சகோதரியின் உதவியுடன் நிலவில் ஒரு ஏக்கர் நிலத்தை வாங்கியுள்ளார். திருமணத்தின்போது அந்த நிலத்துக்கான ஆவணங்களை ராதிகா வர்ஷிணிக்கு பரிசாக வழங்க அசோக் சரவணன் திட்டமிட்டுள்ளார்.
இதுகுறித்து அசோக் சரவணன் கூறியதாவது:
“என்னுடைய வருங்கால மனைவிக்கு உலகிலேயே யாரும் கொடுக்காத ஒரு பரிசை வழங்க வேண்டும் என்று நினைத்தேன். அப்போதுதான் நிலவில் நிலம் வாங்கும் எண்ணம் வந்தது. இதுதொடர்பாக பல தகவல்களைத் தேடிப் பார்த்தபோது, 2018-ம் ஆண்டிலேயே ஒருவர் நிலவில் நிலம் வாங்கிய தகவலை அறிந்தேன். அதன் பிறகு நாமும் ஏன் நிலவில் இடம் வாங்கக்கூடாது என்று முடிவு செய்தேன்.
அதன்படி தற்போது நிலவில் ஒரு ஏக்கர் நிலத்தை வாங்கியுள்ளேன். இந்த நிலத்தை எனது வருங்கால மனைவி ராதிகா வர்ஷிணிக்கு திருமணப் பரிசாக வழங்க உள்ளேன்” என்றார்.
நிலவில் நிலம் வாங்கும் நடைமுறை குறித்து இணையத்தில் செயல்படும் சில தனியார் நிறுவனங்கள் பல்வேறு திட்டங்களை வழங்குகின்றன. ‘Bay of Rainbows’, ‘Sea of Rains’ உள்ளிட்ட பகுதிகளின் பெயர்களில் நிலம் வாங்குவதற்கான திட்டங்களை அந்த நிறுவனங்கள் தங்களது இணையதளங்களில் வழங்குகின்றன.
நிலம் வாங்க விரும்புபவர்கள் சம்பந்தப்பட்ட இணையதளத்தில் தங்களது பெயர், முகவரி உள்ளிட்ட விவரங்களைப் பதிவு செய்து, தேர்வு செய்யும் நிலப்பரப்புக்கு ஏற்ப கட்டணம் செலுத்துகின்றனர். கிரெடிட் கார்டு, டெபிட் கார்டு மற்றும் வங்கி பரிமாற்றம் உள்ளிட்ட வழிகளில் பணம் செலுத்தும் வசதியும் வழங்கப்படுகிறது.
ஒரு ஏக்கர் நிலத்துக்கு ரூ.3,068.40 விலை நிர்ணயம் செய்யப்பட்டுள்ளது. 3 ஏக்கர் வாங்கும்போது 10 சதவீத தள்ளுபடியுடன் ரூ.8,276.40-க்கும், 5 ஏக்கருக்கு 15 சதவீத தள்ளுபடியுடன் ரூ.13,014-க்கும், 10 ஏக்கருக்கு 20 சதவீத தள்ளுபடியுடன் ரூ.24,468-க்கும் விலை நிர்ணயம் செய்யப்பட்டுள்ளது.
அதேநேரத்தில், நிலவில் நிலம் வாங்குவதற்காக தனியார் நிறுவனங்கள் வழங்கும் ஆவணங்கள் பூமியில் உள்ள சொத்து உரிமையைப் போன்ற சட்டப்பூர்வ உரிமையை வழங்குமா என்பது தனியான சட்டப்பூர்வ விவகாரம். இந்த நிலையில், தனது வருங்கால மனைவிக்காக நிலவில் ஒரு ஏக்கர் நிலத்தை வாங்கி திருமணப் பரிசாக வழங்கும் அசோக் சரவணனின் முயற்சி பலரின் கவனத்தையும் ஈர்த்துள்ளது.
Also Read: மகளிர் உரிமைத் தொகையில் திடீர் சிக்கல்? ஆயிரக்கணக்கான பெண்கள் அதிர்ச்சி!
