90களில் தமிழ் சினிமாவின் முன்னணி நடிகையாக ரசிகர்களின் மனதில் தனி இடம் பிடித்தவர் சிம்ரன். இன்று திரைப்படங்களிலும், தொலைக்காட்சி நிகழ்ச்சிகளிலும் பிஸியாக இருக்கும் அவர், தனது மனிதநேய செயலாலும் பலரது பாராட்டைப் பெற்று வருகிறார். ஒரு கையுடன் பிறந்த 10 வயது சிறுமியின் கனவை நிறைவேற்றி, அவருடன் இணைந்து நடனமாடிய சிம்ரனின் செயல் பலரையும் நெகிழச் செய்துள்ளது.
பிறவியிலேயே ஒரு கை இல்லாமல் பிறந்த 10 வயது சிறுமி நிஷா, தனது மாற்றுத்திறனை ஒரு குறையாக நினைக்காமல் சிறு வயதிலிருந்தே நடனத்தில் அதிக ஆர்வம் காட்டி வருகிறார். நடிகை சிம்ரனின் நடனத்தை பார்த்து அவரைப் போலவே ஆட வேண்டும் என்பது நிஷாவின் நீண்ட நாள் கனவாக இருந்துள்ளது. சிம்ரனின் பல பாடல்களுக்கு நடனமாடி வீடியோக்களை பதிவு செய்து சமூக வலைதளங்களில் பகிர்ந்த நிஷாவின் திறமை பலரது கவனத்தையும் ஈர்த்தது.
இந்த வீடியோக்களை சமூக ஆர்வலர் ஆஷிக், நடிகை சிம்ரனிடம் அனுப்பியுள்ளார். மேலும், பள்ளிக்குச் செல்ல நிஷாவுக்கு ஒரு சைக்கிள் தேவை என்றும், அதுவே அவரது நீண்ட நாள் ஆசை என்றும் தெரிவித்துள்ளார். இதையடுத்து, நிஷாவை தனது வீட்டிற்கு அழைத்த சிம்ரன், அன்புடன் வரவேற்று அவருடன் நீண்ட நேரம் உரையாடியுள்ளார். பின்னர், தனது பிரபலமான பாடல்களில் ஒன்றுக்கு நிஷாவுடன் இணைந்து நடனமாடி அந்த சிறுமியின் கனவை நனவாக்கினார்.
அதோடு, நிஷாவுக்கு புத்தம் புதிய சைக்கிளையும் பரிசாக வழங்கினார். படிப்பில் கவனம் செலுத்த வேண்டும் என்றும், அதே நேரத்தில் நடனத்தின் மீதான ஆர்வத்தை விடாமல் தொடர்ந்து பயிற்சி செய்ய வேண்டும் என்றும் அவர் ஊக்கமளித்தார். சிம்ரனுடன் இணைந்து நடனமாடியதும், அவரிடம் இருந்து சைக்கிள் பரிசு பெற்றதும் நிஷாவுக்கு மறக்க முடியாத தருணமாக அமைந்தது. இந்த சந்திப்பின் புகைப்படங்கள் மற்றும் வீடியோக்கள் இணையத்தில் வைரலாகி வரும் நிலையில், சிம்ரனின் அன்பான செயலை ரசிகர்களும் பொதுமக்களும் பாராட்டி வருகின்றனர்.
Also Read: மகனுடன் கள்ளக்காதல்… முற்றுப்புள்ளி வைக்க நினைத்த இளைஞருக்கு சித்தி செய்த கொடூரம்!
