பிலிப்பைன்ஸின் தெற்கு நகரமான ஜெனரல் சாண்டோஸில் இன்று 7.8 ரிக்டர் அளவிலான சக்திவாய்ந்த நிலநடுக்கம் ஏற்பட்டது.. இதில் குறைந்தது 19 பேர் உயிரிழந்ததாகவும், 200-க்கும் மேற்பட்டோர் காயமடைந்ததாகவும் சர்வதேச ஊடகங்கள் செய்தி வெளியிட்டுள்ளன.. இந்த நிலநடுக்கத்தால் கட்டிடங்கள் இடிந்து விழுந்தன; மேலும் இப்பகுதி முழுவதும் சுனாமி எச்சரிக்கைகள் விடுக்கப்பட்டன.
முதல் நிலநடுக்கம் ஏற்பட்ட சுமார் இரண்டு மணி நேரத்திற்குப் பிறகு, 6.1 ரிக்டர் அளவிலான இரண்டாவது நிலநடுக்கம் அப்பகுதியைத் தாக்கியதாக அமெரிக்க புவியியல் ஆய்வு மையம் (USGS) தெரிவித்துள்ளது.
பாதிக்கப்பட்ட பகுதிகளில் ஏற்பட்டுள்ள சேதங்களை அதிகாரிகள் மதிப்பிட்டு வருவதால், உயிரிழப்பு குறித்த விவரங்கள் இன்னும் சரிபார்க்கப்பட்டு வருவதாக ஜெனரல் சாண்டோஸின் பேரிடர் மேலாண்மைத் தலைவர் அக்ரிபினோ டசெரா தெரிவித்தார்.
பிலிப்பைன்ஸ் கடற்கரைப் பகுதிகளை 3 அடி உயரம் வரையிலான சுனாமி அலைகள் தாக்கியதைத் தொடர்ந்து, அப்பகுதி மக்களை உயரமான இடங்களுக்குச் செல்லுமாறு பிலிப்பைன்ஸ் மற்றும் இந்தோனேசிய அதிகாரிகள் வலியுறுத்தினர்.
பாதிக்கப்பட்ட மிண்டானாவ் (Mindanao) பகுதிகளில் பள்ளிகளை மூடுவதாக அறிவித்த பிலிப்பைன்ஸ் அதிபர் ஃபெர்டினாண்ட் மார்கோஸ் ஜூனியர், கடற்கரைப் பகுதி மக்கள் உடனடியாக வெளியேறுமாறு கேட்டுக்கொண்டார்.. அவர் தனது பதிவில் “இப்போதே உயரமான இடங்களுக்குச் செல்லுங்கள்; தாமதிக்காதீர்கள்,” என்று அவர் கூறினார். “பின்னால் விட்டுச் செல்லும் எதையும் விட உங்கள் உயிரே மிக முக்கியமானது.” என்று குறிப்பிட்டிருந்தார்..
சுனாமி எச்சரிக்கை விடுக்கப்பட்டது
இந்தோனேசியா கலிமந்தன் மற்றும் சுலவேசி பகுதிகளுக்கு அந்நாட்டின் தேசிய வானிலை ஆய்வு மையம் சுனாமி எச்சரிக்கை விடுத்தது.. பாதிக்கப்பட்ட பகுதிகளை மூன்று மீட்டர் உயரம் வரையிலான அலைகள் தாக்கக்கூடும் என்று அதில் எச்சரிக்கப்பட்டது.
சுனாமி குறித்த அச்சம் அதிகரித்ததைத் தொடர்ந்து, மனடோ (Manado), கோரோன்டலோ (Gorontalo) மற்றும் சாங்கிஹே (Sangihe) தீவுகளில் உள்ள மக்களை உயரமான இடங்களுக்கு முறையாக வெளியேற்றுமாறு இந்தோனேசியாவின் பேரிடர் மேலாண்மை அமைப்பு அதிகாரிகளுக்கு உத்தரவிட்டது.
6கண்காணிப்பு நிலையங்களில் பல்வேறு உயரங்களைக் கொண்ட சுனாமி அலைகள் கண்காணிக்கப்பட்டதாக பிலிப்பைன்ஸ் எரிமலை மற்றும் நில அதிர்வு ஆய்வு நிறுவனம் (PHIVOLCS) தெரிவித்துள்ளது. பதிவான சுனாமி அலைகளில் அதிகபட்ச உயரம் 1.4 மீட்டராக இருந்ததாகவும் அந்த அமைப்பு மேலும் கூறியது.
தனித்தனியாக, ஜப்பான் தனது பசிபிக் கடற்கரைப் பகுதியின் பெரும்பகுதிக்கு சுனாமி எச்சரிக்கைகளை விடுத்தது; உள்ளூர் நேரப்படி காலை 11:30 மணி (0230 GMT) முதல் பாதிக்கப்பட்ட பகுதிகளை ஒரு மீட்டர் உயரம் வரையிலான அலைகள் தாக்கக்கூடும் என்று எச்சரிக்கப்பட்டது.
சுனாமி எச்சரிக்கை விடுக்கப்பட்ட இந்தோனேசியா மற்றும் மலேசியாவின் சில பகுதிகளிலும் ஒரு மீட்டர் உயரம் வரையிலான அலைகள் எதிர்பார்க்கப்படுகின்றன. தாய்லாந்து அல்லது சான் பிரான்சிஸ்கோவில் இதுவரை சுனாமி அச்சுறுத்தல் எதுவும் பதிவாகவில்லை.
கட்டிடங்கள் இடிந்து விழும் காட்சிகள்
நிலநடுக்கத்தைத் தொடர்ந்து கட்டிடங்கள் இடிந்து விழுந்து இடிபாடுகளாக மாறும் காட்சிகள் வெளியாகியுள்ளன. மாகாணத்தின் ஜெனரல் சாண்டோஸ் நகரில், ஜாலிபீ துரித உணவகம் இருந்த ஒரு வணிக வளாகம் தரைமட்டமாகியிருந்ததையும், மற்றொரு இடத்தில், அதிகாரிகள் ஆளில்லாமல் இருந்ததாகக் கூறிய ஒரு பள்ளிக் கட்டிடம் இடிந்து விழுந்ததையும் ஒரு வீடியோவில் பார்க்க முடிகிறது…
“கடவுளே, அது உண்மையிலேயே இடிந்து விழுந்துவிட்டது! … கட்டிடம் உண்மையிலேயே இடிந்து விழுந்துவிட்டது!” என்று யாரோ ஒருவர் கத்துவதையும் அந்த வீடியோவில் கேட்க முடிகிறது..
Read More : ”எப்படியாவது ஈரானை விட்டு வெளியேறுங்கள்..” இந்தியர்களுக்கு தூதரகம் எச்சரிக்கை..! மீண்டும் போர் பதற்றம்..
