டீ குடிக்கும்போது வெறுமனே டீயை மட்டும் குடிக்காமல் அதோடு கூடவே இரண்டு பிஸ்கட் அல்லது ரஸ்க் முக்கி சாப்பிட்டால் டீ, ரஸ்க் ரெண்டுமே கொஞ்சம் சுவை கூடுதலாக இருப்பது போல தோன்றும். ஆனால் இந்த பழக்கம் உங்களுடைய ரத்த சர்க்கரை அளவு மற்றும் பிற உடல் ஆரோக்கியத்தை பாதிக்கும் என்பது உங்களுக்குத் தெரியுமா?
நம்மில் பலருக்கும் டீ குடிக்கும்போது அதோடு கூடவே ஏதாவது ஸ்நாக்ஸ் சேர்த்து சாப்பிட்டே ஆக வேண்டும். மற்ற தின்பண்டங்கள் தான் ஆபத்தானவை. ஆனால் டீயுடன் இரண்டு பிஸ்கட் (அ) பிரட் டோஸ்ட் செய்து கொடுத்தால் குழந்தைகள் நன்றாகச் சாப்பிடுவார்கள் என்று அவர்களுக்கும் கொடுத்து பழக்கி அவர்களுடைய உடல் நலத்தையும் கெடுத்து விடுகிறோம்.
அதன் சுவை அலாதியானது தான். அதேசமயம் மிக ஆபத்தானதும் கூட. அதைப் புரிந்து கொண்டு இன்றோடு அந்த பழக்கத்தை விட்டுவிடுங்கள். குறிப்பாக நீரிழிவு நோயோ அல்லது ப்ரீ – டயாபடீஸ் நிலையோ இருந்தால் இதை கட்டாயம் நினைத்துப் பார்க்கவே கூடாது. பொதுவாகவே தேநீரில் நேரடியாக சர்க்கரை சேர்த்து குடிப்போம். அதோடு மறைமுக சர்க்கரையைக் கொண்டிருக்கிற பிஸ்கட் அல்லது ரஸ்க் சேர்த்து சாப்பிடும்போது அதன் அளவு கூடுதலாகிறது.
அதோடு தேநீரில் உள்ள காஃபைன் உடலில் இன்சுலின் எதிர்ப்புத்தன்மையை ஏற்படுத்தி, இன்சுலின் உற்பத்தியின் சீரான தன்மையைக் குழைத்து விடுகிறது. மேலும் ரஸ்க் அல்லது பிரெட் டோஸ்ட்டில் இருக்கிற கார்போஹைட்ரேட் மற்றும் சர்க்கரை உடலில் மிக விரைவாக குளுக்கோஸை ரிலீஸ் செய்யும் ஆபத்து அதிகம். டீயுடன் சேர்த்து பிஸ்கட், ரஸ்க் அல்லது ஒயிட் பிரட் சேர்த்து சாப்பிடும்போது அவற்றில் இருக்கும் கார்போஹைட்ரேட் மற்றும் சர்க்கரை டீயுடன் சேர்ந்து ரத்த சர்க்கரை அளவை மிக வேகமாக அதிகரிக்கச் செய்யும்.
இதனால் அவற்றைச் சாப்பிட்டு சிறிது நேரத்திலேயே உடல் சோர்வு, லேசான மயக்கம் போன்ற பிரச்சினைகள் ஏற்படக்கூடும். குறிப்பாக நீங்கள் நீரிழிவு நோயாளியாக இருந்தால் உங்கள் ரத்த சர்க்கரையின் அளவு கிடுகிடுவென உயரும். பொதுவாகவே பிஸ்கட் மற்றும் பிரட் ஆகியவற்றின் கிளைசெமிக் குறியீடு மிக அதிகம். அதோடு பட்டர் சேர்த்து டோஸ்ட் செய்தோ அல்லது ஜாம் சேர்த்து சாப்பிடும்போது அவற்றின் கிளைசெமிக் குறீயீடு இன்னும் வேகமாக அதிகரிக்கும். இது இரத்த சர்க்கரைக்கு உடனடியாக அதிகரிக்கச் செய்து இன்னும் பெரிய அதிர்ச்சியை ஏற்படுத்தும். அதனால் இந்த காமினேஷனை மிக எச்சரிக்கையுடன் எடுத்துக் கொள்ள வேண்டும்.
நீங்கள் டீ பிரியராக இருந்தால் டீயில் சர்க்கரை குறைவாகவோ அல்லது சர்க்கரை சேர்க்காத டீயை எடுத்துக் கொள்வதன் மூலம் ரத்த சர்க்கரை அளவைக் கட்டுப்பாட்டில் வைக்கலாம். பிரட் டோஸ்ட்டில் ஒயிட் பிரட்டுக்கு பதிலாக மல்டி கிரெய்ன் பிரட் எடுத்துக் கொள்ளலாம். அதில் பட்டர், ஜாம் வைத்து சாப்பிடுவதற்கு பதிலாக பீநட் பட்டர் அல்லது பாதாம் பட்டர் போன்றவற்றை முயற்சி செய்யுங்கள்.
