காதலனுடன் வெளிநாடு சுற்றுலா செல்ல திட்டமிட்டிருந்த காதலி, சாட்ஜிபிடி-யிடம் ஆலோசனை பேரில் விசா இல்லாமல் சென்று விமானத்தை தவறவிட்டதால் கதறி அழுத வீடியோ வைரலாகி வருகிறது.
ஸ்பெயின் நாட்டைச் சேர்ந்த மேரி கால்டாஸ் (Mery Caldass) என்பவர், தனது காதலருடன் பியூர்டோ ரிகோவுக்கு விடுமுறை பயணம் செல்ல திட்டமிட்டுள்ளார். இந்த பயணத்திற்கு விசா தேவைப்படும் என்று ChatGPT-யிடம் அட்வைஸ் கேட்டுள்ளார். அதற்கு, விசா தேவையில்லை என்று சாட்ஜிபிடி பதில் அளித்துள்ளது. இதனை நம்பி சுற்றுலா செல்லும் ஆர்வத்தில் காதலனுடன் விமான நிலையத்திற்கு சென்றுள்ளார் அந்த பெண். இருப்பினும், தனக்குத் தேவையான பயண ஆவணங்கள் பற்றிய தவறான தகவலைக் கொடுத்ததாகவும், இதனால் தான் விமானத்தைத் தவறவிட்டதாகவும் கூறி விமான நிலையத்திலேயே அந்த பெண் கதறி அழுதுள்ளார். இந்த சம்பவம் சமூக ஊடக தளத்தில் வைரலாகி வருகிறது.
அதாவது, தி நியூயார்க் போஸ்ட் படி, கிட்டத்தட்ட 100,000 பின்தொடர்பவர்களைக் கொண்ட கால்டாஸ், கரீபியன் தீவுக்குச் செல்ல விசா தேவையா என்பது குறித்து ChatGPT தவறான தகவலை வழங்கியதாகக் கூறினார். அதாவது, பியூர்டோ ரிகோ செல்ல விசா தேவையில்லை என்பது உண்மை தான். ஆனால் கட்டாயமாக ESTA (Electronic System of Travel Authorization) ஆவணம் இருக்க வேண்டும் என்பது அவர்களுக்கு தெரியாமல் போனது. இதனால் அவர்கள் ஏமாற்றமடைந்தனர். வீடியோவில் மேரி அழுதபடி பேச, அருகில் இருந்த அவரது காதலர் அலெஜான்ட்ரோ சிட் ஆறுதல் கூறும் காட்சி பதிவாகியுள்ளது.
AI சாட்போட்களிடம் ஆலோசனை கேட்பது ‘சிக்கல்களுக்கு’ வழிவகுத்தது இது முதல் முறை அல்ல. அமெரிக்கன் காலேஜ் ஆஃப் பிசிஷியன்ஸ் ஜர்னல்ஸில் உள்ள ஒரு வழக்கு அறிக்கையின்படி, ChatGPT இலிருந்து பெற்ற உணவு வழிகாட்டுதலைப் பின்பற்றிய பின்னர் 60 வயது நபர் மருத்துவமனையில் அனுமதிக்கப்பட்டார். அவர் தனது உணவில் இருந்து டேபிள் உப்பை நீக்கிவிட்டார், ஏனெனில் அதன் உடல்நல பாதிப்புகள் குறித்த கவலைகள் இருந்தன. அதற்கு பதிலாக, அவர் சோடியம் புரோமைடைப் பயன்படுத்தத் தொடங்கினார் – 1900 களின் முற்பகுதியில் மருந்துகளில் ஒரு காலத்தில் காணப்பட்ட ஒரு கலவை, ஆனால் இப்போது அதிக அளவில் நச்சுத்தன்மை வாய்ந்ததாக அங்கீகரிக்கப்பட்டுள்ளது என்று அறிக்கை கூறியது. இந்த மாற்றீட்டின் விளைவாக அந்த மனிதன் புரோமிசத்தை உருவாக்கியதாக மருத்துவர்கள் பின்னர் தெரிவித்தனர்.
