ஈரான் தொடர்பான தொடர் பதற்றங்களுக்கு மத்தியில், அமெரிக்க அதிபர் டொனால்ட் டிரம்ப் செவ்வாயன்று ஒரு காட்டமான அறிக்கையை வெளியிட்டார். “ ஹார்முஸ் நீரிணை மூடப்பட்டதன் காரணமாக எரிபொருள் பற்றாக்குறையை எதிர்கொள்ளும் நாடுகள், சிறிது துணிச்சலை வளர்த்துக்கொண்டு, தங்களுக்குத் தேவையான எண்ணெயைத் தாங்களே பெற்றுக்கொள்ள வேண்டும்” என்று டிரம்ப் தெரிவித்துள்ளார்..
ஈரான் எண்ணெய் குறித்து டிரம்பின் ஆவேசப் பேச்சு
‘Truth Social’ தளத்தில் வெளியிட்ட ஒரு பதிவில், இங்கிலாந்து உட்பட பாதிக்கப்பட்ட நாடுகள், ஒன்று அமெரிக்காவிடமிருந்து எரிபொருளை வாங்கிக்கொள்ள வேண்டும் அல்லது ஹார்முஸ் நீரிணையை அணுகுவதை உறுதிசெய்யத் தாங்களே சுதந்திரமான நடவடிக்கைகளை மேற்கொள்ள வேண்டும் என்று டிரம்ப் பரிந்துரைத்தார். அமெரிக்காவின் நிலைப்பாட்டில் ஒரு மாற்றத்தையும் அவர் சுட்டிக்காட்டினார்; இனிவரும் காலங்களில் நாடுகள் அமெரிக்காவின் தலையீட்டைச் சார்ந்திருப்பது குறையக்கூடும் என்று அவர் குறிப்பிட்டார்.
“ஹார்முஸ் நீரிணை காரணமாக விமான எரிபொருள் கிடைக்காமல் தவிக்கும் அனைத்து நாடுகளுக்கும், குறிப்பாக ஈரானை வீழ்த்துவதற்கான நடவடிக்கையில் ஈடுபட மறுத்த இங்கிலாந்து போன்ற நாடுகளுக்கு நான் ஒரு ஆலோசனையை முன்வைக்கிறேன்: முதலாவதாக, அமெரிக்காவிடமிருந்து வாங்குங்கள்; எங்களிடம் தாராளமாக இருப்பு உள்ளது. இரண்டாவதாக, இத்தனை நாள் தாமதித்த துணிச்சலை இப்போது வளர்த்துக்கொண்டு, அந்த நீரிணைக்குச் சென்று, உங்களுக்குத் தேவையானதை ‘எடுத்துக்கொள்ளுங்கள்’ (TAKE IT),” என்று டிரம்ப் குறிப்பிட்டுள்ளார்.
மேலும் “நீங்கள் உங்களுக்காக நீங்களே போராடக் கற்றுக்கொள்ளத் தொடங்க வேண்டும். அமெரிக்கா இனி உங்களுக்கு உதவ அங்கே இருக்காது; எப்படி நீங்கள் எங்களுக்கு உதவ அங்கே இருக்கவில்லையோ, அதேபோலத்தான் இதுவும். ஈரான், அடிப்படையில், முற்றிலுமாகச் சிதைக்கப்பட்டுவிட்டது. கடினமான பகுதி முடிந்துவிட்டது. சென்று உங்களுக்குத் தேவையான எண்ணெயை நீங்களே பெற்றுக்கொள்ளுங்கள்! என்று கூறினார்.
டிரம்பின் எச்சரிக்கை
ஈரான் தொடர்பான டிரம்ப் எச்சரிக்கை விடுப்பது இது முதன்முறையல்ல.. இதற்கு முன்பும் ஈரானை அவர் பலமுறை மிரட்டி உள்ளார்.. ஈரானும் அதற்கு தகுந்த பதிலடி கொடுத்துள்ளது.. அந்த வகையில் நேற்று தனது ‘Truth Social’ தளத்தில் ஈரானுக்கு கடும் மிரட்டலை விடுத்திருந்தார்.. ஈரானுக்கும் அமெரிக்காவுக்கும் இடையே விரைவில் ஒரு ஒப்பந்தம் எட்டப்படாவிட்டால், ஈரானின் மின் உற்பத்தி நிலையங்கள், எண்ணெய் கிணறுகள் மற்றும் கார்க் தீவு (Kharg Island) ஆகியவற்றைத் முற்றிலுமாக அழித்துவிடுவேன்.. ஹார்முஸ் நீரிணை உடனடியாக வணிகப் போக்குவரத்திற்காகத் திறக்கப்படாவிட்டால் இந்த நடவடிக்கை மேற்கொள்ளப்படும்..” என்று பதிவிட்டிருந்தார்..
ஈரானின் கடந்தகால நடவடிக்கைகளால் அமெரிக்க வீரர்கள் மற்றும் பிறருக்கு ஏற்பட்ட இழப்புகளுக்குப் பதிலடியாக டிரம்ப் மிரட்டல் விடுத்திருந்தார்.. இதுவரை ஈரானின் எரிசக்தி உள்கட்டமைப்பை அமெரிக்கா வேண்டுமென்றே விட்டுவைத்துள்ளது என்றும், பேச்சுவார்த்தைகள் தோல்வியுற்றால், கடல்நீர் சுத்திகரிப்பு ஆலைகள் உள்ளிட்ட இந்தச் சொத்துக்களை அழிப்பது இறுதி இராணுவ நடவடிக்கையின் ஒரு பகுதியாக இருக்கும் என்றும் அவர் கூறினார்.
ஈரானின் எண்ணெய் ஏற்றுமதியில் சுமார் 90% கையாளும் கார்க் தீவு, ட்ரம்பின் தொடர்ச்சியான கவனத்தின் மையமாக இருந்து வருகிறது. முந்தைய நேர்காணல் ஒன்றில், அந்தத் தீவையும் ஈரானின் எண்ணெய் இருப்புகளையும் கைப்பற்றுவது பரிசீலனையில் இருக்கலாம் என்று அவர் சூசகமாகத் தெரிவித்தார், இருப்பினும் அதற்கு அப்பகுதியில் அமெரிக்காவின் நீண்டகால இருப்பு தேவைப்படும் என்றும் அவர் மேலும் கூறினார்.
ஈரான் மறுப்பு
அமெரிக்கா உடன் எந்தவொரு அதிகாரப்பூர்வப் பேச்சுவார்த்தையிலும் ஈடுபட்டதை ஈரான் மறுத்துள்ளது. மும்பையில் உள்ள ஈரானியத் துணைத் தூதரகம், “இடைத்தரகர்கள் மூலம் வரம்பு மீறிய, நியாயமற்ற கோரிக்கைகளை” மட்டுமே தங்கள் நாடு பெற்றதாகக் கூறியதுடன், பாகிஸ்தான் தலைமையிலான மத்தியஸ்த முயற்சிகளில் பங்கேற்றதையும் மறுத்துள்ளது. போரை முடிவுக்குக் கொண்டுவருவதற்கான அழைப்புகளை ஈரான் வரவேற்றாலும், அமெரிக்காதான் இந்த மோதலைத் தொடங்கியது என்பதையும் சுட்டிக்காட்டியது..
Read More : ஹார்முஸை திறக்கலன்னாலும் பரவாயில்ல.. ஈரான் போரை நிறுத்த தயார்..! மீண்டும் அந்தர்பல்டி அடித்த டிரம்ப்..!
