இந்திய சமையலில் பரவலாக பயன்படுத்தப்படும் இலவங்கப்பட்டை (Cinnamon), உணவின் மணமும் சுவையும் உயர்த்துவதோடு, உடல்நலத்திற்கும் பல நன்மைகளை தரும் ஒரு இயற்கை மருந்தாக கருதப்படுகிறது. நூற்றாண்டுகளாக ஆயுர்வேத மருத்துவத்தில் முக்கிய இடம் பெற்றுள்ளது. இந்த இலவங்கப்பட்டையால் தயாரிக்கப்படும் தேநீர், தினசரி குடிப்பதால் பல்வேறு ஆரோக்கிய பலன்களை வழங்குகிறது.
நீரிழிவு நோயாளிகளுக்கு நல்லது: இலவங்கப்பட்டை தேநீர் நீரிழிவு நோயாளிகளுக்கு இயற்கையான ஆதரவாக கருதப்படுகிறது. இது இரத்தத்தில் உள்ள சர்க்கரை அளவை கட்டுப்படுத்த உதவும் திறன் கொண்டது. இலவங்கப்பட்டையில் உள்ள செயற்பாட்டு சேர்மங்கள், உடலில் இன்சுலின் செயல்பாட்டை மேம்படுத்தி, இன்சுலின் உணர்திறனை அதிகரிக்க உதவுகின்றன. இதன் மூலம், உடலில் உள்ள செல்கள் சர்க்கரையைச் சிறப்பாக பயன்படுத்திக் கொள்ள முடியும்.
மேலும், இது உணவுக்குப் பிறகு இரத்தத்தில் அதிகரிக்கும் சர்க்கரை அளவைக் குறைக்க உதவுகிறது. இலவங்கப்பட்டை, கார்போஹைட்ரேட்டுகள் உடலில் மெதுவாக உடைக்கப்பட உதவி செய்வதால், சர்க்கரை திடீர் உயர்வைத் தடுக்கிறது. அதே நேரத்தில், இரத்தத்தில் உள்ள அதிகப்படியான குளுக்கோஸை கட்டுப்படுத்துவதிலும் இது துணைபுரிகிறது. இதனால் நீரிழிவு நோயாளிகள் தினசரி வாழ்க்கையில் சீரான சர்க்கரை அளவை பராமரிக்க உதவியாக இருக்கும்.
சக்திவாய்ந்த ஆன்டிஆக்ஸிடன்ட்: ஆன்டிஆக்ஸிடன்ட்கள், பாக்டீரியா எதிர்ப்பு மற்றும் வைரஸ் எதிர்ப்புப் பண்புகள் நிறைந்த இலவங்கப்பட்டை தேநீர் அருந்துவது உடல் நலத்திற்கு மிகவும் நன்மை பயக்கும். இவை உடலை ஃப்ரீ ரேடிக்கல்களிலிருந்து பாதுகாப்பதுடன், சளி மற்றும் இருமல் போன்ற தொற்றுகளிலிருந்தும் பாதுகாக்கின்றன. இது செரிமானத்தை மேம்படுத்துகிறது, அஜீரணம், வாயு மற்றும் வயிறு உப்புசத்தைக் குறைக்கிறது, வளர்சிதை மாற்றத்தை வேகப்படுத்துகிறது, மேலும் உடல் எடை குறைப்பிற்கும் உதவுகிறது.
இதய ஆரோக்கியம்: இலவங்கப்பட்டை தேநீர் அருந்துவது கெட்ட கொழுப்பைக் (LDL) குறைத்து, நல்ல கொழுப்பை (HDL) அதிகரிக்கிறது. இது இரத்த நாளங்களை வலுப்படுத்தி இதயத்தைப் பாதுகாக்கிறது. இது இரத்த அழுத்தத்தைக் கட்டுப்பாட்டில் வைத்திருப்பதோடு, இதய நோய் மற்றும் மாரடைப்பு ஏற்படும் அபாயத்தையும் குறைக்கிறது. மேலும், பெண்களுக்கு மாதவிடாய் காலத்தில் ஏற்படும் வயிற்று வலி, தசை வலி, குமட்டல் மற்றும் வாந்தி போன்ற பிரச்சனைகளைக் குறைப்பதற்கும் இலவங்கப்பட்டை தேநீர் மிகவும் உதவியாக இருக்கிறது.
இலவங்கப்பட்டை தேநீர் செய்வது எப்படி? இலவங்கப்பட்டையின் ஒவ்வாமை எதிர்ப்புப் பண்புகள், கருப்பையைச் சுற்றியுள்ள தசைகளைத் தளர்த்த உதவுவதாகவும், இதன் மூலம் மாதவிடாய் காலப் பிடிப்புகள், குமட்டல் மற்றும் தசை வலிகளைக் குறைக்க முடியும் என்றும் ஆய்வுகள் தெரிவிக்கின்றன.
தயாரிப்பு முறை: ஒரு பாத்திரத்தில் ஒரு கப் தண்ணீர் எடுத்துக் கொள்ளுங்கள். அதில் ஒரு பட்டை அல்லது அரை தேக்கரண்டி பட்டைத்தூள் சேர்த்து 5-10 நிமிடங்கள் கொதிக்க வைக்கவும். ஆறிய பிறகு, அதை வடிகட்டி, ஒரு தேக்கரண்டி தேன் அல்லது சிறிதளவு எலுமிச்சை சாறுடன் பருகவும். நீரிழிவு நோயாளிகள் தேன், வெல்லம் அல்லது சர்க்கரை சேர்க்காமல் எலுமிச்சை சாற்றை மட்டும் அருந்த வேண்டும். இது மாதவிடாய் காலத்தில் ஏற்படும் வலியைக் குறைக்க உதவுகிறது.
இலவங்கப்பட்டை தேநீர் அருந்துவதால் பல உடல்நல நன்மைகள் உள்ளன. இருப்பினும், அதனை அளவோடுதான் பயன்படுத்த வேண்டும். ஏனெனில், அதில் உள்ள ‘கூமரின்’ என்ற வேதிப்பொருள், அளவுக்கு அதிகமாக உட்கொண்டால் கல்லீரலுக்குத் தீங்கு விளைவிக்கும். ஆகையால், கர்ப்பிணிப் பெண்கள், பாலூட்டும் தாய்மார்கள் மற்றும் நாள்பட்ட நோய்களுக்காக மருந்துகளை உட்கொள்பவர்கள் மருத்துவரை அணுகி ஆலோசனை பெற வேண்டும்.
